გვინდა გაგაცნოთ აქსელერაციის მონაწილე სტარტაპი – Extra.ge
დღეს მომხმარებელი პროდუქტისა და სერვისის გარდა, ყველაზე დიდ ყურადღებას გამოცდილებას, ანუ ე.წ „Experience”-ს აქცევს. 21-ე საკუნის მეორე დეკადას შეგვიძლია სხვა დანარჩენთან ერთად, „გაციფრულების პერიოდიც“ ვუწოდოთ, შესაბამისად ცვლილებები ამ მიმართულებთაც აქტიურად მიმდინარეობს, მათ შორის საქართველოშიც.
სავაჭრო მოლში, სხვადასხვა მაღაზიაში სიარული ზოგიერთი მომხმარებლისთვის ყველაზე სასიამოვნო პროცესია. Amazon, 6pm და მსგავსი პლატფომრები მომხმარებლებს საერთო მაღაზიის კონცეფციით ემსახურებიან, Extra.ge-მ კი გადაწყვიტა მათთვის ნაცნობი გარემო და შოპინგის უკვე მრავალჯერ ნაცადი გზა შეეთავაზებინა. სახელი გაამართლეს და ვებ-გვერდი ბაზარზე წელიწადის ექსტრა დღეს, 29 თებერვალს ჩაუშვეს.
ვებ-გვერდთან ერთად უკვე მობილური აპლიკაციით 320-ზე მეტ მაღაზიას აერთიანებენ და 170 000-მდე დარეგისტრირებული მომხმარებელი ჰყავთ.
„გვინდოდა სავაჭრო მოლში ან ბაზრობაზე შოპინგის გამოცდილება გაგვეციფრულებინა. როდესაც რაიმე ნივთის ყიდვა გვსურს, 3-4 მაღაზიას ვარჩევთ სადაც შევდივართ, აქამდე ასეთი ონლაინ სივრცე არ არსებობდა, ყველა პროდუქტს ერთ სივრცეში ათავსებდნენ და არ იცოდი მისი წარმომავლობა. ჯერ-ჯერობით საცდელ ვერსიაზე ვმუშაობთ, ჩვენი ვარაუდით, დაახლოებით 1 წელიწადში შევძლებთ ყველაფრის სრულად ამუშავებას. გვსურს, ვენდორებსაც მაქსიმალურად მივცეთ სხვადასხვა შესაძლებლობა, რათა პროდუქციის რეალიზება უკეთ მოახდინონ. გვინდა Amazon-ისა და Ebay-ს გამოცდილება გადმოვიტანოთ საქართველოში, თუმცა ამ პროცესს უამრავი გამოწვევა ახლავს თან.“ – ამბობს კომპანიის აღმასრულებელი დირექტორი თამარ ბუაძე.
განსხვავებულია მათი ოპერაციების მართვის სტილიც. Extra.ge-მ უარი თქვა საერთო საწყობზე, სადაც მისი პროდუქტები განთავსდებოდა. თუ შეკვეთა სხვადასხვა მაღაზიიდან მოდის, კურიერი მათ ე.წ „Collection Space”-ში უყრის თავს, ვერიფიკაციის გავლის შემდეგ კი მომხმარებელი საკუთარ შეკვეთას ადგილზე იღებს. თამარ ბუაძის თქმით, ეს გადაწყვეტილება დაკვირვების შედეგად მიიღეს.
რაც შეეხება ასორტიმენტს, როგორც გენერალური დირექტორი გვიყვება, ძირითადი მოთხოვნა საყოფაცხოვრებო ტექნიკაზეა, რაც ბაზრის სპეციფიკიდან გამომდინარეობს, თუმცა გარკვეული პერიოდის შემდეგ ყველა მიმართულების აქტიურად გაზრდას ელიან.
როდესაც მიზნებზე ვკითხეთ, ასეთი პასუხი მივიღეთ : „თუ მომავალში რაიმე ნივთს Extra.ge-ზე ვერ ნახავთ, ე.ი ის საქართველოში საერთოდ არ იყიდება. ვაპირებთ ექსტრა მოლისა და ექსტრა ბაზრის კონცეფციის განვითარებას, რომელიც ახლა ჩანასახის ეტაპზეა. მომხმარებელი შეძლებს როგორც ახალი, ისე მეორადი ნივთის შეძენას, განცხადების დამატებას კი ფიზიკური პირებიც თავისუფლად შეძლებენ.“
B2B, B2C, C2C – ყველანაირი ბიზნეს ურთიერთობა ერთ სივრცეში მოიყრის თავს და ამაში ადამიანებს Extra.ge დაეხმარება. ახალ ეტაპზე გადასვლა 500 Startup-ის აქსელერატორში მოხვედრით დაგვირგვინდა. როგორც თამარი გვიყვება, კომპეტენტური მენტორების მხრიდან რჩევების მოსმენა ფასდაუდებელი იქნება ქართული ბაზრის მოთამაშეებისთვის. მისი თქმით, ელ.ვაჭრობის წარმომადგენლები სპეციფიურ გამოწვევებს აწყდებიან და „საქართველოს ბანკისა“ და 500 Startup-ის ერთობლივი პროგრამა პროდუქტის დახვეწაში დიდ როლს ითამაშებს.
„უამრავი კითხვა გვაქვს, რომელზე პასუხის გაცემაც 500 Startup-ის მენტორებს შეუძლიათ, გვსურს კავკასიის რეგიონში გაფართოება და საერთაშორისო ბაზრებზე გასვლა. ძალიან კარგია, რომ „საქართველოს ბანკის“ დახმარებით ამ მასშტაბების აქსელერატორი შემოვიდა ჩვენს ქვეყანაში. ცოდნის, გამოცდილების, ორგანიზაციული კულტურის გაზიარება მსოფლიო რუკაზე უკეთესად პოზიციონირებაში დაგვეხმარება“ – გვიყვება თამარი.