რა არის Demo Day – დღე, რომელსაც ყველა სტარტაპერი ელოდება

ადამიანი, როგორც წესი, სიმბოლიზმს დიდ ყურადღებას უთმობს. ასე არის სხვადასხვა დღეებთან მიმართებითაც, რომელთაც თითოეული ჩვენგანი სუბიექტური მიზეზებით ირჩევს. ეს ტენდენცია თვალსაჩინოა კომპანიების შემთხვევაშიც, რადგან კომპანიის დაფუძნების დღის დავიწყება ისევე შეუძლებელია, როგორც იმ დღის, როცა კომპანიამ პირველი ინვესტიცია მოიზიდა ან პირველი დოლარი გამოიმუშავა. სტარტაპების შემთხვევაში, დიდ სიმბოლურ დატვირთვას კიდევ ერთი დღე ატარებს, რომელიც ნებისმიერი სტარტაპ-ეკოსისტემის ქვაკუთხედად ითვლება. საუბარია Demo Day-ზე, რომელსაც აქტიური და მომავალი სტარტაპერები და ინვესტორები სულმოუთქმელად ელიან.

ასეთ დღეებს, როგორც წესი, სტარტაპ-აქსელერატორები ატარებენ – ორგანიზაციები, რომლებიც კომპანიებს იდეის აღსრულებაში და მასშტაბირებაში ეხმარებათ. რამდენიმე წელია, რაც Demo Day-ი საქართველოშიც იმართება, რაც ჩვენს ქვეყანაში კალიფორნიული 500 Global-ის გამოჩენას უკავშირდება. Demo Day-ზე შეკრებილი სტარტაპერები დამსწრე საზოგადოებას და მაყურებლებს საკუთარ კომპანიას აცნობენ და მიღწევებისა და განვლილი დაბრკოლებების შესახებ უყვებიან. ეს დღე იმდენად მასშტაბური და მნიშვნელოვანია, რომ სტარტაპერების გარდა მას ინვესტორები, კორპორაციებისა და ხელისუფლების წარმომადგენლები ესწრებიან.

მაშ, რით გამოირჩევა Demo Day-ი სხვა დღეებისგან და რატომ ელოდება მას ყველა სტარტაპერი და ინვესტორი? ამ კითხვებს აღნიშნულ ბლოგში ვუპასუხებთ. 

ხილვადობა და საჯაროობა

Demo Day-ზე გამოსულ სტარტაპებს საკუთარი კომპანიისა და ხედვის წარმოჩენის საუკეთესო შესაძლებლობა აქვთ, რადგან ადამიანები, რომლებიც მათ უსმენენ – ინვესტორები, ინდუსტრიის ექსპერტები, მედიასაშუალებებისა და სახელმწიფოს წარმომადგენლები არიან. ხილვადობა, რომელსაც Demo Day-ზე გამოჩენა უზრუნველყოფს, ერთ-ერთი კატალიზატორია, რომელსაც სტარტაპის ზრდის დაჩქარება და რეგიონში გაფართოების ხელშეწყობა შეუძლია. ამასთან, Demo Day-ში მონაწილე სტარტაპერები, როგორც წესი, სტარტაპ-ეკოსისტემის განუყოფელ წევრებად ყალიბდებიან – ადამიანებად, რომლებსაც ინდუსტრიაში იცნობენ და პატივს სცემენ.

ინვესტორებთან ურთიერთობა

ნებისმიერი Demo Day-ის მთავარი დანიშნულება სტარტაპერებისა და ინვესტორების დაკავშირებაა. Demo Day-ზე შეხვდებით, როგორც ენჯელ-ინვესტორებს, ასევე ვენჩურულ კაპიტალისტებს და კორპორაციების წარმომადგენლებს, რომლებიც, შესაძლოა, თქვენი სტარტაპის გამოსყიდვით ინტერესდებოდნენ. გამომდინარე იქიდან, რომ Demo Day-ზე კონკრეტული, წინასწარ შერჩეული სტარტაპები გამოდიან, ინვესტორებსა და სტარტაპერებს შორის არსებული ბარიერები სრულად იშლება, ხოლო ადამიანებს შორის პროფესიულ პატივისცემაზე დაფუძნებული ურთიერთობა ყალიბდება, რაც ინვესტიციის და მათ შორის ე.წ. “ჭკვიანი ფულის” მოზიდვას ამარტივებს.

პროდუქტის ვალიდაცია და უკუკავშირი

Demo Day-ში მონაწილეობამდე, სტარტაპი აქსელერაციის რთულ, მაგრამ ჟანგბადივით საჭირო პროგრამას გადის, რომლის მიზანი – იდეისა და პროდუქტის ვალიდაციაა. ეს პროცესი Demo Day-ზე გრძელდება, რადგან სცენაზე გამოსულ სტარტაპერებს მყისიერი უკუკავშირის მიღება შეუძლიათ, როგორც უშუალოდ პრეზენტაციასთან, ასევე განვითარების სტრატეგიასთან და საბაზრო ტენდენციებთან დაკავშირებით. სტარტაპ-ეკოსისტემის წამყვანი მოთამაშეებისგან მიღებული კონსტრუქციული კრიტიკა ის იარაღია, რომელსაც სტარტაპის სწორ გზაზე დაყენება შეუძლია.

ნეთვორქინგი და კავშირები

მართალია, Demo Day-ის კულმინაცია სტარაპერების მიერ მათი კომპანიების შესახებ მოთხრობილი რამდენიმეწუთიანი პრეზენტაციაა, მაგრამ ამ ღონისძიების ფუნდამენტი – ნეთვორქინგი და კავშირების დამყარების შესაძლებლობაა. სტარტაპ-ეკოსისტემისთვის, Demo Day-ი წლის ერთ-ერთი მთავარი ღონისძიებაა, რომელსაც ანტრეპრენიორები დიდი სიხარულით ესწრებიან, ხოლო ახალბედა სტარტაპერებს მათი პირადად გაცნობა და პროფესიული და მეგობრული ურთიერთობის დამყარება შეუძლიათ. ასე კი, იბადება კომუნა, რომელიც ქვეყანაში ინოვაციას ქმნის.

მოტივაცია და იმპულსის შენარჩუნება

გამომდინარე იქიდან, რომ ბევრი სტარტაპისთვის Demo Day-ში მონაწილეობა ერთგვარი ნიშანსვეტია, სცენაზე გამოსვლა და საკუთარი კომპანიის შესახებ საუბარი ერთ-ერთი მთავარი მოტივატორია, რომელიც დამფუძნებლებს იმპულსის შენარჩუნებაში ეხმარებათ. Demo Day-ზე წარმატებით გამოსვლის შემთხვევაში, სტარტაპის დამფუძნებლებსა და თანამშრომლებში მოტივაცია და თავდაჯერებულობა იმატებს, რაც კომპანიაში შრომისმოყვარეობისა და სწრაფი გადაწყვეტილებების კულტურას აყალიბებს. ამასთან, განსაკუთრებით მნიშვნელოვანია შინაგანი მოტივაცია, რომელიც ნებისმიერ ჩვენგანს სჭირდება, რომ არ გავჩერდეთ და დასახული მიზნისკენ სვლა ყველა წინააღმდეგობის მიუხედავად გავაგრძელოთ.

Demo Day-ის მნიშვნელობა და გავლენა ტექნოლოგიურ წრეებს სცდება. Demo Day-ზე დასწრება და მისი ყურება აუცილებელია არამარტო სტარტაპერებისა და ინვესტორებისთვის, არამედ ნებისმიერი ადამიანისთვის, რომელიც სიახლეებით, ინოვაციითა და სხვების ცხოვრების გამარტივებით ინტერესდება. სტარტაპერები ინოვაციურ პროდუქტებს ქმნიან, რომლებიც ყველასთვისაა მნიშვნელოვანი, რადგან პროგრესზე ორიენტირებულ გამართულ ქვეყანას ინოვაციურად და თავისუფლად მოაზროვნე ჭკვიანი ადამიანები ქმნიან.

500 Global in Eurasia-ს Demo Day 27 ივნისს თბილისში ჩატარდება. ეს რიგით მეექვსე Demo Day-ია, რომელსაც კალიფორნიული სტარტაპ-აქსელერატორი საქართველოს ბანკთან და ინოვაციებისა და ტექნოლოგიების სააგენტოსთან თანამშრომლობით საქართველოში ატარებს.

Demo Day-ს ყურება საქართველოს ბანკი ბიზნესის ფეისბუქგვერდზე ლაივში შეგიძლიათ.

არ გაჩერდე, გააგრძელე კითხვა