სოციალური ქსელების განვითარების პარალელურად, ციფრული მარკეტინგი იმ სფეროდ ჩამოყალიბდა, რომელშიც არნახული კონკურენცია შეიქმნა. თუმცა ჯანსაღი კონკურენცია, როგორც ცნობილია, პროგრესს წარმოშობს, რომლის მიზანს რეკლამის ეფექტიანობის გაზრდა და მომხმარებლებისთვის უკეთესი, მათ ინტერესებზე მეტად მორგებული რეკლამების შეთავაზება წარმოადგენს. სხვადასხვა მონაცემებით, მომდევნო რამდენიმე წლის განმავლობაში, ციფრული მარკეტინგის გლობალური ბაზარი $385 მილიარდამდე გაიზრდება, ანუ მარკეტინგულ ხელსაწყოებზე არსებული მოთხოვნა მკვეთრად მოიმატებს, რაც სარეკლამო ტექნოლოგიებს გაამარტივებს და მათ ეფექტიანობას გაზრდის.
ციფრული მარკეტინგი გლობალური, შეიძლება ითქვას, უსაზღვრო სფეროა, რომელშიც ათასობით კომპანია არის ჩართული, მათ შორის ჩვენს რეგიონში. აი, სწორედ ამ თანრიგის კომპანიებს განეკუთვნება სარეკლამო ინდუსტრიაში მოქმედი სომხური სტარტაპი Optimyzee-ი, რომელსაც ორი მიზანი აქვს – სარეკლამო ხელსაწყოების ფუნქციური გამარტივება და სარეკლამო კამპანიების ეფექტიანობის გაზრდა. როგორც კომპანიაში ამბობენ, მათ მიერ შექმნილი პლატფორმით, მასში ჩაშენებული ხელოვნური ინტელექტით და მონაცემთა ანალიტიკური ხელსაწყოების დახმარებით, Google Search-ის სარეკლამო კამპანიების დაგეგმვა კომპანიებს ნულიდან შეუძლიათ, რაც რეკლამის დამკვეთებს დროის და რესურსების დაზოგვაში და გაყიდვების ზრდაში ეხმარება.
როგორც Optimyzee-ში ამბობენ, კომპანიის თანადამფუძნებლების, დავიდ არშაკიანის და ანასტას ვართანიანის მიერ შექმნილი პროგრამული უზრუნველყოფა PPC-ალგორითმების ავტომატიზაციას ახდენს, რითაც ადამიანური შეცდომის ალბათობა მცირდება, ხოლო ბიუჯეტირების პროცესი მარტივდება, რაც მარკეტერებს რუტინული, ე.წ. “შავი” სამუშაოსგან ათავისუფლებს და ბრენდის განვითარების სტრატეგიაზე და მის კრეატიულ აღსრულებაზე აუღელვებლად ფიქრის საშუალებას აძლევს. თავად პლატფორმა, რომელიც მარკეტერებს PPC-კამპანიების პროცესის აუცილებელი ნაწილის, მათ შორის საძიებო სიტყვების კვლევის, ქოფირაითინგისა და ანალიზის აღსრულებას უმარტივებს, ჭკვიანია, ანუ ის მუდმივად სწავლობს, რისთვისაც $10 მილიონზე მეტად შეფასებული 10,000-ზე მეტი სარეკლამო კამპანიისგან შემდგარ მონაცემთა ბაზას იყენებს. ამრიგად, გამართული მარკეტინგული კამპანიის დაგეგმვა იმ კომპანიებსაც შეუძლიათ, რომელთა ადამიანური კაპიტალი და ბიუჯეტი – ლიმიტირებულია.
“Optimyzee-ი, მართალია, სარეკლამო კამპანიის მენეჯმენტის ბევრი ასპექტის ავტომატიზაციას ახდენს, მაგრამ კამპანიის წარმართვის სადავეები მაინც მარკეტერებს რჩებათ. ჩვენს კლიენტებს შეუძლიათ, როგორც ბიუჯეტის განსაზღვრა, ასევე სამიზნე აუდიტორიის შერჩევა და სტრატეგიული საძიებო სიტყვების გამოყოფა. ჩვენი პლატფორმის ხიბლიც სწორედ ისაა, რომ მარკეტერებს სარეკლამო კამპანიის ოპტიმიზაციის საშუალებას მათი ნება-სურვილის მიხედვით აძლევს.
არ შემიძლია, ჩვენი ერთ-ერთი დამკვეთის, მცირე ზომის ამერიკული სარეკლამო სააგენტოს შემთხვევა რომ არ გავიხსენო, რადგან მანამ, სანამ ეს კომპანია Optimyzee-ზე გადმოვიდოდა, არაეფექტიან რეკლამებში ასობით ათასი დოლარი დახარჯა, რაც ბიუჯეტის ფლანგვის გარდა, დიდ დისკომფორტსაც იწვევს. ჩვენთან ინტეგრაციის შემდეგ, CTR-ის მაჩვენებელმა 135%-ით იმატა, კონვერსიამ კი – 66%-ით. მნიშვნელოვანია ისიც, რომ დამკვეთის ყოველთვიური დანახარჯები რამდენიმე ათასი დოლარით შევამცირეთ”, – აღნიშნავს Optimyzee-ის თანადამფუძნებელი, დავიდ არშაკიანი.
Optimyzee-ის თანადამფუძნებლებს შორის ციფრულ მარკეტერსა და პროგრამულ ინჟინერს ვხვდებით და, როგორც ისინი ამბობენ, კომპანიის შექმნისკენ სწორედ პირადმა გამოცდილებამ უბიძგა. არაეფექტიანი PPC-კამპანიების მართვის გამოცდილებამ დავიდ არშაკიანსა და ანასტას ვართანიანს ისეთი ხელსაწყოს შექმნის იდეა გაუჩინა, რომელიც, ერთი მხრივ, თავის ტკივილს აარიდებდა, ხოლო, მეორე მხრივ, მარკეტინგული კამპანიების ჩატარებას ფუფუნების კატეგორიიდან გამოიყვანდა და ამ ტექნოლოგიის გამოყენების საშუალებას ბევრ მცირე და საშუალო ზომის ბიზნესს მისცემდა. Optimyzee-ის ბიზნესმოდელი გამოწერას ეფუძნება, ხოლო სტარტაპი კლიენტებს სხვადასხვა პაკეტებს სთავაზობს, რომლებიც დამკვეთის მიზნებს არის მორგებული.
“კომპანია ორი წლის დავაფუძნეთ და მას შემდეგ, რამდენიმე ნიშანსვეტს უკვე მივაღწიეთ: სარეკლამო კამპანიების AI-ძრავა შევქმენით, რამდენიმე საინვესტიციო რაუნდი დავხურეთ და 600-ზე მეტ დამკვეთს მოვემსახურეთ. ამ გზაზე არაერთ დაბრკოლებას გადავაწყდით, როგორც უშუალოდ ალგორითმის, ასევე მომხმარებელთა მხარდაჭერის მიმართულებით, მაგრამ, რაც ყველაზე მნიშვნელოვანია, პრობლემები გადავლახეთ და მივხვდით, რომ მუდმივი განვითარება – უალტერნატივოა. Optimyzee-ის მთავარ ღირებულებებად ინოვაციას, მომხმარებელზე ორიენტრაციას და გამჭვირვალობას დავასახელებდი, რადგან ჩვენი მიზანი – PPC-ტექნოლოგიის დემოკრატიზაციაა”, – ამბობს დავიდ არშაკიანი.
ამბიციურმა მიზნებმა და ამ მიზნების მისაღწევად დასახულმა მკაფიო გეგმამ Optimyzee-ის გუნდი 500 Global in Eurasia-მდე მოიყვანა. სააქსელერაციო პროგრამის გავლის შედეგად, Optimyzee-ის დამფუძნებლებს ბიზნესის მასშტაბირება სურთ, რაც AI-ალგორითმების გაუმჯობესებას, სამომხმარებლო ბაზის გაორმაგებას და ევროპაში და ჩრდილოეთ ამერიკაში გაფართოებას მოიცავს. თუმცა კომპანიის ხედვა, როგორც თანადამფუძნებლები ამბობენ, გლობალურია, რადგან ციფრული მარკეტინგის სფეროში საზღვრები ფაქტობრივად არ არსებობს, ხოლო პრობლემები, რომელთაც კომპანიები აწყდებიან – უნივერსალურია.
საქართველოში მსოფლიოს ერთ-ერთი წამყვანი სტარტაპ-აქსელერატორის, კალიფორნიული 500 Global-ის სააქსელერაციო პროგრამა გრძელდება. “საქართველოს ბანკთან” და GITA-სთან პარტნიორობით შექმნილი რეგიონული სააქსელერაციო პროგრამის, 500 Global in Eurasia-ს მეექვსე ნაკადისთვის მენტორებმა ცხრა სტარტაპი შეარჩიეს, რომელთა დასახასიათებლად ყველაზე კარგად, სიტყვა “მრავალფეროვნება” გამოდგება. 500 Global in Eurasia-ს მეექვსე ნაკადის მონაწილე კომპანიები შვიდ სექტორსა და ექვს ქვეყანას წარმოადგენენ და, რაც ყველაზე საინტერესოა, კავკასიისა და ცენტრალური აზიის რეგიონის ქვეყნებთან ერთად, ქართულ სააქსელერაციო პროგრამაში ევროპული სტარტაპებიც მოხვდნენ.
გაიცანით 500 Global in Eurasia-ს მეექვსე ნაკადის სხვა მონაწილეები:
• Helio.AI – ქართული სტარტაპი, რომელიც კომპანიებს თანამშრომელთა შერჩევისთვის AI-თამაშს სთავაზობს;
• გაიცანით YAYA – აპლიკაცია, რომელიც ბავშვების აქტივობებს დაგიგეგმავთ;
• როგორ ვაქციოთ ტექსტი ვიდეოდ ერთ წუთზე ნაკლებ დროში Katalist-ის გამოყენებით?;
• გაიცანით 500 Global in Eurasia-ს მეექვსე ნაკადის მონაწილე სტარტაპები;
• გაიცანით 500 Global in Eurasia-ს მეექვსე ნაკადის მენტორები.