საწყის ეტაპზე ონლაინ ვაჭრობის პლატფორმებს არაერთი გამოწვევის დაძლევა უწევთ. რთულია ერთდროულად მომხმარებლის ქცევის შეცვლაზე, ხარისხიანი პროდუქტის შექმნასა და გამართულ სისტემაზე იზრუნო. Payze-ს გუნდი, რომელიც 3 თანადამფუძნებლისგან შედგება (გეგა წურწუმია, გეგა ტოფაძე, კახა გელაშვილი და მსგავს კომპანიებთან თანამშრომლობს, ამ ყველაფერს მალევე მიხვდა. სურდათ ეტაპობრივად ყველა პრობლემა გადაეჭრათ და ბაზრის კვლევას შეუდგნენ. შექმნეს უნივერსალური, ე.წ „Bill-Splitting“ მოდელი, რომლითაც პლატფორმა პროდუქტის გაყიდვის შემდეგ, საკუთარ საკომისიოს ავტომატურად იღებს და ხელით თითოეულ ტრანზაქციაზე მუშაობა საჭირო აღარაა. მისი ერთ-ერთი დამფუძნებელი, გეგა წურწუმია ამბობს, რომ ონლაინ ვაჭრობა საქართველოში ახლა იკიდებს ფეხს, მასში ჩართული მერჩანტები კი არაერთი გამოწვევის წინაშე დგანან და ძირითად საქმიანობაში ხელს ბიუროკრატია და რეგულაციები უშლით.
„გვაქვს Software Developmet კომპანია, პროექტებზე მუშაობის დროს დავინახეთ უამრავი პრობლემა, რომელსაც ონლაინ ვაჭრობაში ჩართული მერჩანტები გადახდების დროს აწყდებოდნენ. დარეგისტრირება, გადახდის ჩაშენება, ახალი ფუნქციონალის დეფიციტი მათთვის გამოწვევა იყო. გადავწყვიტეთ ამ ყველაფრის გამოსწორება. რეგისტრაცია რამდენიმე კვირას და მრავალრიცხოვან დოკუმენტაციას მოითხოვს, ჩვენ მისი გაციფრულება გვსურს და მალე პროცედურებს მხოლოდ რამდენიმე საათი დასჭირდება.“ – ამბობს გეგა.
ე.წ „Bill Splitting” მოდელზე და მათ ინოვაციურ გადაწყვეტაზე უფრო მეტი რომ გაიგოთ:
„Market Place მყიდველს და გამყიდველს ერთმანეთთან აკავშირებს, რაშიც გარკვეულ საკომისიო გადასახადს იღებს. დღეს ასეთ პლატფორმებს ხელით უწევთ მიღებული თანხის გაყოფა და მხარეებზე განაწილება, სიტუაცია უფრო რთულდება თუ პროცესში საკურიერო მომსახურებაცაა ჩართული. ჩვენ ამ ყველაფერს ვაციფრულებთ და ბიუროკრატიას ვამცირებთ. Payze შესაძლებელს ხდის კომპანიებს საკუთარ მოდელზე აგებული სისტემა შევთავაზოთ და თანხა ნებისმიერი რაოდენობის მხარეზე ავტომატურად გავანაწილოთ. მაგალითად, სისტემაში მერჩანტის და სავაჭრო პლატფორმის პროცენტული გადანაწილება თავიდანვე შეგვყავს (მაგ: 80% და 20%, ტრანზაქციის განხორციელების შემდეგ კი პროგრამა მას ავტომატურად ანაწილებს, აქამდე კი ეს განაწილება ხელით ხდებოდა და დიდ დროს საჭიროებდა. ქართული პლატფორმები მომხმარებლისთვის პოპულარული ბოლო 2-3 წელია გახდა. აქამდე მათ ბანკები ემსახურებოდნენ, თუმცა დიდი ორგანიზაციებისთვის ფუნქციონალის სწრაფი ცვლილება მარტივი არაა. დასავლეთის ქვეყნებში გადახდებს ძირითადად, ჩვენნაირი სერვის პროვაიდერები არეგულირებენ. გვსურს, მომავალში ამ კუთხით ლიდერები გავხდეთ და გადახდებთან დაკავშირებული ნებისმიერი პრობლემა მოვაგვაროთ. მას შემდეგ, რაც კომპანია ჩვენთან თანამშრომლობას იწყებს, ამ მიმართულებას სრულად ვიბარებთ, ბანკთანაც კი აღარ უწევს თანამშრომლობა“,- გვიყვება კომპანიის თანადამფუძნებელი.
მათი მომსახურებით სარგებლობისას კომპანიას იგივე რაოდენობის საკომისიოს გადახდა უწევს, რაც POS ტერმინალის შემთხვევაშია.
Startup Wise Guys-ის პრე-აქსელერატორის შემდეგ, Payze უკვე 500 Startup-ის პროგრამაშიც მოხვდა და 15 ფინალისტს შორისაა. მათ უკვე აქვთ მოპოვებული 30 000 ევროს ღირებულების დაფინანსება, თუმცა „საქართველოს ბანკისა“ და 500 Startup-ის მხარდაჭერით, ისინი ტოპ კლასის მენტორებთან გაივლიან ტრენინგს და ეცდებიან საკუთარი პროდუქტი ახალ ეტაპზე გადაიყვანონ. „საქართველოს ბანკს“ და უმსხვილეს აქსელერატორს საქართველოში სტარტაპ ეკოსისტემის განვითარების კუთხით დიდი გეგმები აქვთ და სურთ ქვეყანა რეგიონული ჰაბი გახდეს. ინფორმაციისთვის, 500 Startup-ს 75-ზე მეტ ქვეყანაში აქვს მუშაობის გამოცდილება და მისი პროგრამა 5000-ზე მეტ წარმატებულ კომპანიას აქვს გავლილი.