ვილი სანიოლის 26 რჩეული ფეხბურთელი და ტაქტიკა – პროგნოზები ისტორიული მატჩების წინ

მოახლოვდა ნანატრი ევროპის ჩემპიონატი ფეხბურთში, რომელიც გერმანიის რამდენიმე ქალაქში გაიმართება – ორ თვეზე მეტი გავიდა 26 მარტის ჯადოსნური საღამოდან, როდესაც ოფიციალურად დადასტურდა ის ფაქტი, რომ საქართველოს ეროვნული ნაკრები ისტორიაში პირველად მიიღებს კონტინენტის პირველობის ფინალურ ეტაპზე მონაწილეობას.

გულშემატკივრისა და ფეხბურთელები სიხარული, ბედნიერების ძალა და ინერცია ამ დრომდე არ განელებულა, რაც უპირატესობას გვაძლევს ჩვენ, როგორც დებიუტანტ ნაკრებს, საუკეთესო ფიზიკურ თუ ფსიქოლოგიურ განწყობაზე შევხვდეთ ევროპის კონტინენტის უდიდეს საფეხბურთო ფორუმს.

ჩვენი ნაკრების მთავარმა მწვრთნელმა, ფრანგმა სპეციალისტმა, ვილი სანიოლმა ტურნირისთვის 26 რჩეული ფეხბურთელი აარჩია და დაეყრდნო უკვე ნაცად პრაქტიკას – უპირატესობა მიანიჭა გამოცდილებას:

მეკარე: გიორგი მამარდაშვილი, გიორგი ლორია, ლუკა გუგეშაშვილი.

დაცვა: საბა კვერკველია, გურამ კაშია, გიორგი გველესიანი, ლაშა დვალი, ლუკა ლოჩოშვილი, ოთარ კაკაბაძე, ლევან შენგელია, გიორგი წიტაიშვილი, გიორგი გოჩოლეიშვილი, ჯიმი ტაბიძე.

ნახევარდაცვა: ოთარ კიტეიშვილი, ნიკა კვეკვესკირი, გიორგი ჩაკვეტაძე, სანდრო ალთუნაშვილი, გიორგი ქოჩორაშვილი, ანზორ მექვაბიშვილი, გაბრიელ სიგუა, საბა ლობჟანიძე, ზურიკო დავითაშვილი.

თავდასხმა: გიორგი მიქაუტაძე, ბუდუ ზივზივაძე, გიორგი ქვილითაია, ხვიჩა კვარაცხელია.

მაისის თვის ბოლოდან საქართველოს ეროვნული ნაკრების ყველა წევრი იმყოფება საერთო შეკრებაზე ავსტრიაში, სადაც გამართავს კიდეც ერთ ამხანაგურ მატჩს – 9 ივნისს ჩვენი ნაკრები მონტენეგროს დაუპირისპირდება და საინტერესოა, რა ტაქტიკურ იდეებსა და შემადგენლობას გატესტავს ვილი ევროპის ჩემპიონატის წინ.

მთავარი მწვრთნელის პირველად სიაში მოხვდა ლეგენდარული ქართველი ვეტერანი ფეხბურთელი, ჯაბა კანკავაც, რომელმაც საკუთარი ინიციატივით განაცხადა, რომ გერმანიაში ის მხოლოდ გულშემატკივრის რანგში გაემგზავრება, ამიტომაც მისი ადგილი ნაკრების შემადგენლობაში შვეიცარიული ბაზელის საყრდენმა ნახევარმცველმა, გაბრიელ სიგუამ დაიკავა.

საქართველოს ნაკრები F ჯგუფში მოხვდა, სადაც მეტოქეები პორტუგალია, თურქეთი და ჩეხეთი გვეყოლება:

საქართველო VS თურქეთი – 18 ივნისი, 20:00 საათი, ქალაქი დორტმუნდი;

საქართველო VS ჩეხეთი – 22 ივნისი, 17:00 საათი, ქალაქი ჰამბურგი;

საქართველო VS პორტუგალია – 26 ივნისი, 23:00 საათი, ქალაქი გელზენკირხენი.

რაც შეეხება ჩვენი შემადგენლობის ახლანდელ კონდიციას, მოსალოდნელ ტაქტიკურ წყობასა და როტაციას – დიდია იმის ალბათობა, რომ ვილი სანიოლმა და მისმა თანაშემწეებმა, ერთა ლიგის ნახევარფინალისა და ფინალის მსგავსად, ჯგუფური ეტაპის თამაშებშიც 3-4-2-1 ტაქტიკა აირჩიონ.

შესანიშნავი სეზონი ჰქონდა ჩვენი ნაკრების მთავარ მეკარეს, გიორგი მამარდაშვილს; ტრადიციად ქცეული დაცვის ტრიოც (კაშია კვერკველია დვალი) კარგ ფორმაში ხვდებიან ტურნირს და სავარაუდოა, რომ კვლავ ისინი გაამაგრებენ ჩვენს დაცვით ხაზს;

რაც შეეხება მარჯვენა და მარცხენა ნახევარმცველებს, ასევე კარგ ფიზიკურ ფორმაშია ოთარ კაკაბაძეც, ლევან შენგელიას კი მარტის თამაშების მერე ტრავმა აწუხებდა, თუმცა მომჯობინდა. ნებისმიერ შემთხვევაში, გუნდში არიან ფეხბურთელები, რომელთაც სრულფასოვნად შეუძლიათ ამ კონკრეტულ პოზიციებზე ძირითადი ფეხბურთელების შეცვლა. ქოჩორაშვილიკიტეიშვილის დუო, ოდნავ წინ კი გიორგი ჩაკვეტაძე – ეს იყო ერთა ლიგის გადამწყვეტ ეტაპზე ჩვენი ნახევარდაცვის სამეული და თითოეულმა შესანიშნავად გაართვა თავი ყველა საჭირო მოვალეობას, ამიტომაც იმავე სამ ფეხბურთელს უნდა ველოდოთ დაცვის ცენტრში;

ყველაზე საინტერესო და რთულად სავარაუდო მაინც თავდასხმაა – ვინ გაუწყვილდება ხვიჩა კვარაცხელიას: ბუდუ ზივზივაძე თუ გიორგი მიქაუტაძე? ორივე შესანიშნავ ფორმაშია, ორივემ ბევრი გოლი შეაგდო საკლუბო სეზონში, ყველაფერი ვილის გადაწყვეტილებაზე იქნება დამოკიდებული, ჩვენ ორივეს ბრძოლისუნარიანობისა და გოლის ალღოსი გვეიმედება.

დიდი ფუფუნებაა, სათადარიგოთა სკამზე გეჯდეს და სულ გეიმედებოდეს ისეთი ფეხბურთელების, როგორებიც არიან ზურიკო დავითაშვილი, გიორგი გოჩოლეიშვილი, საბა ლობჟანიძე, ლუკა ლოჩოშვილი და ა.შ. მათ კარგი სეზონები ჰქონდათ ევროპულ საფეხბურთო ჩემპიონატებში და აუცილებლად იქნებიან საჭირონი როტაციის დროს, რადგანაც სულ რაღაც 8 დღეში უნდა გავმართოთ 3 თამაში; სავარაუდოა აქტიური ცვლილებები, შესაძლოა ტაქტიკური გადაადგილებებიც კი, ყველაფერი უშუალოდ პროცესზეა დამოკიდებული.

ბიჭები შესანიშნავ ფორმაში არიან, ჩვენ გვჯერა მათი, მათ სჯერათ საკუთარი თავის – ყველაფერი წინ არის!

წაიკითხე მეტი:

ტატო ბაციკაძე: გრძელი, თუმცა საიმედო გზა დიდ საფეხბურთო გამარჯვებამდე

არ გაჩერდე, გააგრძელე კითხვა