2024 წლის 26 მარტი – ესაა დღე, როცა საქართველოს ეროვნული ნაკრები ისტორიაში პირველად ევროპის ჩემპიონატზე გავიდა და დღე, როცა ხელახლა დაიბადა ახალი ქართული ფეხბურთი. ამ დიდი განახლებისა და გრძელი პროცესის ერთ-ერთი ყველაზე დიდი მონაწილეა ჩვენი ნაკრების კარის მცველი, გიორგი მამარდაშვილი, რომელსაც უდიდესი წვლილი მიუძღვის ჯერ კონტინენტის პირველობაზე გასვლის, შემდეგ კი ამ პირველობაზე საქართველოს საუცხოო თამაშისთვის.
მამარდაშვილი ერთ-ერთი პირველია, რომელმაც გაარღვია წლების განმავლობაში ჩაკეტილი წრე და ეროვნული ლიგიდან აღმოჩნდა ტოპ 5 ლიგაში – თბილისის „დინამოს“ აკადემიის აღზრდილი მეკარე, რომელმაც ჯერ თბილისის „ლოკომოტივში“ შესანიშნავი თამაშით გამოიჩინა თავი, 2021 წლიდან კი ესპანური ფეხბურთის გრანდის, „ვალენსიის“ ღირსებას იცავს. გიორგიმ სამაგალითოდ განავითარა საკუთარი კარიერა და ყოველ ჯერზე სწორ დროსა და სწორი გადაწყვეტილებების ფონზე მივიდა კარიერის ამ წერტილამდე.
ყველაზე დიდი სიახლე კი გასული წლის ზაფხულში დადასტურდა, როცა ჩვენი ნაკრებისა და „ვალენსიის“ ერთ-ერთი ლიდერი ოფიციალურად მსოფლიო ფეხბურთის გრანდის, „ლივერპულის“ ფეხბურთელი გახდა.
ბევრის აზრით, გიორგი მამარდაშვილი ევრო 2024 წლის საუკეთესო მეკარე იყო – წარმოუდგენლად მაღალი დონის თამაშები, უმაღლესი შეფასებები, ლიდერული თვისებები და, რაც თანამედროვე ფეხბურთში ძალიან ფასობს, სტატისტიკა: 30 მოგერიებული ბურთი სულ რაღაც 4 შეხვედრაში, რაც არათუ ერთ კონკრეტულ ტურნირზე, ზოგადად, ევროპის ჩემპიონატების ისტორიაში მეორე საუკეთესო შედეგია.
გასაკვირი არ იყო, რომ ასეთი ევროს შემდეგ გიორგის მიმართ საგრძნობლად გაიზრდებოდა ინტერესი და ასეც მოხდა – უამრავი გრანდის შემოთავაზება და საბოლოოდ არჩეული „ლივერპული“, რომელიც წელს საუკეთესო საფეხბურთო ტურნირის, პრემიერ ლიგის ჩემპიონობისთვის იბრძვის და უდიდესი ალბათობით გახდება კიდეც ინგლისის ჩემპიონი. „წითლები“ მომავალ წელსაც ამბიციურ განაცხადს აკეთებენ, ამაზე მეტყველებს გიორგი მამარდაშვილის დამატებაც – ნიდერლადელი სპეციალისტის, არნე სლოტის გათვლა სრულიად გასაგებია: როცა შენი გუნდი შემტევ და პრესინგზე აგებულ ინტენსიურ ფეხბურთს თამაშობს, კარის დარაჯად გჭირდება ყველაზე მშვიდი, გონიერი, მაღალი საფეხბურთო ინტელექტით გამორჩეული ფეხბურთელი და სწორედ ასეთია გიორგი მამარდაშვილი.
მამარდაშვილის კარიერიდან რამდენიმე მომენტის გამორჩევა შეიძლება: თბილისის „ლოკომოტივთან“ ერთად ევროპის ჩემპიონატის საკვალიფიკაციო ეტაპის მესამე რაუნდამდე გასვლა; ტრანსფერი ესპანურ „ვალენსიაში“ და დიდ კონკურენციაში პირველ მეკარედ თავის დამკვიდრება; 26 მარტს ერთა ლიგის ფინალში საბერძნეთის წინააღმდეგ პირადად მოგებული პენალტების სერია და ევროპის ჩემპიონატზე გასვლა: ევროპის ჩემპიონატი, 4 მატჩი და ნამდვილი ფრენა, რომელიც არა მხოლოდ ქართველ, არამედ ფეხბურთის ნებისმიერ გულშემატკივარს უდიდეს ესთეტიკურ სიამოვნებას ანიჭებდა.
„ლივერპული“, პრემიერ ლიგა, ჩემპიონთა ლიგა და უმაღლესი დონის საკლუბო დაპირისპირებები გიორგი მამარდაშვილის კარიერის ახალი ეტაპია. თითოეულ ნაბიჯზე არსებობდა იმის საფრთხე, რომ რაღაც სხვანაირად განვითარებულიყო, წვრილმანები არ გამოსულიყო, მაგრამ სწორედ ასეთი საფეხბურთო და ადამიანური მენტალობა ქმნის დიდ სპორტსმენებსა და დიდ ადამიანებს.
გიორგი მამარდაშვილი წელს ბოლო სეზონს ატარებს „ვალენსიაში“, ზაფხულიდან ის ოფიციალურად შეუერთდება „წითლებს“ და დაიწყება ახალი თავგადასავალი – სიმბოლურია, რომ „ლივერპულის“ მთავარი სიტყვები და ჰიმნია – You”ll never walk alone [„არასდროს ივლი მარტო“] – გიორგი მამარდაშვილი არასდროს ჩერდება და ამ გზაზე მუდამ მის გვერდით იქნება ქართველი გულშემატკივარი. მამარდა მაგალითია, როგორ არ უნდა გაჩერდე არასდროს და რამდენად დიდი ფასი აქვს შრომას საკუთარ სფეროში და შრომას საკუთარ თავთან.