ცოტა ხნის წინ 500 Global-მა საქართველოში სტარტაპების აქსელერაციის პროგრამის — 500 Global in Eurasia-ს — მეექვსე ნაკადის მონაწილეების გადამზადება დაიწყო. უკვე მეოთხე წელია, რაც 500 Global საქართველოს ბანკთან და საქართველოს ინოვაციების და ტექნოლოგიების სააგენტოსთან (GITA) თანამშრომლობით, წელიწადში ორჯერ საქართველოში 500 Global in Eurasia-ს აქსელერაციის პროგრამას ახორციელებს. აქსელერაციის პროგრამა სტარტაპერებს შესაძლებლობას აძლევს, მსოფლიო დონის ექსპერტების მენტორობით ბიზნესის განვითარებისთვის საჭირო უნარები შეიძინონ. მეექვსე ნაკადში 9 სტარტაპი მონაწილებს, რომელთა შესახებ დეტალური ინფორმაცია ჩვენს ბლოგში შეგიძლიათ გაიგოთ.
500 Global in Eurasia-ს აქსელერაციის პროგრამა 5 ნაწილისგან (Foundations of Growth, Growth Weeks, Fundraising, Demo Day და International Immersion) შედგება, თითოეული კი მენტორებთან აქტიურ კომუნიკაციას ითვალისწინებს. 500 Global in Eurasia-ს მეექვსე ნაკადის ერთ-ერთი მენტორი ტიმურ დაუდპოტაა, რომელიც თავისი გამოცდილების, მიდგომებისა და პროგრამის მნიშვნელობის შესახებ ვრცლად გვესაუბრა.
500 Global-ის სტარტაპერობიდან მენტორობამდე
ტიმურ დაუდპოტა სტარტაპის დამფუძნებელი და 500 Global-ის ერთ-ერთი ნაკადის მონაწილეა. მიღებული ცოდნისა და გამოცდილების მეშვეობით კი, ტიმური მოგვიანებით აქსელერაციის პროგრამის მენტორი თავად გახდა. წლების განმავლობაში ტიმური ისეთ ცნობილ ბრენდებთან თანამშრომლობდა, როგორებიცაა Coca-Cola, Burger King, Disney და Invisalign. ასევე, ტიმური მუშაობა მსოფლიოს უმსხვილეს გამომცემლებთან, რომელთა შორისაა Time Inc, GQ, TechCrunch, Vogue და სხვა. ტემურის თქმით, კარიერის განმავლობაში 2000-ზე მეტ სტარტთან უმუშავია, დღეს კი თავის ცოდნას პროგრამის მონაწილეებს უზიარებს.
3 რჩევა სტარტაპერებს მენტორისგან
500 Global in Eurasia-ს თითოეულ მენტორს პროგრამის მონაწილე სტარტაპერებთან ინდივიდუალური მიდგომა და მეთოდოლოგია აქვს. ტიმურისთვის კი ეს მიდგომა მხარდაჭერასთან ერთად სტრატეგიულ ხელმძღვანელობას გულისხმობს.
“მენტორობისას მთავარ აქცენტს ვაკეთებ იმაზე, რომ სტარტაპერებს თავიანთი ბიზნესის ყველაზე გავლენიანი სფეროების იდენტიფიცირებასა და პრიორიტეტების დადგენაში დავეხმარო, რაც მოიცავს პერიოდს მომხმარებლის მოზიდვიდან პროდუქტის შემუშავებამდე და მასშტაბურ ოპერაციებამდე. აი, 3 რამ, რასაც სტარტაპერებმა ყურადღება უნდა მიაქციონ:
- მომხმარებელზე ორიენტირება: ყოველთვის მიანიჭეთ პრიორიტეტი მომხმარებლის საჭიროებების გაგებასა და მათზე მორგებას. ეს ნებისმიერი წარმატებული სტარტაპის ქვაკუთხედია
- სისწრაფე და ადაპტაცია: ბაზრის ცვლილებებთან და უკუკავშირთან შეგუებისა და ადაპტაციის უნარს გადამწყვეტი მნიშვნელობა აქვს.
- მონაცემებზე დაფუძნებული გადაწყვეტილებები: გამოიყენეთ მონაცემები ინფორმირებული გადაწყვეტილებების მისაღებად, შეაფასეთ ინტენსიურობა და შეიმუშავეთ სტრატეგია.
საწყის ეტაპზე სტარტაპერები ხშირად აწყდებიან ისეთ პრობლემებს, როგორებიცაა შეზღუდული რესურსები, პროდუქტის ბაზართან შესაბამისობის პოვნა და მასშტაბებთან დაკავშირებული გამოწვევები. ამიტომ, სტარტაპერებთან მუშაობისას ვფოკუსირდები ისეთ მეთოდოლოგიებზე, რომლებიც მათ ეხმარებათ, ბაზარზე გასვლის ეფექტური სტრატეგია შეიმუშაონ და რესურსების ეფექტურად გამოყენებით ოპერაციების ოპტიმიზაცია და მასშტაბირება შეძლონ”, —ამბობს ტიმურ დაუდპოტა.
500 Global in Eurasia-ში მონაწილეობის მნიშვნელობა
500 Global in Eurasia-ს მონაწილე სტარტაპებს გარდა ტექნოლოგიურ სფეროში ახალი ცოდნის, უნარების და გამოცდილების შეძენისა, შესაძლებლობა აქვთ როგორც ადგილობრივ, ისე საერთაშორისო ინვესტორებს გაეცნონ. ასევე, შეხვდნენ სხვა წარმატებულ სტარტაპერებს და მათი გამოცდილება გაიზიარონ. ტიმურის აზრით, 500 პროგრამაში მონაწილეობა თითოეული სტარტაპერისთვის networking-ის ფართო შესაძლებლობებს ქმნის, რაც ნებისმიერი დამწყები ბიზნესისთვის ფასდაუდებელი გამოცდილებაა.
“500 Global in Eurasia-ს აქსელერაციის პროგრამა სტრუქტურული მხარდაჭერით, ექსპერტების ხელმძღვანელობითა და პოტენციური ინვესტორების ფართო ქსელზე წვდომით სტარტაპების ზრდაზე დიდ გავლენას ახდენს. ეს გარემო სტარტაპების სწრაფ განვითარებასა და ზრდას უწყობს ხელს. 500 Global in Eurasia-ს მონაწილეებს გირჩევთ, ამ მოგზაურობის დროს გამოირჩეოდეთ სიმტკიცითა და გახსნილობით. გამოიყენეთ ყველა რესურსი, რომელსაც პროგრამა გთავაზობთ და აქტიურად ითანამშრომლეთ მენტორებთან და სხვა ხელმძღვანელებთან. გახსოვდეთ, რომ ამ პროგრამის დროს თქვენი ზრდა არა მხოლოდ თქვენი სტარტაპის ტრაექტორიას განსაზღვრავს, არამედ თქვენს, როგორც ლიდერის, ევოლუციასაც”, — დასძინა ტიმურ დაუდპოტამ.
500 Global in Eurasia-ს ფარგლებში უკვე 50-ზე მეტმა სტარტაპმა გაიარა 12-კვირიანი ინტენსიური გადამზადების პროგრამა, ახლა კი აქსელერაციის პროგრამის მეექვსე ნაკადის გადამზადება მიმდინარეობს, რომელიც Demo Day-ით დასრულდება. მომდევნო ნაკადზე კი ბიზნესის განვითარებისა და ზრდის შესაძლებლობა სხვა სტარტაპებსაც მიეცემათ.