რას ისწავლი 500 Georgia-ს აქსელერაციის პროგრამაზე და როგორ დაგეხმარება ეს შენი ბიზნესის განვითარებაში

უკვე მეოთხე წელია, რაც საქართველოს ბანკთან და საქართველოს ინოვაციების და ტექნოლოგიების სააგენტოსთან (GITA) თანამშრომლობით, 500 Global-ის აქსელერაციის პროგრამა საქართველოშიც ხორციელდება. 500 Global-ის აქსელერაციის პროგრამა — 500 Georgia ქართულ სტარტაპებს შესაძლებლობას აძლევს, რომ მსოფლიოში აღიარებული მენტორებისგან თეორიული და პრაქტიკული ცოდნა მიიღონ. 500 Georgia-ს პროგრამა, რომელიც 12-კვირიან ინტენსიურ ტრენინგებსა და პრაქტიკულ სამუშაოს მოიცავს, ქართულ სტარტაპებს იდეების დახვეწაში, განვითარებასა და გლობალურ ტექნოლოგიურ ასპარეზზე საკუთარი შესაძლებლობების აღმოჩენაში ეხმარება.

500 Georgia-ს აქსელერაციის პროგრამის მეექვსე ნაკადში განაცხადების მიღება დაწყებულია და 23 თებერვლამდე გაგრძელდება. თუ ტექნოლოგიური სტარტაპის დამფუძნებელი ხარ და ჯერ ვერ გადაგიწყვეტია, 500 Georgia-ს აქსელერაციის პროგრამაში მონაწილეობის მისაღებად დარეგისტრირდე თუ არა, ამ ბლოგში უფრო დეტალურად გიამბობთ, რის სწავლას შეძლებ წლევანდელ ნაკადში და კონკრეტულად რა ეტაპების გავლა მოგიწევს.

500 Georgia-ს აქსელერაციის პროგრამის 5 ეტაპისგან შედგება: Foundations of Growth, Growth Weeks, Fundraising, Demo Day და International Immersion. ყოველ მათგანს ინდივიდუალური მიდგომები და მიზნები აქვს, რათა სტარტაპებმა ტექნოლოგიურ სფეროში ახალი ცოდნა, უნარები და გამოცდილება შეიძინონ. აი, რას გულისხმობს თითოეული ეტაპი:

Foundations of Growth

Foundations of Growth ეტაპზე მენტორები ორიენტირებულნი არიან, რომ სტარტაპერებს ბიზნეს უნარების გასავითარებლად აუცილებელი ცოდნა და რესურსები მიაწოდონ, რაც მათ პროგრამის ფარგლებშიც და სამომავლოდ თავიანთი ბიზნესის განვითარებაშიც გამოადგებათ. ლექციებისა და ვორკშოპების მეშვეობით, პროგრამის ამ ეტაპზე სტარტაპები სწავლობენ მომხმარებლისთვის საინტერესო შეთავაზების წარდგენას. გარდა ამისა, სტარტაპები სხვადასხვა ინსტრუმენტით მომხმარებელთა საჭიროებების იდენტიფიცირებას ცდილობენ, რათა მათთვის პროდუქციისა თუ სერვისის მიყიდვა უკეთ შეძლონ.

ეს ეტაპი ორი კვირის განმავლობაში გრძელდება და ამ პერიოდში მონაწილეებს შესაძლებლობა აქვთ, ყოველდღიური შეხვედრები გამართონ თავიანთ მენტორებთან და ნებისმიერ საკითხზე მათგან ამომწურავი პროფესიული ინფორმაცია და რჩევები მიიღონ. ასევე, მათთვის ტარდება თემატური ლექციები, სადაც განვითარებისთვის აუცილებელ და საჭირო თემებზე უახლეს ცოდნას უზიარებენ. მაგალითად:

  • რა როლი აქვს კონკრეტულ პროდუქტსა თუ სერვისზე უნიკალურად მორგებულ მარკეტინგს ნებისმიერი ბიზნესის წარმატებაში და როგორ შეიძლება გამოიყენოს ეს შესაძლებლობა, რომ მაქსიმალური სარგებელი მიიღო;
  • როგორ უნდა შექმნა მომხმარებლის პროფილი და რა მნიშვნელობა აქვს მომხმარებლებთან კომუნიკაციის მუდმივ ხასიათს.

ეს მხოლოდ მცირე ნაწილია იმ ცოდნისა, რომელსაც Foundations of Growth ეტაპზე სტარტაპერები იღებენ, რაც ეხმარება მათ, რომ თავიანთი სტრატეგიები დახვეწონ და მომდევნო კვირების განმავლობაში წარმატებული ინიციატივები განახორციელონ.

Growth Weeks

Growth Week 8-კვირიანი მუშაობის პერიოდია, როცა სტარტაპები თეორიულად მიღებული ცოდნის პრაქტიკაში დანერგვას ცდილობენ. სტარტაპერები ცდიან თავიანთ ვარაუდებს და ატარებენ ექსპერიმენტებს, რათა მათი ბიზნესიდეა უფრო მასშტაბური გახადონ. შედეგებსა და ექსპერიმენტებზე დაკვირვებასთან ერთად, სტარტაპები უღრმავდებიან value proposition-ს და მის დახვეწას ცდილობენ, პარალელურად კი ზუსტი სამომხმარებლო სეგმენტის განსაზღვრაზეც მუშაობენ, რათა ზრდისკენ მიმართული სტრატეგიების ჩამოყალიბება შეძლონ.

წინა ნაწილის მსგავსად, პროგრამის ამ ეტაპზეც სტარტაპერებს შესაძლებლობა აქვთ, მიღწეული შედეგები მენტორებთან ყოველკვირეულად განიხილონ, მათგან კი უკუკავშირი და დამატებითი რეკომენდაციები მიიღონ. მენტორების უშუალო ჩართულობით ისინი ყოველდღიურად, ნაბიჯ-ნაბიჯ ხვეწენ თავიანთ პროდუქტს, რაც გარანტირებული განვითარების საყრდენად იქცევა. ამ შრომატევად პროცესში სტარტაპერები მათ საჭიროებებზე მორგებულ ლექციებს ისმენენ: გაყიდვების სისტემის გამართულობაზე, ფანდრაიზინგის სტრატეგიაზე, ფინანსური მოდელირების  საფუძვლებსა და კიდევ მრავალ მსგავს გამოსადეგ საკითხზე.

Fundraising

Fundraising-ის ორკვირიან ეტაპზე სტარტაპერები ფინანსების მოზიდვაზე არიან ორიენტირებულნი, რაც გულისხმობს თანხის მოძიებისთვის სტრატეგიების ჩამოყალიბებასა და ინვესტორების წინაშე წარდგენისთვის მზადებას. ამ პერიოდის განმავლობაში სტარტაპერები სწავლობენ ფინანსური დოკუმენტების ორგანიზებას და ასევე, ფინანსების მოზიდვის ფუნდამენტურ საფუძვლებს ეცნობიან. კერძოდ, სტარტაპერები აქტიურად განიხილავენ თუ რას ეძებენ ინვესტორები და რა სტრატეგიებით დააინტერესებენ მათ. მთელი ეს პროცესი კი ისინი სწავლობენ

  • სკრიპტის და საინვესტიციო პრეზენტაციის მომზადებას;
  • საინვესტიციო Pitch-ის წარდგენას;
  • ფინანსური მოდელირების დამუშავებას;
  • ფინანსური წინადადებების შეფასებას.

ეს ყველაფერი კი სტარტაპერებს დემო დღისთვის ამზადებს.

Demo Day

Demo Day 500 Georgia-ს აქსელერაციის პროგრამის კულმინაციური ეტაპია, სადაც სტარტაპერები მრავალფეროვანი აუდიტორიის წინაშე იმ იდეებს წარადგენენ, რომლებზეც პროგრამის ფარგლებში იმუშავეს. Demo Day თბილისში ჩატარდება, სადაც ინვესტორები და პროგრამის პარტნიორები სტარტაპერების იდეებს მოისმენენ. სწორედ Demo Day აძლევს სტარტაპერებს საშუალებას, რომ თავიანთი წამოწყება როგორც ადგილობრივ, ისე საერთაშორისო ინვესტორებს გააცნონ და გლობალურ ტექნოლოგიურ ასპარეზზე თავი წარმოაჩინონ.

International Immersion

International Immersion პროგრამის მონაწილეებს შესაძლებლობას აძლევს, 2 კვირის განმავლობაში სტარტაპების საერთაშორისო ეკოსისტემის ნაწილი გახდნენ და გლობალურ ტენდენციებს გაეცნონ. International Immersion სტარტაპერების გლობალური ცნობიერების ამაღლებასა და სამომავლოდ მათი ბიზნესების გაფართოებაზეა ორიენტირებული. ამ ეტაპზე 500 Georgia-ს აქსელერაციის პროგრამის მონაწილეებს საშუალება აქვთ, პროგრამის ორგანიზატორებისგან მიიღონ მხარდაჭერა და მითითებები, რომელთა დახმარებითაც სრულიად ახალ ბაზარს შეისწავლიან და აღმოაჩენენ.


ასე რომ, 500 Georgia-ს აქსელერაციის პროგრამის მეექვსე ნაკადის მონაწილეებს საინტერესო გამოწვევები და მრავალფეროვანი გამოცდილების მიღების შესაძლებლობა ელოდებათ. მათ კი, ვინც მონაწილეობის მისაღებად დარეგისტრირება უკვე გადაწყვიტა, 500 Georgia-ს აქსელერაციის პროგრამის ორგანიზატორი, პედრო ვიეირა, შემდეგ რჩევას აძლევს:

“პროგრამის თითოეული ეტაპი ზრდის უნიკალურ შესაძლებლობებს გთავაზობთ, დაწყებული ბიზნესის საფუძვლის მომზადებით და დამთავრებული Demo Day-ზე გამოსვლით. მზად იყავით, რომ ამ გამოცდილებაში სრულიად ჩაერთოთ, მენტორებისა და თანამონაწილეების მიერ გაზიარებული რესურსები და გამოცდილება კი მთლიანად აითვისოთ. მიიღეთ უკუკავშირი, მუდმივად იფიქრეთ თქვენს იდეებზე და აქტიურად ეძებეთ networking-ის შესაძლებლობები. გახსოვდეთ, რომ პროგრამის მიზანი არა მხოლოდ დაფინანსების მოპოვებაა, არამედ მდგრადი და მასშტაბური ბიზნესის მოდელის შექმნაც”, —  აღნიშნავს ლუსია ფორერო

500 Georgia-ს აქსელერაციის პროგრამის მეექვსე ნაკადში განაცხადების მიღება ისევ გრძელდება, აპლიკაციის შევსება კი ამ ბმულზე შეგიძლიათ.

არ გაჩერდე, გააგრძელე კითხვა