ბოლო ათწლეულის განმავლობაში ციფრული ტექნოლოგიები ძალიან სწრაფად განვითარდა და შესაბამისად დაიწყო უამრავი ბიზნესის გაციფრულებაც. ინტერნეტის განვითარებამ მსოფლიო თითქოს დააპატარავა და მრავალი ბიზნესისთვის ძალიან მარტივად გაიხსნა უცხოური ბაზრები.
დღეს მომხმარებლებს ინტერნეტის დახმარებით უპრობლემოდ შეუძლიათ ისარგებლონ არალოკალური ბიზნესის მომსახურებით. როდესაც უამრავი კომპანიის სერვისი თუ პროდუქტის რეალიზაცია ონლაინ სივრცეში გადადის, შესაბამისად იზრდება მოთხოვნა ონლაინ კომუნიკაციაზეც. ადგილობრივი პროდუქტის ან მომსახურების გამოყენებისას, პრობლემის ან კითხვების შემთხვევაში თქვენ მარტივად შეგიძლიათ დაუკავშირდეთ კომპანიას ან ეწვიოთ ფილიაში, მაგრამ იგივეს ვერ გააკეთებთ, როცა საერთაშორისო ბრენდს თქვენს ქვეყანაში წარმომადგენლობითი ოფისი არ აქვს.
აქამდე თუ ცოცხალ რიგში გიწევდათ დგომა, დღეს უკვე პასუხს ონლაინ ჩათში ელოდებით. ხშირად როდესაც გეჩქარებათ ასეთი კომუნიკაციისათვის დრო არ გაქვთ და პირდაპირ რეკავთ უცხოეთში და ალბათ დამეთანხმებით, რომ ეს საკმაოდ ძვირი სიამოვნებაა. ამ გამოწვევას სტარტაპმა Livecaller-მა ძალიან საინტერესო პროდუქტით უპასუხა.
„იდეა მას შემდეგ გაჩნდა, რაც საკმაოდ დიდი თანხა დავხარჯე ავიაკომპანიასთან დარეკვისას, როდესაც პრობლემა მქონდა. სწორედ მაშინ ვკითხე ჩემს მეგობარს თუ შეიძლებოდა შეგვექმნა ისეთი ონლაინ ხელსაწყო, რომელიც პირდაპირ ვებ საიტიდან უფასოდ უზრუნველყოფდა ქოლ ცენტრებთან დაკავშირებას.
დღეს ბევრ ადამიანს მაინც ურჩევნია, პირადად დაელაპარაკოს ოპერატორს, ამიტომ პირველ რიგში გავაკეთეთ ვიჯეტი, რომლის ჩაშენებაც შესაძლებელია ნებისმიერ ვებსაიტზე და დამატებითი პროგრამის დაყენების გარეშე მომხმარებელი სრულიად უფასოდ ელაპარაკება სასურველ კომპანიას, როგორც საქართველოში ისე საზღვარგარეთ. განვითარების შემდეგ საფეხურზე დავამატეთ ონლაინ ჩათი და “Screen sharing” ფუნქციები. ასევე თუ კლიენტები კომპანიას მიწერენ სოციალურ ქსელში, Viber-სა თუ Watsapp-ში, ოპერატორებს პირდაპირ Livecaller-ის სისტემიდან შეუძლიათ დაუბრუნონ პასუხი. ეს შედარებით ახალი ფუნქციონალია, რომელიც ერთი თვის წინ დავამატეთ,“ – გვიყვება კომპანიის დამფუძნებელი ნიკა გაბუნია.
სტარტაპის სამიზნე აუდიტორია არიან კომპანიები, რომლებსაც აქვთ ქოლ ცენტრი და აქტიურად იყენებენ თავიანთ ვებგვერდებს მომხმარებლებთან საკომუნიკაციოდ. Livecaller-ის პროდუქტით დაინტერესებულნი არიან ბიზნესები, რომლებსაც ჰყავთ უცხოელი კლიენტები და ემიგრანტები. მაგალითად, Ecommerce, სამშენებლო, ტურისტული თუ მანქანის გაქირავების კომპანიები.
Livecaller საერთაშორისო პროდუქტს ქმნის და დამფუძნებლები დიდ დროსა და ძალისხმევას ხარჯავენ იმაზე, რომ უცხოელი კლიენტი მოიზიდონ, მაგრამ ვისაც მსგავსი გამოწვევა გქონიათ ბიზნესში, გეცოდინებათ, რომ ეს არც ისე მარტივი პროცესია. სტარტაპის პროდუქტი ფუნქციურად მუშაობდა და უკვე ჰყავდა კლიენტები, როდესაც დამფუძნებლებმა 500 Startups-ის აქსელერაციის პროგრამაში მონაწილეობა გადაწყვიტეს.
„ჩვენთვის მთავარი გამოწვევა ამ ეტაპზე არის საქართველოს ფარგლებს გარეთ გასვლა და უცხური კომპანიების მოზიდვა და ვთვლით, რომ 500 Startups-თან თანამშრომლობა ამაში ძალიან დაგვეხმარება.
შეიძლება ითქვას, რომ ჩვენი მოლოდინი გამართლდა და ბევრი საინტერესო რამე გავიგეთ, მივიღეთ, ვისწავლეთ და ეს მომავალში აუცილებლად დაგვეხმარება სტარტაპის განვითარებაში. ამ ეტაპზე უკვე შევიტანეთ საიტის დიზაინში ცვლილებები და მენტორებთან ერთად დავიწყეთ გაყიდვებისა და მარკეტინგული სტრატეგიის დაგეგმვა.
საქართველოში ასეთი დონის პროგრამები აქამდე ხშირად ნამდვილად არ ტარდებოდა და დადებითად შევაფასებ, საქართველოს ბანკისა და ტექნო პარკის ამ წამოწყებას. ასევე ძალიან კარგია, რომ საქართველოს ბანკის სახით სტარტაპებს გამოუჩნდათ ინვესტორი და იმედია, რომ ეს იქნება კარგი მაგალითი სხვა კერძო სექტორის წარმომადგენლებისათვის, რათა მომავალში სტარტაპებს ხელი შეუწყონ განვითარებაში,“ – ამბობს ნიკა გაბუნია.
მოკლედ რომ შევაჯამოთ, თუ კომპანია იყენებს LiveCaller-ს თქვენ ძალიან გაგიმართლათ, რადგან ნებისმიერი მოწყობილობიდან, იქნება ეს კომპიუტერი, სმარტფონი, ლეპტოპი თუ ტაბლეტი, ერთ ღილაკზე დაჭერით შეძლებთ დაუკავშირდეთ ოპერატორს და კითხვებზე პასუხები სრულიად უფასოდ მიიღოთ.