საქართველოში აქამდე არასდროს გამართულა ისეთი პრესტიჟული სპორტული ტურნირი, როგორიც ევროპის ახალგაზრდული ჩემპიონატია ფეხბურთში. ისტორიაში პირველად ვართ ამ დონის ტურნირის თანამასპინძლები და სწორედ მასპინძლის სტატუსის გამო საქართველოს U21 ნაკრები ისტორიაში პირველად მოხვდა ფინალურ ეტაპზეც. უნიკალური შესაძლებლობა მივიღეთ და ლამის ყველასთვის მოულოდნელი წარმატებით გამოვიყენეთ კიდეც ეს შანსი.
რამაზ სვანაძის გუნდი ძალიან რთულ და კონკურენტულ ჯგუფში მოხვდა – პორტუგალია, ნიდერლანდები და ბელგია. ურთულესი მისია გვქონდა, თუმცა აქაც მასპინძლობის უპირატესობა და ერთგული ქომაგებით ლამის გადავსებული დინამო არენა გვიმაგრებდა ზურგს.
ყველაფერი ზღაპრულად დაიწყო:
საქართველო V პორტუგალია 2-0
ეს იყო საქართველოს ახალგაზრდული ნაკრების ისტორიაში სადებიუტო მატჩი ტურნირზე ძალიან გამოცდილ, წინა ევროპის ჩემპიონატის ვერცხლის პრიზიორ, ნამდვილ საფეხბურთო ბრენდთან, პორტუგალიის U21 ნაკრებთან. არასდროს დაგვავიწყდება ჩვენი სადებიუტო გოლიც, როცა გიორგი გაგუამ ფიზიკურ ორთაბრძოლაში დაჯაბნა მეტოქე და კლასიკური ფორვარდული გოლი შეაგდო.
პირველივე შეხვედრაში გამოჩნდა სვანაძის ტაქტიკა და ჩანაფიქრი – 5-4-1 უცვლელად ტურნირის ბოლომდე. ამავე შეხვედრაში დაგვაიმედა სისტემურად გამართულმა და მაღალორგანიზებულმა დაცვითმა ტრიომ – საზონოვი – გელაშვილი – კალანდაძე, რომელთაც თვალსაჩინოდ გამორჩეული თამაში ჰქონდათ და სწორედ ამიტომ, ძალიან დიდი ალბათობით, ამ ზაფხულშივე გაუმჯობესდება მათი საკლუბო კარიერაც. პორტუგალიასთან დაპირისპირების მეორე ნახევარში მოედანზე გამოჩნდნენ ეროვნული ნაკრების გლაზგოდან ახალჩამოსული წევრები – ირაკლი აზაროვი, გიორგი გოჩოლეიშვილი და ზურიკო დავითაშვილი, წმინდა საფეხბურთო გაძლიერების გარდა, ეს იყო სიმბოლური დატვირთვის მქონე ამბავი საქართველოსთვის გაერთიანებული ახალგაზრდა ადამიანების მონაწილეობით.
ზღაპრულად დაწყებული ტურნირი მსგავსად გაგრძელდა:
საქართველო V ბელგია 2-2
ჯგუფური ეტაპის მეორე თამაში, რომელშიც ბელგიის U21 ნაკრები ძლიერი შემადგენლობით მატჩის უდავო ფავორიტად ითვლებოდა და ეს სტატუსი მათ პირველ ტაიმში გაამართლეს კიდეც, როცა 2 უპასუხო გოლი გაგვიტანეს. ტაქტიკა აქაც იდენტური იყო, თუმცა ეროვნული ნაკრებიდან ჩამოსული გიორგი მამარდაშვილი, ირაკლი აზაროვი, ლუკა გაგნიძე და ზურიკო დავითაშვილი იყვნენ ამჯერად სასტარტოში. უმძიმესი პირველი ტაიმის შემდეგ რამაზ სვანაძის აქტიური ჩარევა თამაშში, რამდენიმე ცვლილება (გოჩოლეიშვილი, წიტაიშვილი, ნ. გაგნიძე და გულიაშვილი მოედანზე) და სასწაული! ჯერ გიორგი წიტაიშვილის ულამაზესი გოლი, მერე კი ბოლო წუთებზე გიორგი გულიაშვილის თავური – ასე და ამგვარად 2-2 და მეორე ტურის შემდეგ ურთულესი ჯგუფის ლიდერი საქართველოს U21 ნაკრები გახდა.
ჯგუფური ეტაპის ბოლო და ყველაზე მნიშვნელოვანი შეხვედრა:
საქართველო V ნიდერლანდები 1-1
ალბათ, ყველაზე ვარსკვლავური შემადგენლობა ჰყავდა ჩვენს ჯგუფში ნიდერლანდებს – აიაქსისა და ფეინოორდის წამყვანი მოთამაშეები, ერედივიზიონის ამომავალი ვარსკვლავები, რომელთა მიზანი მხოლოდ და მხოლოდ გამარჯვება იყო: მათ ჩვენი დამარცხების შემთხვევაში ექნებოდათ ჯგუფიდან გასვლის შანსი. მათ გეგმები საქართველოს U21 და ეროვნული ნაკრების ერთ-ერთმა ლიდერმა, ზურიკო დავითაშვილმა აურია, როცა ერთდროულად 6 ფეხბურთელს შორის გაძვრა და ტურნირის ერთ-ერთი საუკეთესო (თუ საუკეთესო არა) გოლი შეაგდო! მართალია, ნიდერლანდელებმა მალევე მოახერხეს გათანაბრება, თუმცა ეს იყო და ეს. მთელი თამაშის განმავლობაში ჩვენ მხარეს იყო იღბალი, საზონოვი – გელაშვილი – კალანდაძე და მამარდა! პარალელურ შეხვედრაში პორტუგალიამ ბელგიას მოუგო, საბოლოოდ სწორედ ჩვენ და პორტუგალია გავედით ჯგუფიდან; ჩვენ – 5 ქულითა და პირველი ადგილით!
ცოტა ხნის წინ, ალბათ, მართლა დაუჯერებელი იქნებოდა ამის გაგება, თუმცა საქართველოს U21 ნაკრებმა ევროპის ჩემპიონატის მეოთხედფინალში ითამაშა:
საქართველო V ისრაელი 0-0 (პენალტების სერია 3-4)
ცივ გონებაზე შედარებით უფრო ადვილია ამ თამაშის და, ზოგადად, ამ მოვლენის შეფასება: უმძიმესი და ძალიან დაძაბული 90-წუთიანი ბრძოლა, რომელიც უგოლოდ დასრულდა; ჩვენ გვქონდა ბევრი ნახევრად მომენტი, მეტოქეს კი რამდენიმე რეალური საგოლე შანსი, თუმცა შეუდარებელი და შეუცდომელი იყო მამარდა. გარდამავალი უპირატესობით მივაღწიეთ საფეხბურთო ლატარიამდე, პენალტების სერიამდე, რომელშიც ისრაელის U21 ნაკრებს გმირად მოევლინა მეკარე, დანიელ პერეცი. დავმარცხდით, თუმცა ძალიან ღირსეულად, როგორც ჩვენი მთავარი მწვრთნელი, ფეხბურთელები და 44 338 გულშემატკივარი სტადიონზე (ტურნირის ისტორიაში რეკორდული რაოდენობა) ერთხმად ვამბობდით: თავი მაღლა!
ეს მხოლოდ დასაწყისია
ორკვირიანი საფეხბურთო ზღაპარი, ჩვენთვის სამწუხაროდ, ~ მეოთხედფინალურ სტადიაზე დასრულდა – ეს იყო შესანიშნავი გამოცდილება ქართული ფეხბურთისთვის და მთლიანად ქვეყნისთვის. თითქოს ერთიორად გაიზარდა გულშემატკივარი და გულშემატკივრის რწმენა, რომ მომავალში ამ და მსგავს ტურნირებზე თამაში ყოველდღიურ რეალობად გვექცევა.
აქამდეც ვიცოდით ჩვენც და იცოდნენ ევროპული კლუბების სკაუტებმა, თუ რას წარმოადგენდა ზურიკო დავითაშვილი და გიორგი მამარდაშვილი; გამყარდა და გამართლდა მოლოდინები სრულიად თანამედროვე ფლანგის მცველების, ირაკლი აზაროვისა და გიორგი გოჩოლეიშვილის საფეხბურთო ნიჭის მიმართ; დარწმუნებით შეგვიძლია იმის თქმა, რომ საბა საზონოვი და გიორგი წიტაიშვილი უკეთეს კლუბებში გააგრძელებენ სულ მალე თამაშს; იმავეს თქმა შეიძლება აბსოლუტურად ყველა მოთამაშეზე – უამრავი სკაუტისა და აგენტის ყურადღების ცენტრში მოექცნენ ჩვენი ფეხბურთელები, რამდენიმე საფეხბურთო ჭორი აქა-იქ უკვე გაისმა კიდეც და უფრო შესანიშნავ ამბებს გავიგებთ უახლოეს მომავალში.
საქართველოს U21 ნაკრები მაგალითია იმისა, თუ რა შედეგი მოაქვს ორგანიზებულ და გამართულ სისტემას, მწვრთნელებსა და ფეხბურთელებს შორის სწორ კომუნიკაციას, ტაქტიკურად სრულიად გააზრებულ თანამედროვე ფეხბურთს და, რაც მთავარია, ევროპულ პროფესიონალიზმს.
ეს მხოლოდ დასაწყისია, რადგან გვჯერა, რომ ქართული ფეხბურთის შესაძლებლობები უსაზღვროა.
ავტორი: გიორგი ყორღანაშვილი