ევროპის ახალგაზრდული ჩემპიონატის თანამასპინძელმა, საქართველოს U21 ნაკრებმა ურთულეს ჯგუფში მოახერხა პირველი ადგილის დაკავება. პორტუგალიასთან, ბელგიასთან და ნიდერლანდებთან გამართული შეხვედრების შემდეგ საქართველო 5 ქულით ჯგუფის ერთპიროვნული ლიდერი გახდა!
ჯგუფური ეტაპის ბოლო შეხვედრაში რამაზ სვანაძის გუნდი წლევანდელი ჩემპიონატის ერთ-ერთ ფავორიტ ნიდერლანდების ნაკრებს დაუპირისპირდა და ბოლო წამამდე დაძაბული შეხვედრა საბოლოოდ ფრედ — 1-1 დასრულდა. ჯგუფის პარალელურ მატჩში პორტუგალიის U21 ნაკრებმა დაამარცხა ბელგიის ნაკრები 2-1 და მეორე ადგილით ჩვენთან ერთად მოიპოვა მეოთხედფინალური ეტაპის საგზური.
კიდევ ერთხელ რომ გავიაზროთ წარმატება, ჩვენ გავედით ჯგუფიდან, ხოლო ნიდერლანდებისა და ბელგიის ახალგაზრდული ნაკრებები ჯგუფში ჩავტოვეთ.
აიღე საგულშემატკივრო ბარათი
საქართველო V ნიდერლანდები 1-1
პორტუგალია V ბელგია 2-1
ბელგიის წინააღმდეგ მატჩის შემდეგ რამაზ სვანაძემ ძირითად შემადგენლობაში სულ 3 ცვლილება განახორციელა. გიორგი გოჩოლეიშვილი, ნოდარ ლომინაძე და გიორგი წიტაიშვილი – სასტარტოში და ტრადიციული 5-4-1 ტაქტიკა:
მეკარე: მამარდაშვილი
დაცვა: გოჩოლეიშვილი – საზონოვი – გელაშვილი – კალანდაძე – აზაროვი
ნახევარდაცვა: დავითაშვილი – მექვაბიშვილი – ლომინაძე – წიტაიშვილი
თავდასხმა: გაგუა
აშკარა იყო, რომ მწვრთნელის გათვლა კონტრიერიშებზე თამაში და ძალიან სწრაფი ვინგერების ეფექტიანი გამოყენება იყო. გამორჩეული ვინგერი ზურიკო დავითაშვილი შეუჩერებელი იყო: პირველი ტაიმის მიწურულს, 42-ე წუთზე მარჯვენა ფლანგიდან ცენტრისკენ დაიწყო დრიბლინგი და აღარც გაჩერდა; ექვს ფეხბურთელს შორის გაძვრა და მეკარისგან დაბალ მარცხენა კუთხეში გაიტანა ეროვნული ნაკრებისთვის უმნიშვნელოვანესი გოლი!
იქამდეც და იმის მერეც საგრძნობი იყო ნიდერლანდელი ახალგაზრდების უპირატესობა. მათ არაერთი მომენტი შექმნეს ჩვენს კართან; რამდენჯერმე მამარდამ გვიხსნა, რამდენჯერმე – ძელმა.
ნიდერლანდების შემადგენლობის სიძლიერე რომ უკეთ წარმოვიდგინოთ, ეს ერთი ფაქტიც საკმარისია: პირველი ტაიმის 21-ე წუთზე დაშავდა ამსტერდამის „აიაქსის“ ერთ-ერთი ლიდერი, 21 წლის თავდამსხმელი ბრაიან ბრობი; მის ნაცვლად მოედანზე გამოვიდა მიუნხენის „ბაიერნის“ საკუთრებაში მყოფი, ამჟამად იტალიური „პარმას“ ერთ-ერთი ლიდერი, ჯოშუა ზირკზე. სწორედ ამ გარემოებების გათვალისწინებით გაგვიტანეს გოლი, როცა კუთხურიდან ჩაწოდების შემდეგ მოგერიებული ბურთი „აიაქსის“ ნახევარმცველმა, კენეტ ტეილორმა ძლიერი დარტყმით დაამატა და 1-1.
მეორე ტაიმშიც იგივე სურათი შენარჩუნდა. ბევრს გვიტევდნენ და ჩვენ მუდამ ვცდილობდით ფლანგებიდან კონტრშეტევაზე თამაშის აგებას. ტრადიციულად აქტიური იყო ორივე ფლანგის მცველი: ირაკლი აზაროვი და გიორგი გოჩოლეიშვილი; ასევე ტრადიციულად ყველა საჰაერო ორთაბრძოლაში ბოლომდე იხარჯებოდა გიორგი გაგუა, რომელსაც ლამის პირადი დუელი ჰქონდა ნიდერლანდელების კაპიტანთან, მიკი ვან დე ვენთან.
დაცვის ხაზში შეცდომები აშკარად იყო. საზონოვი – გელაშვილი – კალანდაძის ტრიო რამდენჯერმე პოზიციურად შეცდა; მიუხედავად იმისა, რომ სამივე მათგანი ტანმაღალია, რამდენჯერმე სრულიად თავისუფალი მდგომარეობიდან დაგვირტყეს თავით – ბურთი ორჯერ ძელს მოხვდა, ერთხელ გოლიც კი გავიდა, ოღონდ თამაშგარედან. ეს გარემოება გასათვალისწინებელია იმდენად, რამდენადაც გასულ შეხვედრაშიც ბელგიის U21 ნაკრებმა ორი გოლი სწორედ საჯარიმოში ჩაწოდების შემდეგ თავური დარტყმით გაგვიტანა. სამაგიეროდ იყო უამრავი ეპიზოდი, როცა ინდივიდუალურად სამივე ცენტრალურმა მცველმა და პლუს საყრდენ ზონაში მოქმედმა გუნდის კაპიტანმა, ანზორ მექვაბიშვილმა ძალიან ტექნიკური ნიდერლანდელები სწრაფად გაანეიტრალეს.
უკვე გაირკვა, რომ ერთ მეოთხედფინალში ჩვენი ჯგუფის მეორეადგილოსანი პორტუგალია C ჯგუფის პირველადგილოსან ინგლისის ნაკრებს შეხვდება – მატჩი 2 ივლისს მიხეილ მესხის სახელობის სტადიონზე გაიმართება; საქართველოს ახალგაზრდული ნაკრები კი ელოდება C ჯგუფის მეორეადგილოსნის გამორკვევას, რომელიც დიდი ალბათობით ჩეხეთის U21 ნაკრები იქნება. ეს ისტორიული მოვლენა 1-ელ ივლისს ბორის პაიჭაძის სახელობის ეროვნულ სტადიონზე მოხდება!
წინა მატჩის მიმოხილვის ბოლოს ვივარაუდეთ, რომ ევროპის ახალგაზრდულ ჩემპიონატზე ჩვენ მიერ დამყარებული მაყურებელთა დასწრების რეკორდი ჩვენ მიერვე გაუმჯობესდებოდა და ზურიკო დავითაშვილი იქნებოდა მოედანზე საუკეთესო;
ამჯერადაც ვთქვათ, რომ სტადიონზე მაყურებლის რაოდენობა კვლავ რეკორდულ ნიშნულს (+43 004) მიაღწევს და მატჩის MVP იყოს ისევ ზუ რი კო!
ავტორი: გიორგი ყორღანაშვილი