YouTravel.me – ტურების პლატფორმა ინდივიდუალური შეთავაზებებით.
დროთა განმავლობაში ყველა ინდუსტრია იცვლება და თანამედროვე მოთხოვნებს ერგება. გამონაკლისი არც ტურიზმია. მიუხედავად ჩაკეტილი საზღვრებისა, მილიონობით ადამიანი ელოდება ვაქცინაციას და საერთაშორისო ფრენების განახლებას, რაც სექტორისთვის ახალი სუნთქვა იქნება. სწორედ ამ ბაზარზე ცდილობს თავის დამკვიდრებას YouTravel.me, რომელიც მოგზაურობის დროს უნიკალური გამოცდილების მიღების შესაძლებლობას გაძლევთ. მილენიალებს ყველა სფეროში, პერსონალურად მათზე მორგებული პროდუქტი სურთ, ისინი თავგადასავალს ეძებენ, რომელიც მათ ინტერესებსა და მისწრაფებებს მაქსიმალურად დააკმაყოფილებს. YouTravel.me სწორედ ასეთი ტურების პლატფორმაა, რომლის მიზანიც მილიონობით ტურისტისთვის ინდივიდუალური გამოცდილების შეთავაზებაა.
“იდეა მაშინ გაგვიჩნდა, როდესაც ერთ-ერთი ყველაზე ცუდი მოგზაურობიდან დავბრუნდით. ჩინეთში, ჰაინანში ვიმოგზაურეთ კლასიკური ტუროპერატორის დახმარებით, რაც ძალიან არ მოგვეწონა. როდესაც სამშობლოში დავბრუნდით, დავიწყეთ ისეთი პლატფორმის მოძებნა, სადაც არაორდინალური ტურები იქნებოდა ხელმისაწვდომი, ძიება წარუმატებელი გამოდგა. ბაზრის შესწავლის შემდეგ აღმოვაჩინეთ, რომ შეგვეძლო გარკვეული ნიშა დაგვეკავებინა, რომელსაც სწრაფად განვავითარებდით – გვიყვება ივან ბორტნიკოვი.
სამივე დამფუძნებელს (ოლგა ბორტნიკოვი, ივან ბორტნიკოვი, ივან მიხეევი მოგზაურობა ძალიან უყვარს, იციან თუ რამხელა ემოციის მატარებელი შეიძლება იყოს თითოეული ქვეყნის სტუმრობა. სწორედ ამიტომ, Youtravelme სააგენტოს გვერდის ავლით, პირდაპირ “Trip ლიდერს” უკავშირდება, იდენტური ინტერესების მქონე ადამიანებს აერთიანებს და Big Data-ს მეშვეობით რეკომენდაციის სისტემას ქმნის.
„ჩვენი პლატფორმა მოგზაურებს 100-ზე მეტ ქვეყანაში 4000-მდე ტურს სთავაზობს. პირველი ვერსია 2018 წლის ივნისში გავუშვით და უკვე 150 ათასზე მეტი ყოველთვიური მომხმარებელი გვყავს. თებერვალში პანდემიის გამო მათი რაოდენობა შემცირდა, თუმცა უკვე ივლისში სიტუაცია შეიცვალა, კვლავ ვიზრდებით და საერთაშორისო საზღვრების გახსნას სულმოუთქმელად ველით. გვსურს, ტურიზმის სფეროში გლობალური ლიდერები გავხდეთ და მილიონობით ადამიანს დავეხმაროთ მსოფლიოს აღმოჩენაში. საწყის ეტაპზე ინვესტიციის მოზიდვა გაგვიჭირდა, დაახლოებით 10,000 დოლარზე მეტი დეველოპმენტსა და რეკლამაში დავხარჯეთ. იყო შეცდომები, თუმცა მათი წყალობით ძალიან ბევრი რამ ვისწავლეთ, პირველი ინვესტიციის მიღება გაშვებიდან მხოლოდ 1 წლის თავზე შევძელით.“ – გვიყვება ივანი.
მისი თქმით, სტარტაპის მიზანი რუსეთის შემდეგ, ევროპისა და ამერიკის ბაზრის ათვისებაა, რაშიც 500 Startup-ის აქსელერაციის პროგრამა აუცილებლად დაეხმარება.
„ძალიან ბევრს ვმუშაობთ ყოველდღიურ რეჟიმში, ვხედავთ, რომ თითოეული მენტორი ძალიან გამოცდილია და გვჯერა, მათი დახმარებით მიზანს მივაღწევთ. “საქართველოს ბანკისა” და 500 Startups-ის კოლაბორაცია აღმოსავლეთ ევროპაში არსებულ სტარტაპებს საშუალებას გვაძლევს განვვითარდეთ და წვდომა გვქონდეს გლობალურ ბაზარზე. გვჯერა, რომ “საქართველოს ბანკი” ძალიან კარგი პარტნიორი იქნება და მოხარულები ვართ მათთან თანამშრომლობით“ – ამბობს ივანი.
YouTravel.me 500 Georgia-ს აქსელერაციის პროგრამის ერთ-ერთი მონაწილეა. კომპანია იმ 15 რჩეულ სტარტაპს შორის მოხვდა, რომელიც პროექტის მეორე ნაკადშია ჩართული და ამჟამად აქსელერაციის პროცესს გადის. 500 Georgia რეგიონის მასშტაბით, საქართველოს ბანკის მხარდაჭერით და ინოვაციებისა და ტექნოლოგიების სააგენტოს ინიციატივით ხორციელდება. მსოფლიოში წამყვანი აქსელერატორი, 500 Startups-ი, ქართულ და უცხოურ სტარტაპებს აერთიანებს, პროექტის მთავარი მიზანი კი საქართველოს სტარტაპ ეკოსისტემის გაძლიერება, საინვესტიციო პოტენციალის განვითარება და სტარტაპ კომპანიების გლობალურ ბაზარზე მასშტაბირებაა. აქსელერაციის პროგრამის პირველი ნაკადში ჩართულმა სტარტაპებმა 5 მლნ აშშ დოლარის მოცულობის ინვესტიცია უკვე მოიზიდეს. პროგრამის ორი გამარჯვებული, Cardeal და Cargon კი 2021 წლის გაზაფხულზე სილიკონ ველიზე გაემგზავრება და 500 Startups-ის ერთთვიან პროგრამაში მიიღებს მონაწილეობას.