სულ რაღაც 1 თვის წინ 500 Georgia-ს დემო დღეზე STORI AI ერთ-ერთმა დამფუძნებელმა, სანდრო ოქროპირიძემ წარადგინა, დღეს კი ეს სტარტაპი Product Hunt-ზე წლის საუკეთესო პროდუქტებს შორის არის წარდგენილი. STORI AI ონლაინპლატფორმაა, რომელიც ხელოვნური ინტელექტით მუშაობს და კომპანიებისთვის ბრენდული კონტენტის შექმნას წუთებში ახერხებს. ამ ინოვაციურ წამოწყებას ძირითადად უცხოელი მომხმარებელი ჰყავს და კომპანია მათ ამჟამად სერვისის სამ პაკეტს სთავაზობს.
ჯილდოს სახალისო სახელწოდების მიუხედავად – Golden Kitty, მისი მოპოვება იმაზე რთული და პრესტიჟულია, ვიდრე ერთი შეხედვით შეიძლება ჩანდეს. Golden Kitty-სთვის გასულ წელს Product Hunt-ზე ჩაშვებული ყველაზე ინოვაციური სტარტაპები იბრძვიან. სულ 18 კატეგორიაა და თითოეულში გამარჯვებულის გამოვლენისას დიდი მნიშვნელობა ხმის მიცემის ონლაინ სისტემას ენიჭება. მომხმარებლები სხვადასხვა კატეგორიაში საუკეთესოებს ირჩევენ, მაგალითად, წინა წლებში ეს ჯილდო Golden Kitty ისეთმა კომპანიებმა მოიგეს, როგორებიცაა ChatGPT, Motion და Canva.
STORI AI-ის ჯილდოს მოგების შანსი ორ კატეგორიაში აქვს: მარკეტინგისა და გაყიდვების და საუკეთესო AI პროდუქტის კატეგორიაში, რომელშიც ქართული სტარტაპის კონკურენტი არც მეტი, არც ნაკლები, Google Bard იქნება.
სანდროს ვკითხეთ, როგორ მოვიდა STORI AI აქამდე და როგორ განვითარდება კომპანია “სტარტაპების All Star”-ის შემდეგ:
“Product Hunt-ზე ჩაშვება სტარტაპის საერთაშორისო აღიარებისკენ ყველაზე მოკლე და შესაძლებლობებით სავსე გზაა. ზოგადად, ვფიქრობ, ქართულ სტარტაპებს Product Hunt განსაკუთრებით დაეხმარება შეფასებების მიღებასა და ინვესტორების მოძებნაში. გაგვიმართლა და 500-ის მენტორების რჩევები ძალიან გამოგვადგა პროდუქტის გაუმჯობესებაში. არც ახლა ვჩერდებით, თვის ბოლოს STORI AI-ს პერსონალური ბრენდინგის ფუნქცია დაემატება, თებერვალში კი დიდ განახლებას ვგეგმავთ“.
ხმის მიცემის პროცესი 21 იანვარს სრულდება, STORI AI-სთვის ხმის მიცემა ორ, მარკეტინგის & გაყიდვების და AI პროდუქტის კატეგორიაში შეგიძლია. ამ დიდ გზაზე პატარა მხარდაჭერაც კი ძალიან მნიშვნელოვანია. ხმის მიცემა STORI AI-სთვის ამ ბმულზე შეგიძლიათ: https://www.producthunt.com/golden-kitty-awards/marketing-sales
შეგახსენებთ, 500 Georgia_ს აქსელერაციის პროგრამის მეექვსე ნაკადში განაცხადების მიღება უკვე დაწყებულია. რეგისტრაცია შეგიძლიათ ბმულზე.