როგორ ვაქციოთ ტექსტი ვიდეოდ ერთ წუთზე ნაკლებ დროში Katalist-ის გამოყენებით? 

ბოლო წლებში, საკომუნიკაციო მედიუმებს შორის წამყვანი ადგილი ვიდეომ დაიკავა, რადგან ამ ფორმატით იდეების გადმოცემა უფრო ლაკონიურად, მარტივად და საინტერესოდ შეიძლება, ვიდრე ტექსტით ან სტატიკური სურათებით. კომპანიებისთვის, ვიდეოკონტენტი ყოველდღიურ საკომუნიკაციო საშუალებად იქცა, თანაც არამხოლოდ მომხმარებლებთან ურთიერთობისას, ანუ მარკეტინგში, ბრენდინგსა და გაყიდვებში, არამედ თანამშრომლებთანაც – შიდა კომუნიკაციის გასაუმჯობესებლად და ტრენინგების ჩატარების მიზნით. ამ ტენდენციის ყველაზე თვალსაჩინო მაგალითი ბაზარზე გამოჩენილი ახალი პროფესია – ინფლუენსერობაა, რომელიც მარკეტინგის ერთ-ერთი ყველაზე სწრაფად მზარდ სექტორადაც კი ჩამოყალიბდა. ეს მიმართულება იმდენად მზარდია, რომ ექსპერტების ვარაუდით, მომდევნო წლებში, ინტერნეტის გლობალური ტრაფიკის 80%-ზე მეტი, სწორედ ვიდეო იქნება. 

გამომდინარე იქიდან, რომ სმარტფონი და ინტერნეტზე წვდომა დედამიწის მოსახლეობის უდიდეს ნაწილს აქვს, ვიდეოკონტენტის შექმნა და გავრცელება ბევრი კორპორაციული ბიზნესისა თუ ინფლუენსერის საქმიანობის ქვაკუთხედად იქცა, მაგრამ მზარდი სამომხმარებლო ბაზის მიუხედავად, გამართული ნარატივის მქონე მაღალი ხარისხის ვიდეოკონტენტის ბიუჯეტურად გადაღება ჯერაც გამოწვევად რჩება. ვიდეოკონტენტის შექმნაში, როგორც წესი, ერთდროულად რამდენიმე გასნხავავებული პროფილის ადამიანი არის ჩართული, რაც წარმოების ხარჯებს ზრდის, ხოლო კომპანიებსა და კონტენტ-კრეატორებს პროდუქტის მასშტაბირების საშუალებას არ აძლევს. ამ პრობლემების აღმოფხვრა გენერაციული ხელოვნური ინტელექტის დახმარებით შეიძლება, რაზედაც სლოვენიური Katalist-ი მუშაობს. Katalist-ის გენერაციული ხელოვნური ინტელექტი დამკვეთის დავალებას, ანუ ტექსტს აანალიზებს და მის საფუძველზე ვიდეოებს ქმნის, რაც, როგორც კომპანიაში ამბობენ, წარმოების ხარჯებს ამცირებს, ხოლო პროცესს ოთხჯერ აჩქარებს. 

ახალი თაობის საკომუნიკაციო პლატფორმის შექმნის აუცილებლობა Katalist-ის დამფუძნებლებმა Spotify-ში, Nike-სა და Unilever-ში მუშაობისას აღმოაჩინეს, სადაც იმ AI-მოდელებს ქმნიდნენ, რომლებზეც დღეს ეს ბრენდები დგანან. “ვხედავდით, რომ ვიდეოკონტენტის წარმოებაში უამრავი ხარვეზი იყო, მაგრამ ამ ნაპრალის ამოვსება და ამბის თხრობის იდეით შთაგონებული ნებისმიერი ადამიანისთვის პლატფორმის მიცემა გენერაციულ ხელოვნურ ინტელექტს შეეძლო. Katalist-ი სწორედ ამ მიზანს ემსახურება, რადგან ის, თავისი არსით, საკომუნიკაციო ხელსაწყოა, რომელიც ტექსტს აფერადებს და ვიდეოდ აქცევს”, – ამბობენ კომპანიის დამფუძნებლები, ანდრაზ ზვონარი და ბლაზ ბლოკარი. 

ყველაფერი ეს 2023 წლის მაისში დაიწყო, როცა Katalist-ის კლიენტებს შორის მსოფლიოს ერთ-ერთი უძველესი მარკეტინგული და საკომუნიკაციო სააგენტო, ფრანგული Publicis Groupe-ი გამოჩნდა. ამ პარტნიორობამ სტარტაპს სწრაფი განვითარების საშუალება მისცა და რამდენიმე თვეში, Katalist-მა ინდუსტრიაში AI-პერსონაჟების პირველი ბიბლიოთეკა შექმნა, რომლითაც კლიენტებს მათთვის ნაცნობი პერსონაჟების გამოყენება სხვადასხვა ნარატიული თხრობის დროს შეუძლიათ. მოგვიანებით, Katalist-ის დამფუძნებლებმა პლატფორმა ProductHunt-ზე განათავსეს და გლობალური აღიარება მოიპოვეს. Katalist-ის მომლოდინეთა სიაში, ამ დროისთვის 5,000-ზე მეტი ადამიანი და კომპანია არის რეგისტრირებული, ხოლო სლოვენიური სტარტაპის ხელსაწყოებს 2,000-ზე მეტი მომხმარებელი უკვე იყენებს. 

ისმის კითხვა – რა არის Katalist-ის კონკურენტული უპირატესობა, ანუ რატომ სჯობს სლოვენიური სტარტაპის მიერ შექმნილი მოდელი იმ მოდელებს, რომელსაც, მაგალითად, OpenAI ავითარებს. როგორც კომპანიაში ამბობენ, Katalist-ი ერთადერთი გენერაციული AI-პლატფორმაა ბაზარზე, რომელიც კორპორაციული ვიდეოწარმოებისთვისაა განკუთვნილი. “ჩვენს პლატფორმას ორი უპირატესობა აქვს, ესენია – წარმოების სიჩქარე, რაც ნიშნავს, რომ სრული ვიდეოს გენერირება დამკვეთს ერთ წუთზე ნაკლებ დროში შეუძლია და პროცესზე შემოქმედებითი კონტროლი, რაც სხვა მოდელების შემთხვევაში, შეუძლებელია. გვესმის, რომ ბრენდის მესიჯის გამართულად და სწორად გადმოცემა სკრუპულოზურ მუშაობას მოითხოვს, რის გამოც კომპოზიციის, პერსონაჟების პოზისა თუ კამერის კუთხის არჩევა თავად კომპანიებს შეუძლიათ, თანაც რეალურ დროში”, – ამბობენ Katalist-ში და დასძენენ, რომ კომპანია მომხმარებლებს ანალიტიკურ ხელსაწყოებსაც სთავაზობს, რომელთა დახმარებით კონტენტის ეფექტიანობის გაზომვა არის შესაძლებელი. 

მიმდინარე წელს, Katalist-ი AI-სტუდიის შექმნას აანონსებს. დამფუძნებლების თქმით, კონკრეტული კლიენტები ამ სერვისს უკვე იყენებენ და ისეთ ვიდეოებს ქმნიან, რომლებიც თავს YouTube-ზე იყრის, სადაც რეალური კონტენტისგან მათი გარჩევა, უბრალოდ შეუძლებელია. სამომავლოდ, Katalist-ის დამფუძნებლებს ისეთი სისტემის შექმნაც სურთ, რომელიც ბრენდს გაანალიზებს და მას შემადგენელ ნაწილებად დაშლის, რაც კომპანიებს მრავალჯერადი წარმოების ხარჯებს შეუმცირებს. Katalist-ის მიზანია, ვიდეოკონტენტის და მომავალი საკომუნიკაციო მედიუმების მთავარ პლატფორმად იქცეს, რაშიც სლოვენიურ კომპანიას 500 Global in Eurasia ეხმარება, რომელიც ანდრაზ ზვონარსა და ბლაზ ბლოკარს მენტორების, კურსდამთავრებულებისა და ინვესტორების უზარმაზარ ქსელზე აძლევს წვდომას.  

საქართველოში მსოფლიოს ერთ-ერთი წამყვანი სტარტაპ-აქსელერატორის, კალიფორნიული 500 Global-ის სააქსელერაციო პროგრამა გრძელდება. “საქართველოს ბანკთან” და GITA-სთან პარტნიორობით შექმნილი რეგიონული სააქსელერაციო პროგრამის, 500 Global in Eurasia-ს მეექვსე ნაკადისთვის მენტორებმა ცხრა სტარტაპი შეარჩიეს, რომელთა დასახასიათებლად ყველაზე კარგად, სიტყვა “მრავალფეროვნება” გამოდგება. 500 Global in Eurasia-ს მეექვსე ნაკადის მონაწილე კომპანიები შვიდ სექტორსა და ექვს ქვეყანას წარმოადგენენ და, რაც ყველაზე საინტერესოა, კავკასიისა და ცენტრალური აზიის რეგიონის ქვეყნებთან ერთად, ქართულ სააქსელერაციო პროგრამაში ევროპული სტარტაპებიც მოხვდნენ.

გაიცანით 500 Global in Eurasia-ს მეექვსე ნაკადის სხვა მონაწილეები:

გაიცანით Optimyzee – სტარტაპი, რომელიც კომპანიებს AI-მარკეტინგულ ხელსაწყოებს სთავაზობს;
გაიცანით YAYA – აპლიკაცია, რომელიც ბავშვების აქტივობებს დაგიგეგმავთ;
Helio.AI – ქართული სტარტაპი, რომელიც კომპანიებს თანამშრომელთა შერჩევისთვის AI-თამაშს სთავაზობს;
გაიცანით 500 Global in Eurasia-ს მეექვსე ნაკადის მონაწილე სტარტაპები;
გაიცანით 500 Global in Eurasia-ს მეექვსე ნაკადის მენტორები.

არ გაჩერდე, გააგრძელე კითხვა