საქართველოს ბანკი საქართველოს ოლიმპიური ნაკრების მთავარი სპონსორია და არა მარტო – ყოველთვის და ყველგან მხარს უჭერს ადამიანებს, რომლებიც არ ჩერდებიან და საკუთარი წარმატებით უკეთეს საქართველოს ქმნიან.
ფეხბურთს ერთი უცნაური და საკმაოდ იშვიათი რამ ახასიათებს – უნარი, საერთო სიხარულით გააერთიანოს ყველა, მათ შორის ის ადამიანებიც, რომლებიც სპორტისა და ფეხბურთისადმი გულგრილად არიან განწყობილნი. ამის ყველაზე ნათელი მაგალითი 26 მარტს, საქართველო-საბერძნეთის მატჩის შემდეგ დავინახეთ, როდესაც საქართველოს ისტორიაში პირველად ეროვნული ნაკრები ევროპის ჩემპიონატზე გავიდა.
ამ საერთო სიხარულში ყველას თავისი წვლილი აქვს შეტანილი – პირველ რიგში, ფეხბურთელებს, მწვრთნელებს, მსაჯებს, გულშემატკივრებს. მათ შორის კომენტატორებსაც, რომლებიც, ჩვენთან ერთად, ამ სიხარულის ერთ-ერთი პირველი გამზიარებლები არიან – თითქოს მთავარ მაკავშირებელ ხიდს წარმოადგენენ სათამაშო მოედანსა და იმ მაყურებლებს შორის, რომლებიც თამაშს ტრიბუნებიდან მოშორებით, ტელევიზორში უყურებენ. სწორედ კომენტატორების სიხარული, აღფთოვანება, ბრაზი თუ სევდაა ხოლმე ყველაზე მეტად გადამდები და მუხტის მომცემი გულშემატკივრებისთვის.
საქართველოში ფეხბურთს ყოველთვის ჰქონდა დიდი და მნიშვნელოვანი როლი, როგორც სპორტული და სოციალური, ისე სახელოვნებო კუთხითაც – იღებდნენ ფილმებს ფეხბურთზე და წერდნენ სიმღერებს საფეხბურთო გამარჯვებებზე. ისტორიას ბევრი საინტერესო და პროფესიონალი კომენტატორიც ახსოვს. ერთ-ერთი მათგანია ტატო ბაციკაძე, რომლის კარიერა 14 წელს ითვლის და რომლის სახელიც ფეხბურთის გულშემატკივრებისთვის კარგად ნაცნობია.
ტატო ფეხბურთის ისტორიაში არაერთი ისტორიული მომენტის მომსწრე და გამზიარებელია. შეუძლებელია, მრავალწლიანი დაკვირვების შემდეგ, ბევრი საინტერესო აღმოჩენა არ დაგიგროვდეს. ერთ-ერთი ყველაზე მნიშვნელოვანი, რასაც ტატო თავისი ხანგრძლივი გამოცდილების შედეგად გვიზიარებს არის ის, თუ რამდენად მნიშვნელოვანია, რომ ის საქმე აკეთო, რისი კეთებაც გიყვარს და გსიამოვნებს, თან ისე, როგორც ამას შენი გული და ინტუიცია გკარნახობს.
მთავარი პროცესია და არა საბოლოო შედეგი. შეიძლება კონკრეტული გამარჯვებები ვერ მოიპოვო, მაგრამ შენი თავდაუზოგავი შრომით სხვებს, მომავალ თაობას დაეხმარო გზის გაკვალვაში და საერთო მიზნის მიღწევაში. ტატოს აზრით, მნიშვნელოვანია, რომ შედეგზე მეტად პროცესზე და იმ გზაზე კონცენტრირდე, რომელსაც გადიხარ. რადგან იმ შემთხვევაშიც კი, თუ ეს თავდაუზოგავი შრომა სათანადოდ არ დაგიფასდა, კმაყოფილების და სიამოვნების მომგვრელია იმის ცოდნა, რომ მთელი ეს დრო შენი საქმის გულწრფელი სიყვარული გამოძრავებდა და დანებების საშუალებას არ გაძლევდა.
ტატოს დაკვირვებით, მთავარია, რომ უშფოთველად, მშვიდად და აუღელვებლად იარო შენი არჩეული გზით, ისე, რომ შენი მიზანი სწორედ ეს გზა იყოს და არა ამ გზის კულმინაცია – გამარჯვება. ეს სიმშვიდე და საკუთარი საქმის სიყვარული, რაღაც დროს აუცილებლად მიგიყვანს საბოლოო დაფასებამდე. შესაძლოა მთელი ცხოვრება ისე იცხოვრო, რომ სულაც არ გქონდეს დიდი გამარჯვების ჟინი, მაგრამ მხოლოდ იმიტომ რომ შენს არჩეულ პროფესიას გულითა და ინტერესით მიყვებოდი, ამ გამარჯვებამდეც თავისდაუნებურად მიხვიდე. ფეხბურთის ისტორიასაც ბევრი ისეთი გუნდი ახსოვს, რომლებმაც სწორედ ამ გულწრფელი სიყვარულის, არ დანებების და არ გაჩერების ხარჯზე, დაუჯერებელი თამაშები ჩაატარეს და მსოფლიო ჩემპიონებიც გახდნენ, მიუხედავად იმისა, რომ მათგან ამას ცოტა თუ მოელოდა.
სწორედ ამ გზას გადის ახლა ქართული ფეხბურთიც, რომელმაც ეს გამარჯვება და ევროპის ჩემპიონატზე გასვლა, მრავალწლიანი არ დანებების და არ გაჩერების შედეგად მოიპოვა. ეს გამარჯვება პირველ რიგში, ფეხბურთელებსა და მწვრთნელებს ეკუთვნით, შემდეგ კი გულშემატკივრების, რომლებმაც ყველაზე უკეთ იციან იმ სიხარულის ფასი, რომელიც ერთხელ მაინც თუ გამოცადე, არასდროს ნელდება. საბოლოო ჯამში, ფეხბურთიც ალბათ სწორედ ამ ადამიანური შეგრძნების სიმბოლოა – ერთიანობისა და გადამდები სიხარულის.
წლევანდელ ევროპის ჩემპიონატს გერმანია მასპინძლობს, სადაც საქართველო პირველ მატჩს თურქეთთან 18 ივნისს ითამაშებს. საბოლოო გამარჯვებამდე და ევროპის ჩემპიონობამდე კიდევ ბევრი ბრძოლაა გასავლელი, რომელსაც, როგორც ტატო ბაციკაძე აღნიშნავს, ნელი, მშვიდი, თუმცა საიმედო გზით ადრე თუ გვიან აუცილებლად მივაღწევთ. მას კი, როგორც მრავალწლიან გამოცდილ კომენტატორსა და ფეხბურთის დიდ დამკვირვებელს, ნამდვილად დაეჯერება.