საქართველოს ბანკისა და ინოვაციებისა და ტექნოლოგიების სააგენტოს მხარდაჭერით, 500 Georgia უკვე მეხუთედ ტარდება! 500 Global-ის ყოვლისმომცველი აქსელერაციის პროგრამა რეგიონში სულ რამდენიმე სტარტაპს გამოარჩევს და მათ მსოფლიოს წამყვან მენტორებთან აკავშირებს. სწორედ მენტორები უზრუნველყოფენ სტარტაპისა და მისი დამფუძნებლების სწრაფად და სტაბილურად განვითარებას – უზიარებენ მათ სრული პოტენციალის გამოსავლენად საჭირო ცოდნასა და საერთაშორისო გამოცდილებას. 500 Georgia-ს რჩეულებში მოხვედრა იოლი საქმე სულაც არ არის, თუმცა, My AI-ს დამფუძნებლებმა ეს შეძლეს და მეხუთე ნაკადის ათეულში საპატიო ადგილი დაიკავეს.
My AI ავსტრიული ახალბედა კომპანიაა, რომელიც ბრენდებს აძლევს საშუალებას მომხმარებლის ლოიალობა ინოვაციური ფინანსური ინფრასტრუქტურით გაზარდონ. პლატფორმის გამოყენებით, ნებისმიერი ზომის ბრენდს შეუძლია შექმნას ლოიალობის პროგრამის ჯილდოები (ქულები) მომხმარებლებისთვის. ეს ჯილდოები კი ერთ სისტემაში გაერთიანდება და მათი გამოყენება მთელი მსოფლიოს მასშტაბით, სხვადასხვა ლოიალობის პროგრამაში იქნება შესაძლებელი. სისტემას “თავისუფალი ჯილდოები” (Frictionless Open Rewards™) ჰქვია და ბრენდს ეხმარება უფრო მეტი მომხმარებლის შენარჩუნებაში, გაყიდვების სიხშირისა და ტრანზაქციის ფასის გაზრდაში. ეს ყველაფერი კი მხოლოდ ერთი, მარტივი API-ის ინტეგრირებითაა შესაძლებელი.
ერთ ბრენდში მიღებული ჯილდოების მსოფლიოს ნებისმიერ წერტილში გამოყენება და უმალვე გადაცვლა თითქმის დაუჯერებლად კარგად ჟღერს. ასე რომ, სტარტაპის იდეაში უკეთ გარკვევის მიზნით, დამფუძნებელს, რობერტ ვესლის ვესაუბრეთ და My AI-ს ამბიციური გეგმებიც გამოვკითხეთ:
რამ განაპირობა სტარტაპის შექმნა?
უბრალოდ, ვიპოვეთ ლოიალობის პროგრამის სივრცეში ყველაზე დიდი და მოუხელთებელი პრობლემის გადაჭრის გზა – შევძელით, რომ ხალხმა მაშინვე გამოიყენოს ჯილდოები (ქულები), მსოფლიოს ნებისმიერ წერტილში. აღმოვაჩინეთ, რომ შეგვიძლია ლოიალობის სისტემები გავაერთიანოთ: ასე, მაგალითად, მომხმარებელს შეუძლია იყიდოს შარფი თბილისში, გაფრინდეს ნიუ-იორკში და შეძენით დაგროვილი ჯილდოები გამოიყენოს მანჰეტენზე ჩანთის ყიდვაში.
რატომ უნდა ჩაუშვან კომპანიებმა თავიანთი ლოიალობის პროგრამები My AI-ს დახმარებით?
ჩემი აზრით, ჩვენი მთავარი ღირსება ისაა, რომ “ურთიერთოპერირების” პრობლემა უნიკალური plug-and-play ტექნოლოგიის სისტემით გადავწყვიტეთ. ეს სისტემა Me Protocol-ის ინფრასტრუქტურისა და Me Marketplace-ის ირგვლივ გაიმართა. ანუ, პრაქტიკაში, მხოლოდ ერთი API-თ, მსოფლიოს ნებისმიერ ბრენდს, ნებისმიერ წერტილში შეუძლია მისცეს მომხმარებელს დაგროვილი ქულების ყველა სხვა დაკავშირებულ ბრენდში გამოყენების შესაძლებლობა. Me Marketplace-ის მეშვეობით, ბრენდები სწრაფად და მოსახერხებლად აკავშირებენ მომხმარებელს მსოფლიოს იმ პროდუქტებთან, რომელთა მიღებაც თავიანთი დაგროვილი ჯილდოებით შეუძლიათ. პროცესი მარტივია, თუმცა ძალიან მიმზიდველი – ბრენდებს კი ეს მოსწონთ.
Რა გზა გამოიარეთ 500 Georgia-მდე და რამ გადაგაწყვეტინათ აპლიკაციის ფორმის შევსება?
გამართული, ადვილად გამოსაყენებელი და თანაც გლობალური ინფრასტრუქტურის შექმნა პატარა საქმე არ გახლავთ. ამიტომ, გასული წელი მთლიანად დავუთმეთ ურთიერთოპერირების ყველაზე რთული პრობლემების მოგვარებას, მათ შორის deep tech განვითარებასა და მომხმარებელთა გამოცდილების გადააზრებას. გვჯერა, რომ დიდი წარმატების საწინდარი დიდი თანამშრომლობებია – ამიტომ, შთაგვაგონა იმის წარმოდგენამაც კი, თუ რისი გაკეთება შეეძლო საქართველოს ბანკისა და 500 Global-ის კომბინაციას ჩვენი სტრატეგიისთვის. პირველ რიგში, ეს დაგვეხმარებოდა ადგილობრივი და რეგიონული ბრენდების ჯილდოების სისტემაში ჩასართავად.
რას გეგმავს My AI უახლოეს მომავალში?
გვიხარია, რომ პროგრამის ფარგლებში Me Marketplace-ს ჩავუშვებთ, რომელიც იმ პირველ ქართულ ბრენდებს აღმოაჩენს, რომლებიც გლობალურ ჯილდოებს გამოიყენებენ. გარდა ამისა, მოუთმენლად ველით საქართველოს ბანკთან თანამშრომლობას, რადგან ვფიქრობთ, რომ უახლეს ჯილდო-სისტემასთან წვდომით ბანკის მომხმარებლების გამოცდილებებსაც გავაუმჯობესებთ. ვიმედოვნებთ, რომ საქართველოში დაგროვილი გამოცდილება ევროპასა და ამერიკის შეერთებულ შტატებში მსგავსი ინიციატივების წამოწყებაში გამოგვადგება, რითაც კიდევ უფრო მეტს შევძენთ ჩვენს ქართველ პარტნიორებს.