3-თვიანი თავგადასავალი დასრულდა — როგორ ჩაიარა მობილბანკის გრანდიოზულმა თამაშმა

2023 წლის 9 ოქტომბერი რიგითი ორშაბათი, ახალი სამუშაო კვირის დასაწყისი იქნებოდა, რომ არა ერთი ფაქტი ­— ამ დღეს სტარტი აიღო საქართველოს ბანკის მობილბანკის თამაშმა. მასშტაბურმა თავგადასავალმა მთელი საქართველო მოიცვა, და არა მხოლოდ — თამაშში ჩართვის შესაძლებლობა ხომ ქართველ ემიგრანტებსაც ჰქონდათ.

თამაშში ჩართვა კი დამოუკიდებლად, 2 ან 3-მოთამაშიან გუნდად იყო შესაძლებელი. როგორც ჩანს, მოთამაშეთა უმრავლესობამ გადაწყვიტა, რომ ყოველკვირეულ დავალებებს მარტო უკეთ გაართმევდა თავს: შეჯიბრში ჩართული ადამიანების 95 პროცენტი დამოუკიდებლად მოთამაშე იყო, 4 პროცენტი — წყვილში თამაშობდა, და მხოლოდ 1-მა პროცენტმა ამჯობინა, გუნდთან ერთად ეთამაშა. ამდენად, გასაკვირი არაა, რომ ყველაზე დაბალი კონკურენცია სწორედ 3-წევრიან გუნდებში იყო. აი, ამიტომაც გირჩევდით გუნდურად გეთამაშა!

მოთამაშეების რაოდენობა კი ყოველკვირეულად იზრდებოდა; თამაშის ფინალში მოსახვედრად მხოლოდ ის იყო საჭირო, სულ ცოტა ორი კვირის დავალებები შეგესრულებინა წარმატებით; ამდენად, შეჯიბრში მოსაგებად ჩართვაც 24 დეკემბრამდე შეეძლო ყველა მსურველს. დაბოლოს, 31 დეკემბერს, როცა თამაშის მე-12 კვირაც მიიწურა, მასში ჩართული იყო ნახევარ მილიონზე მეტი ადამიანი!

გემახსოვრება ისიც, რომ თამაშის ყოველ მონაწილეს, იქნებოდა იგი დამოუკიდებელი მოთამაშე თუ გუნდური, ყოველკვირეულად ახალ-ახალი დავალებების შესრულება უწევდა. თითოეული სწორი პასუხი 5 მონეტით ფასდებოდა, კვირის ყველა დავალებისთვის თავის გართმევის შემთხვევაში კი დამატებით მონეტებსაც იღებდი. და მონეტები რისთვის გჭირდებოდა (გარდა იმისა, რომ ფინალში გამოგეყენებინა)? რა თქმა უნდა, მარკეტში გადასაცვლელად. თამაშის მე-3 კვირაში საჩუქრების მარკეტი გაიხსნა, სადაც მოგროვებული მონეტებით სხვადასხვა რამის, ვაუჩერების და განსაკუთრებული შეთავაზებების შეძენა შეიძლებოდა. ჯამში მარკეტში 99 895 საჩუქარი განთავსდა. საჩუქრებიდან ყველაზე სანატრელი ბევრი მოთამაშისთვის მილიონი PLUS ქულა იყო. ცნობისთვის, ეს 2 500 ლარს უტოლდება. საბოლოოდ, ეს განსაკუთრებული პრიზი  ხუთმა იღბლიანმა მოთამაშემ დაისაკუთრა.

თამაში კი გრძელდებოდა; შეჯიბრმა მთელი ქვეყანა მოიცვაო, ტყუილად არ გვითქვამს — მისი ყოველკვირეული შეკითხვები განიხილებოდა ყველგან, ვირტუალურ თუ ფიზიკურ სივრცეში: Facebook-ჯგუფებში, TikTok-ვიდეოებში, საზოგადოებრივ ტრანსპორტში, კაფეებში… კითხვების პასუხებთან ერთად, ბევრს ისიც აინტერესებდა, ვის გონებაში იხარშებოდა ეს ყველაფერი: ოსტატური შიფრები, გასაოცარი ასოციაციები და ისეთი რებუსები, შუბლზე ხელს რომ შემოგარტყმევინებდა, ამას როგორ ვერ მივხვდიო. მათ უკან, არც მეტი, არც ნაკლები, ხუთი ადამიანი იდგა. თუმცა, შენთვის კომფორტული და სახალისო სათამაშო სივრცის შექმნაზე ბევრად მეტი ზრუნავდა — პროექტის მომზადებასა და გაშვებაზე ჯამში 104-მა ადამიანმა იმუშავა.

საბოლოოდ, ყველა მოუთმენლად ელოდა 18 იანვარს, თამაშის გრანდიოზულ ფინალს, როცა 360-ათასლარიანი საპრიზო ფონდი უნდა გათამაშებულიყო. ეს 360 ათასი ლარი კი, საბოლოოდ, 18-მა გამარჯვებულმა გაინაწილა: სამმა დამოუკიდებლად მოთამაშემ, სამმა 2-მოთამაშიანმა გუნდმა და სამმა 3-მოთამაშიანმა გუნდმა.

თამაშის ფინალი კი ალბათ მოსალოდნელზე სანერვიულოც აღმოჩნდა — მოთამაშეებს აქამდე დროის და სხვაგვარი შეზღუდვების გარეშე უწევდათ ასპარეზობა, ახლა კი უკვე ყოველი წამი იყო გადამწყვეტი. დამოუკიდებლად მოთამაშეებს ფინალში 30 შეკითხვაზე მოუწიათ პასუხის გაცემა, ორწევრიანი გუნდის კაპიტნებს (ფინალში მხოლოდ კაპიტნები თამაშობდნენ) — 45 შეკითხვაზე, 3-წევრიანი გუნდის კაპიტნებმა კი 60 დავალება შეასრულეს. ჯამში, პირველი კვირიდან ფინალის ჩათვლით, თამაშში 659 შეკითხვა დაისვა!

აი, ასე დასრულდა თამაში. აღსანიშნავია ისიც, რომ საფინალო პრიზებისა და მარკეტში შეძენილი საჩუქრების გარდა, შეჯიბრის ყველა მონაწილე (მათ შორის, არაფინალისტებიც) Extra.ge-ის ფასდაკლებებით დაჯილდოვდა.

ჩვენ კი ისღა დაგვრჩენია, გამარჯვებულებს კიდევ ერთხელ მივულოცოთ და მადლობა გადავუხადოთ ყველას, ვისი ჩართულობითაც თამაში ასეთ მასშტაბურ პროექტად იქცა.

არ გაჩერდე, გააგრძელე კითხვა