აპლიკაცია „აგრონავტი“, რომელიც 500 Startups-ის აქსელერაციის მეორე ნაკადში მოხვდა.
საქართველოს ბანკის მხარდაჭერით და ინოვაციებისა და ტექნოლოგიების სააგენტოს ინიციატივით, მსოფლიოში წამყვანი გლობალური აქსელერატორი 500 Startups-ი აქსელერაციის პროგრამას აგრძელებს. პროექტი რეგიონის მასშტაბით ხორციელდება, მონაწილე კომპანიებს შორის კი წარმოდგენილი არიან როგორც ქართული, ასევე უცხოური კომპანიები, რომლებიც ქართულ კომპანიებად დარეგისტრირდებიან და გახდებიან ქათული ეკო სისტემის წევრები. ამჟამად აქსელერაციის პროგრამის მეორე ნაკადი დაიწყო, სადაც 15 კომპანიაა ჩართული. ესენია: Activechat, Agrolabs, Argonavti, Arealy, B2C.GE, Citycom, Corebook, Extra.ge, Kernel, Kvalifika, My Nanny, PAYZE, Simpolium, Trice, YouTravel.me,
პროექტის მთავარი მიზანი საქართველოს სტარტაპ ეკოსისტემის გაძლიერება, საინვესტიციო პოტენციალის განვითარება და სტარტაპ კომპანიების გლობალურ ბაზარზე მასშტაბირებაა. აქსელერაციის პროგრამის პირველ ნაკადში 15 სტარტაპმა მიიღო მონაწილეობა, მათ მიერ მოზიდული ინვესტიციების მოცულობა კი 5 მლნ აშშ დოლარს აღემატება. პირველი ნაკადის ორი გამარჯვებული სტარტაპი, Cardeal და Cargon, 2021 წლის გაზაფხულზე სილიკონ ველიზე გაემგზავრება, სადაც 500 Startups-ის ერთთვიან პროგრამაში მიიღებს მონაწილეობას.
ახლა კი მოგიყვებით მობილურ აპლიკაციაზე, რომელიც ფერმერთა მიერ წარმოებული პროდუქციის რეალიზაციის ხელშეწყობის მიზნით შეიქმნა.
თუ სტატისტიკას დავუჯერებთ, საქართველოს მოსახლეობის თითქმის ნახევარი სოფლად ცხოვრობს (წყარო – საქსტატი. თუმცა, დარგისთვის თანამედროვე ტექნოლოგიების ათვისება და მნიშვნელოვანი ინფორმაციის ერთ სივრცეში მოთავსება დღემდე პრობლემად რჩება. ტრადიციებისა და კულტურის გათვალისწინებით, საქართველოში სოფლის მეურნეობა ყოველთვის პოპულარული დარგი იყო, თუმცა 21-ე საუკუნემ ფერმერები ახალი გამოწვევების წინაშე დააყენა. „აგრონავტი“ სწორედ ერთი ფანჯრის პრინციპით მოქმედი აპლიკაციაა, რომელიც ყველა საჭირო ინფორმაციას უყრის თავს და სოფლის მეურნეობაში ახალგაზრდების ჩართულობას ისახავს მიზნად.
მისი მეშვეობით შესაძლებელია სახლიდან გაუსვლელად პროდუქტის რეალიზაცია, მომხმარებელს აგრონავტის საშუალებით წვდომა აქვს ადგილობრივ და საერთაშორისო გამოფენებზე, აგრო კანონმდებლობაზე, შეუძლია მარტივად მართოს ფერმერული მეურნეობა მეცხოველეობის კუთხით, შეადგინოს დღის გეგმა-რაციონი, ჰქონდეს და გაეცნოს სრულ ინფორმაციას როგორც ტექსტური ისე ვიდეო მასალების სახით, თამაშით ისწავლოს სოფლის მეურნეობა და ა.შ.
„პირველი იდეა გაჩნდა მაშინ, როდესაც “ფერმერთა ასოციაციაში” დავიწყეთ იმაზე ფიქრი, თუ როგორ შეიძლებოდა გაგვეზარდა ახალგაზრდების ჩართულობა ციფრულ სამყაროში და რა იქნებოდა მათთვის მიმზიდველი. აპლიკაცია მათ მიაწვდიდა ბიზნესის დაგეგმვისთვის მომგებიან ინფორმაციას და გააჩენდა განცდას, რომ სოფლის მეურნეობა არც ერთ სხვა სექტორს განვითარებით არ ჩამოუვარდება. ჩემი კარიერა სოფლის მეურნეობაში დაახლოებით 10 წელს ითვლის, პირველად ბიზნეს იდეა USAID-ს წარვუდგინეთ და დღემდე „აგრონავტი“ სოციალური პროექტი იყო. აშკარად ჩანდა მისი პოტენციალი, არ დავჯერდით მიღწეულს და ჩატარებულმა კვლევამაც გვაჩვენა, რომ საერთაშორისო ბაზარზე ანალოგი არ მოიძებნებოდა.“ – გვიყვება ნინო ზამბახიძე.
„აგრონავტის“ გუნდს სჯერა, რომ ტექნოლოგიების დახმარებით, საქართველოს შანსი აქვს სერვისის ექსპორტიორი გახდეს. აპლიკაციას ბევრი ფუნქცია აქვს, მათ შორის პროდუქტის რეალიზაციის შესაძლებლობა და მომგებიანი აგრობიზნესისთვის საჭირო ინფორმაციის მოგროვება რეალისტური პროგნოზების ანალიზის საფუძველზე. მომავალში ხელოვნური ინტელექტის ინტეგრაციაც იგეგმება, რაც მიწის ანალიზის, ამინდის პროგნოზის, ფერმის ბიუჯეტის გამოთვლის შესაძლებლობას იძლევა. ამჟამად USAID-ისა და GITA-ს დახმარებით 250 000 ლარის ინვესტიციაა უკვე მოზიდული, შემდეგი ეტაპი კი 500 Startups-ის აქსელერაციის პროგრამაა.
„პირველი რასაც 500 Startups-იდან ველით, არის არამხოლოდ ფინანსური მხარდაჭერა, არამედ ის ცოდნა რომელიც დღეს რთულად შესაძენია. გვინდა სტარტაპი ინვესტორებისთვის მიმზიდველი გავხადოთ და საერთაშორისო ბაზარზე გავიდეთ. ვფიქრობთ, რომ “საქართველოს ბანკის” პარტნიორობა აქსელერატორთან მნიშვნელოვანი და წინგადადგმული ნაბიჯია. ფინანსურმა ინსტიტუტმა კარგად დაინახა მცირე და საშუალო ბიზნესის საჭიროება, რაც ქვეყნის ეკონომიკის განვითარებისთვის უმნიშვნელოვანესია. საბანკო სექტორის მხრიდან ჩართულობა ზრდის კომპანიის პასუხისმგებლობას, ეს ნიშნავს რომ გენდობიან, ცდილობენ მოტივაციის ამაღლებას, საინვესტიციო პოტენციალის გაზრდას და შესაბამისად, კომპანიისგან ელიან მაქსიმალურ ჩართულობას, შედეგების მაქსიმიზაციას. ჩვენ ვფიქრობთ, რომ „საქართველოს ბანკის“ ეს წამოწყება რადიკალურად შეცვლის ხედვებს, ახალგარზდების მოტივაციას, უფრო მეტი ადამიანი დაინტერესდება თანამედროვე ტექნოლოგიებით. გაჩნდება ქვეყანაში დარჩენის და ბიზნესის საქართველოში კეთების საფუძველი“ – გვიყვება დამფუძნებელი.