ბიზნესის ენაში არსებობს ტერმინი “think outside the box”, რომელიც მარკეტინგში მოღვაწე ადმაიანებისათვის კარგად ნაცნობია. ზოგადად, ადამიანს არ შეუძლია საკუთარი ცოდნის ფარგლებს გასცდეს, მაშინ როგორ უნდა ვიფიქროთ კრეატიულად ანუ “outside the box”. კრეატიულად აზროვნება არის ჩვენი ცოდნისა და გამოცდილების საზღვრებში, რომელიც წლებთან ერთად გროვდება და რაზეც ჯერ არც კი დავფიქრებულვართ.
სწორედ დაგროვებული ცოდნისა და ახლებურად დაფიქრების შედეგია სტარტაპი Stack, რომელიც პირველი ქართული ბრაუზერია. Stack-ის ერთ-ერთმა დამფუძნებელმა მხოლოდ საკუთარი შრომის ოპტიმიზაციის მიზნით შექმნა ვებ ბრაუზერის აპლეკაცია, რომელმაც მომხმარებლთა დიდი მოწონება დაიმსახურა და ასე დაიწყო Stack-ის გუნდმა პროდუქტზე მუშაობა.
Stack ოპერირებს ბაზარზე, რომელშიც ისეთი მსოფლიო დონის გიგანტები არიან წარმოდგენილნი, როგორებიცაა: Google Chrome, Mozilla Firefox, Safari თუ სხვა. ჩვენთან საუბარში Stack-ის ერთ-ერთი დამფუძნებელი, გიორგი ლალიაშვილი, გვიყვება სტარტაპის პირველ ნაბიჯებსა და პროდუქტის მთავარ განმასხვავებელ ნიშან-თვისებებზე:
„საწყის ეტაპზე პროდუქტს მხოლოდ ჩვენს ყოველდღიურ საქმიანობაში ვიყენებდით და მივხვდით, რომ ნებისმიერ სხვა იდენტურ პროდუქტთან შედარებით Stack ბევრად კომფორტული იყო. აქამდე არსებული ინტერნეტ ბრაუზერებისგან განსხვავებით, რომელიც მხოლოდ ბრაუზინგისათვის შეიქმნა, Stack მორგებულია ყველა იმ ვებ აპლიკაციაზე, რომელსაც ყოველდღიურად მილიონობით ადამიანი იყენებს და მომხმარებელს სთავაზობს სრულიად ახლებურ “User experience”-ს. მომდევნო ნაბიჯი Stack-ის „Product Hunt”-ზე განთავსება იყო და მომხმარებლებისგანაც დადებითი შეფასება მივიღეთ. ამის შემდეგ მივხვდით, რომ საინტერესო პროდუქტი გვქონდა და სტარტაპის განვითარებაზე აქტიური მუშაობა დავიწყეთ.“
ამ მომენტისათვის კომპანია მომხმარებელს სთავაზობს ორი ტიპის პროდუქტს: Stack-სა და Stack Pro-ს. Stack არის ვებ ბრაუზერი, რომელიც ნებისმიერ მომხმარებელს შეუძლია უფასოდ გადმოწეროს და დააყენოს Windows და iOS სისტემებზე. რაც შეეხება Stack pro-ს, ეს არის ვებ აპლეკაციების მენეჯმენტის ინსტრუმენტი, რომელიც მორგებულია სხვადასხვა პროფესიის მქონე ადამიანზე და მისი ღირებულება უცხოურ ბაზრებზე არის 8.4 დოლარი თვეში, ხოლო საქართველოში – 8.4 ლარი.
„როდესაც სტარტაპზე მუშაობა დავიწყეთ, თავიდანვე ვიცოდით, რომ აქსელერაციის პროგრამა დაგვჭირდებოდა და 500 Startups-აც განვიხილავდით. პირველი მცდელობისას არ შეგვარჩიეს, რადგან სტარტაპის განვითარების ძალიან ადრეულ ეტაპზე ვიყავით. როდესაც გავიგეთ, რომ საქართველოს ბანკისა და ტექნოპარკის მხარდაჭერით საქართველოში შემოდიოდა 500 Startups, მივხვდით, რომ ეს ჩვენი მეორე შანსი იყო.
ვთვლი, რომ საერთაშორისო სტარტაპ აქსელერატორის ქართულ ბაზარზე შემოყვანა უდიდესი წინ გადადგმული ნაბიჯი იყო, როგორც სტარტაპ კომპანიებისათვის, არამედ მთლიანად ამ ეკოსისტემისათვის. ჩვენს სტარტაპს ეს პროგრამა მისცემს ცოდნას, წვდომას უცხოელ ინვესტორებთან და ინვესტიციას, რომელსაც საქართველოს ბანკი ანხორციელებს 500 Startups-ის გავლით.
ამ პროგრამაში მონაწილეობამ ჩვენი მოლოდინი ნამდვილად გაამართლა. თამამად შეგვიძლია ვთქვათ, რომ მენტორების პროფესიონალიზმი აქ ბევრად მაღალია, ვიდრე ნებისმიერ სხვა აქსელერაციის პროგრამაში. ამავდროულად, ეს პროგრამა მორგებულია ისეთ სტარტაპებზე, რომლებიც არიან ზრდის ფაზაში და Stack ამ მომენტისათვის სწორედ ამ ეტაპს გადის,“ – ამბობს კომპანიის ერთ-ერთი დამფუძნებელი გიორგი ლალიაშვილი.
ასე, რომ 500 Startups-ის ქართულ ბაზარზე შემოსვლამ უკვე შეცვალა ბევრი სტარტაპის ცხოვრება და აქსელერაციის პროგრამის პარალელურად საქართველოში იცვლება საინვესტიციო გარემოც. ასე, რომ თუ გაქვთ რაიმე ბიზნეს იდეა და რაც მთავარია გჯერათ ამ იდეის, შესაფერისი დროა მოქმედების დასაწყებად.