თუ გაქვთ კითხვა: როგორ შევქმნა ინვოისი, გამოვთვალო დ.ღ.გ, ქონების გადასახადი და ა.შ. – ამ კითხვებზე პასუხს Kernel გაგცემთ
საქართველოს ბანკის მხარდაჭერით და ინოვაციებისა და ტექნოლოგიების სააგენტოს ინიციატივით, მსოფლიოში წამყვანი გლობალური აქსელერატორი 500 Startups-ი აქსელერაციის პროგრამას აგრძელებს. პროექტი რეგიონის მასშტაბით 500 Georgia-ს პროგრამის სახელით ხორციელდება. პროექტის მთავარი მიზანი საქართველოს სტარტაპ ეკოსისტემის გაძლიერება, საინვესტიციო პოტენციალის განვითარება და სტარტაპ კომპანიების გლობალურ ბაზარზე მასშტაბირებაა. ამჟამად პროგრამის მეორე ნაკადის აქსელერაციის პროცესი მიმდინარეობს, რომელშიც 15 კომპანიაა ჩართული. ესენია: Activechat, Agrolabs, Argonavti, Arealy, B2C.GE, Citycom, Corebook, Extra.ge, Kernel, Kvalifika, My Nanny, PAYZE, Simpolium, Trice, YouTravel.me.
გაგაცნობთ პროგრამის მეორე ნაკადის 15 რჩეულში შესულ სტარტაპს- კომპანია Kernel-ს.
მსოფლიოში დაახლოებით, 300 მილიონი ადამიანი ცდილობს შექმნას სტარტაპი/საკუთარი კომპანია. აქედან თითქმის 1/3 ახერხებს ბაზარზე შესვლას. გამოდის, რომ დღეში 137,000-მდე ახალი კომპანია რეგისტრირდება (წყარო – moyak.com. წარმოიდგინეთ, რამდენ მათგანს უჭირს სწორი ფინანსური მენეჯმენტი, გადასახადების გამოთვლა, ოფიციალური დოკუმენტების შედგენა და ა.შ.
ხშირად, გამოსავალი შეიძლება Excel-ში ვეძებოთ, თუმცა ოფიციალურ შაბლონებს გვერდს ვერ ავუვლით და არსებობს შანსი, რომ უნებლიედ დაშვებულმა შეცდომამ დიდი ფინანსური ზარალიც კი მოგვაყენოს. თითქმის იგივე სურათია საქართველოშიც. მასშტაბები, ბუნებრივია განსხვავდება, თუმცა მცირე ბიზნესს, ინფლუენსერებს, სტარტაპებს ყოველთვის აქვთ კითხვა: როგორ შევქმნა ინვოისი, გამოვთვალო დ.ღ.გ, ქონების გადასახადი და ა.შ
სწორედ ამ პრობლემის გადაჭრას შეეცადა „კერნელი“, რომელიც სამომავლოდ All-in-one ფინანსურ და საბუღალტრო პლატფორმად ჩამოყალიბდება. გარკვეული შედეგი სტარტაპს უკვე აქვს, 1500-მდე დარეგისტრირებული მომხმარებელი დიდი ალბათობით, წლის ბოლომდე 5000-ს გადააჭარბებს. ბექა დალაქიშვილი, მიშო ზღულაძე და გუსტავ გროთი დაუღალავად მუშაობენ, რომ მცირე ბიზნესების ან ინფლუენსერების ყოველდღიური ცხოვრებიდან Excel საერთოდ გაქრეს.
“„კერნელი“ მარტივი ფინანსური ხელსაწყოებისთვის განკუთვნილი პლატფორმაა, რომელიც ფრილანსერებსა და მცირე ბიზნესზეა გათვლილი. მისი მეშვეობით მხოლოდ 2 წუთში შეძლებთ ინვოისის შექმნას, აქამდე კი Excel-ში გაცილებით დიდი დრო უნდა დაგეხარჯათ. გარდა ამისა, გვაქვს ფინანსური და საგადასახადო კალკულატორები და თითქმის ყველა გადასახადი გვაქვს მოცული. მომსახურება ჯერჯერობით ყველასთვის უფასო და ხელმისაწვდომია, წვდომისთვის მხოლოდ მარტივი მონაცემების შეყვანა და რეგისტრაციაა საჭირო.“ – გვიყვება მიშო ზღულაზე, „კერნელის“ მარკეტინგის მიმართულების ხელმძღვანელი.
მისი თქმით, მსგავსი პრობლემები მრავალწლიანი გამოცდილების განმავლობაში თავად აწუხებდათ. პლატფორმის ჩამოყალიბების იდეაც აქედან მოვიდა.
„ჩვენ თვითონაც ხშირად გვიჭირდა ფინანსური მენეჯმენტი და შესაბამისად, სწორი გადაწყვეტილებების მიღება. გვსურდა ეს პროცესები გაგვემარტივებინა ისეთი ადამიანებისთვის, ვისაც ფინანსები ან ბუღალტერია არ ესმის. გამოვკითხეთ 200-მდე კომპანია და მათი მოთხოვნიდან გამომდინარე შევქმენით პროდუქტი. მომავალში ვაპირებთ Payroll-ისა და CRM-ის დამატებასაც. ჩვენი სურვილია ვიყოთ all-in-one საბუღალტრო და ფინანსური პლატფორმა მცირე ბიზნესებისთვის. დროთა განმავლობაში დავამატებთ ახალ პროდუქტებს და ამაში 500 Startups აქელერატორიც დიდ როლს ითამაშებს.“ – ამბობს მიშო.
კითხვაზე, თუ რამდენადაა მზად ქართული ბიზნეს საზოგადოება, რომ „კერნელი“ მათი „მარჯვენა ხელი“ გახდეს, პასუხი ასეთია:
„ნაწილობრივ, კონსერვატიული საზოგადოება ვართ, თუმცა ჩვენი გამოცდილებით თუ რეალურ პრობლემას გადაჭრი ინოვაციური გზით, მიმღებლობის პრობლემა უბრალოდ, ქრება. ჩვენი მიზანია Excel საერთოდ ამოვიღოთ ბიზნესის ცხოვრებიდან და მათ ალტერნატიული, მარტივად მოხმარებადი, სერვისი შევთავაზოთ“ – გვიყვება „კერნელის“ CMO.
პლატფორმის პირველი ვერსია 2.5 თვის წინ ჩაეშვა და 2020 წლის ბოლოს სავარაუდოდ, 5000 დარეგისტრირებული მომხმარებელი ეყოლება. ბექა დალაქიშვილს, მიშო ზღულაძეს და გუსტავ გროთს უკვე მობილიზებული აქვთ 130 000 ლარი ინვესტიციის სახით და საერთაშორისო ბაზრებზე გასვლის ამბიციაც დღის წესრიგში დგას. „ინოვაციებისა და ტექნოლოგიების სააგენტოს“ გრანტის გამარჯვების შემდეგ, „კერნელი“ 500 Startups-ის აქსელერატორშიც მოხვდა და მსოფლიო დონის მენტორებთან გაივლის ტრენინგებს პროდუქტის დასახვეწად. მათი მრავალწლიანი გამოცდილება სტარტაპ ეკოსისტემასა და ფინანსურ სექტორში კარგი საფუძველი იქნება იმისთვის, რომ საქართველოში დაფუძნებლი საბუღალტრო და ფინანსური პლატფორმა ბიზნესის „მარჯვენა ხელი“ გახდეს.