საქართველოს U21 ნაკრებმა ახალგაზრდული ევროპის ჩემპიონატის ჯგუფური ეტაპის მეორე შეხვედრაში ბელგიის ნაკრების წინააღმდეგ ქულა მოიპოვა. ტურნირის თანამასპინძლებმა ცუდი პირველი ტაიმისა და ორი გაშვებული გოლის შემდეგ მოახერხეს და მეორე ტაიმში ორი უპასუხო გოლი გაუტანეს მეტოქეს.
აიღე საგულშემატკივრო ბარათი
საქართველო V ბელგია 2-2
ჯგუფური ეტაპის პირველ მატჩისგან განსხვავებით, რამაზ სვანაძემ ძირითად შემადგენლობაში 4 ცვლილება გააკეთა და ეროვნული ნაკრებიდან დაბრუნებულ 4 ფეხბურთელს მისცა შანსი:
უცვლელი 5-4-1 ტაქტიკა, თუმცა გიორგი მამარდაშვილი, ირაკლი აზაროვი, ლუკა გაგნიძე და ზურიკო დავითაშვილი – ამჯერად სასტარტოდან.
მეკარე: მამარდაშვილი;
დაცვა: ხვადაგიანი – გელაშვილი – საზონოვი – კალანდაძე – აზაროვი;
ნახევარდაცვა: დავითაშვილი – ლუკა გაგნიძე – მექვაბიშვილი – მოისწრაფიშვილი;
თავდასხმა: გაგუა.
პირველ ტაიმში, ფაქტობრივად, არაფერი გამოგვდიოდა, მეტოქეს კი – ყველაფერი. მე-15 წუთზე ბელგიელთა ნახევარმცველმა, ასტერ ვრანკსმა საჯარიმოში ჩააწოდა, მარტოდ დარჩენილმა მარცხენა მცველმა, მაქსიმ დე კიოიპიერმა თავით გაგვიტანა; მეორე გოლში დე კიოიპიერმა ამჯერად ლარჟი რამაზანის გაატანინა, ამჯერადაც თავით. არეულობა დაცვის ხაზში, შეუთანხმებელი თამაში და უამრავი პოზიციური შეცდომა – ასეთი იყო მთელი პირველი ტაიმი.
რამდენიმე ცვლილების შემდეგ (გოჩოლეიშვილი, წიტაიშვილი და ნ. გაგნიძე მოედანზე) სრულიად განსხვავებული იყო მეორე ტაიმი: 51-ე წუთზე შემოსული გოჩოლეიშვილის პასით ასევე შეცვლაზე შემოსულმა წიტაიშვილმა საჯარიმოს გარედან ულამაზესი და ჭკვიანური დარტყმით გაიტანა. მთელი დარჩენილი დრო ჩვენს გუნდს აშკარა ფსიქოლოგიური და სათამაშო უპირატესობა ჰქონდა და, როგორც იქნა, 87-ე წუთზე გავათანაბრეთ: ირაკლი აზაროვის მარცხენა ფლანგიდან ჩაწოდებულ ბურთს შეცვლაზე შემოსული გიორგი გულიაშვილი დახვდა და ახლო მანძილიდან კარის მარჯვენა დაბალ კუთხეში თავით გაიტანა.
რამაზ სვანაძემ ხუთივე ცვლილება გამოიყენა და მოედანზე სამი ისეთი ფეხბურთელი შემოუშვა, რომელთაც გოლებში კონტრიბუცია (გოლი/საგოლე გადაცემა) ჰქონდათ.
პარალელურ შეხვედრაში პორტუგალიის U21 ნაკრებმაც ნიდერლანდებთან ფრე ითამაშა. ამ დროისთვის ჩვენ კვლავ ჯგუფის ერთპიროვნული ლიდერები ვართ 4 ქულით; 2-2 ქულა აქვს ნიდერლანდებსა და ბელგიას, ფავორიტად მიჩნეულ პორტუგალიას კი – 1 ქულა და ბოლო ადგილი. ისე გამოვიდა, რომ ბოლო თამაშამდე ოთხივე გუნდს აქვს ჯგუფიდან გასვლის შანსი და ერთდროულად რამდენიმე ვარიანტის განხილვა შეგვიძლია:
რა გვინდა, რომ მოხდეს
თუკი საქართველოს U21 ნაკრები მოახერხებს და ნიდერლანდების U21 ნაკრებთან გაიმარჯვებს, პირველი ადგილი გარანტირებულია;
თუკი შეხვედრა ფრედ მორჩება და ბელგია პორტუგალიას ვერ მოუგებს, ჩვენ მაინც პირველ ადგილზე გავალთ;
ნიდერლანდებთან წაგების შემთხვევაშიც, თუკი პორტუგალია ბელგიას მოუგებს, ჩვენ და პორტუგალიას 4-4 ქულა გვექნება, მაგრამ ურთიერთშეხვედრაში მოპოვებული გამარჯვებით მოვახერხებთ ჯგუფიდან გასვლას მეორე ადგილით.
რა არ უნდა მოხდეს
თუკი ჩვენ დავმარცხდით ნიდერლანდებთან, ბელგია კი პორტუგალიას მოუგებს, 5-5 ქულით გავლენ ნიდერლანდებისა და ბელგიის ახალგაზრდული ნაკრებები.
ჩვენთვის რამდენიმე გარემოებით ისტორიულ ტურნირზე საერთაშორისო მასშტაბის ისტორიული შედეგიც დაფიქსირდა: დინამო არენაზე მატჩს 41 887 ადამიანი დაესწრო, რაც ევროპის ახალგაზრდული ჩემპიონატების ყველა დროის საუკეთესო შედეგია. დარწმუნებით შეიძლება იმის თქმა, რომ 27 ივნისს ნიდერლანდების U21 ნაკრების წინააღმდეგ ჩვენ საკუთარ რეკორდს გავაუმჯობესებთ. ჯერჯერობით ზურიკო დავითაშვილის შედეგიანობის გრაფა ცარიელია და დიდია იმის ალბათობა, რომ სწორედ გადამწყვეტ შეხვედრაში წაგვადგება მისი გამოცდილება, გოლის ალღო და ლიდერული თვისებები.
ავტორი: გიორგი ყორღანაშვილი