ევროპის კონტინენტის მთავარი საკალათბურთო ტურნირის, ევრობასკეტის საკვალიფიკაციო ეტაპი გადამწყვეტ ფაზაში შედის – G ჯგუფის წევრი საქართველოს ეროვნული საკალათბურთო ნაკრები ორ უმნიშვნელოვანეს შეხვედრას გამართავს ჯერ 21 თებერვალს თბილისში დანიის, 24 თებერვალს კი გასვლაზე სერბეთის ნაკრების წინააღმდეგ.
სერბმა სპეციალისტმა, ალექსანდრ ჯიკიჩმა 10 თებერვალს სუპერლიგის 12 მოთამაშე შეკრიბა და თბილისი არენაზე ავარჯიშა, რომელთაგან გენერალური შეკრებისთვის 8 კალათბურთელი შეარჩია. გენერალურმა შეკრებამ 18 თებერვალს აიღო სტარტი და ადგილობრივ მოთამაშეებს ლეგიონერებიც შეუერთდნენ – ასეთია რჩეული 15-ეული:
რატი ანდრონიკაშვილი (ობრადოირო, ესპანეთი), კამარ ბოლდუინი (ბასკონია, ესპანეთი), მათე ხატიაშვილი (ბასკონიაU18, ესპანეთი), ლუკა ლიკლიკაძე (ორბი), გიორგი ოჩხიკიძე (ქუთაისი), ლუკა მაზიაშვილი (ამრა გაგრა), კახა ჯინჭარაძე (ამრა გაგრა), დუდა სანაძე (ესპეროსი, საბერძნეთი), სანდრო სანაძე (ზესტაფონი), ალექსანდრე ფევაძე (თსუ), ბექა ბურჯანაძე (კორუნა, ესპანეთი), თორნიკე შენგელია (ვირტუსი, იტალია), გიორგი შერმადინი (ტენერიფე, ესპანეთი), ილია ლონდარიძე (ბათუმი), გიორგი კორსანტია (ქუთაისი).
რაც შეეხება დანიის საკალათბურთო ნაკრებს, ალან ფოსის გაწვრთნილი გუნდი ჩვენ წინააღმდეგ უძლიერესი შემადგენლობით ითამაშებს – მათ რიგებში იქნება ევროლიგის ორივე ვარსკვლავი: პარტიზანის უკანახაზელი, იფე ლუნდგერგი და მილანის მსუბუქი ფორვარდი, შევოლ შილდსი.
🏀საქართველო VS დანია – 21 თებერვალი, 21:00 საათი;
🏀სერბეთი VS საქართველო – 24 თებერვალი, 23:00 საათი.
სერბეთი 4 მოგებითა და არცერთი წაგებით G ჯგუფის ერთპიროვნული ლიდერია; ევრობასკეტის თანამასპინძლის სტატუსის გამო მშვიდადაა ჯგუფის კიდევ ერთი წევრი, ფინეთის ნაკრებიც, რომელიც ისედაც ითამაშებს ტურნირის ფინალურეტაპზე. დარჩა საქართველო (2 მოგება; 2 წაგება) და დანია (1 მოგება; 3 წაგება) –ჩვენს ნაკრებს დანიასთან ნებისმიერი ანგარიშით მოგება ჰყოფნის, რომ გაინაღდოს ზედიზედ მეექვსედ ევრობასკეტის საგზური. შესაბამისად, 21 თებერვლის თამაშს განსაკუთრებული მნიშვნელობა ენიჭება და ფაქტობრივ ფინალს წარმოადგენს ჩვენთვის.
კონტინენტის პირველობაას ერთდროულად 4 ქვეყანს 4 ქალაქი უმასპინძლებს: ტამპერე (ფინეთი), კატოვიცე (პოლონეთი), ლიმასოლი (კვიპროსი) და რიგა (ლატვია). ტურნირი 27 აგვისტოს აიღებს სტარტს, 14 სექტემბრამდე გაგრძელდება და ევროპის 24 საუკეთესო ქვეყანა მიიღებს მონაწილეობას.
საქართველოს ნაკრებმა პირველად ევრობასკეტის ფინალურ ეტაპზე 14 წლის წინ, 2011 წელს ითამაშა და მას შემდეგ ყოველ ჯერზე ახერხებდა საკვალიფიკაციო ეტაპის გავლით ტურნირზე მოხვედრას. საუკეთესო შედეგი (მე-11 ადგილი) სწორედ 2011 წელს მოვიპოვეთ. ისღა დაგვრჩენია, გავავსოთ ახალი სპორტის სასახლე და ვუქომაგოთ ჩვენს ნაკრებს დარჩენილ უმნიშვნელოვანეს შეხვედრაზე. წინ ევრობასკეტია!