საქართველოში გლობალური ვენჩურული საინვესტიციო კომპანიის, 500 Global-ის, აქსელერაციის რეგიონული პროგრამა — 500 Global in Eurasia კვლავ გრძელდება. საქართველოს ბანკისა და საქართველოს ინოვაციების და ტექნოლოგიების სააგენტოს (GITA) თანამშრომლობით, 500 Global in Eurasia-ს მეექვსე ნაკადის მონაწილეების გადამზადება უკვე დაიწყო. პროგრამის მიზანია, მსოფლიოს წამყვანი ექსპერტების მიერ თეორიული და პრაქტიკული ცოდნის გაზიარების საფუძველზე, სტარტაპებს ბიზნესების განვითარებასა და მათი კომპანიების ფართო აუდიტორიისთვის გაცნობაში დაეხმაროს. 500 Global in Eurasia-ს აქსელერაციის პროგრამა 12-კვირიან ინტენსიურ გადამზადებას მოიცავს, რომელსაც მეექვსე ნაკადში შემდეგ მენტორები გაუძღვებიან:
პედრო სანტოს ვიეირა
პედრო სანტოს ვიეირა, 500 Global-ის პარტნიორი და 500 Global in Eurasia-ს აქსელერაციის პროგრამის ხელმძღვანელი, პორტუგალიელი ინვესტორი და მენტორია, რომელსაც ტექინდუსტრიაში მუშაობის მრავალწლიანი გამოცდილება აქვს. პედრომ სადოქტორო ხარისხი კალიფორნიის უნივერსიტეტში დაიცვა, მისმა კვლევებმა და პუბლიკაციებმა კი ევროპასა და აშშ-ში არაერთი ჯილდო მოიპოვა. პედრო თავდაპირველად მენეჯმენტის კონსულტანტად მუშაობდა, შემდეგ კი მისი პირველი სტარტაპი GoodGuide დააფუძნა. მოგვიანებით, პედრომ ორგანიზაცია West to West დააარსა, რომელიც მეწარმეებს სილიკონ ველიზე წარმატების მიღწევაში ეხმარება.
წლებია, პედრო ვიეირა როგორც დამწყებ, ასევე დიდ კომპანიებს სტრატეგიის შემუშავებასა და გაყიდვების ზრდაში ეხმარება. ცოტა ხნის წინ პედრომ Shilling Founders Fund დააარსა, რომელიც ადრეულ ეტაპზე მყოფ სტარტაპებს კონსულტირებას უწევს. ასევე, პედრო 500 Global-ის პარტნიორი და 500 Global in Eurasia-ს აქსელერაციის პროგრამის ხელმძღვანელია. პედრო პროგრამის წინა ნაკადების მენტორიც იყო, ახლა კი თავის ცოდნასა და გამოცდილებას მეექვსე ნაკადის მონაწილეებს უზიარებს.
ჯუსტინა იასტჟებსკა
ჯუსტინა იასტჟებსკა მარკეტინგის სპეციალისტია და 16-წლიანი გამოცდილების განმავლობაში წარმატების მიღწევაში მსოფლიო მასშტაბით უამრავ ბიზნესს და სტარტაპს დაეხმარა. ჯუსტინას გამოცდილება მოიცავს როგორც ეფექტური სტრატეგიების დაგეგმვას, მარკეტინგული ფუნქციების შემუშავებასა და ინვესტორების მოზიდვას, ასევე იმეილ მარკეტინგსა და ელექტრონული კომერციის ოპტიმიზაციას. ჯუსტინას მიერ შემუშავებული მეთოდები გაყიდვების ზრდაში ბევრ ცნობილ კომპანიას დახმარებია. მაგალითად, ჯუსტინას კონსულტირებით კომპანია Mindvalley-მ ყოველწლიური შემოსავალი $300 ათასიდან $20 მილიონამდე გაზარდა.
დღეს ჯუსტინა 30-მდე აქსელერაციის პროგრამაშია ჩართული და სტარტაპერებს თავის მარკეტინგულ მიდგომებსა და პრაქტიკულ ცოდნას უზიარებს. ჯუსტინამ გლობალური აქსელერაციების პროგრამების 900-მდე მონაწილე სტარტაპის განვითარებას შეუწყო ხელი, რომლებმაც ბიზნესები სხვადასხვა ქვეყანაში გააფართოვეს და გაყიდვებში დიდ წარმატებასაც მიაღწიეს.
ტიმურ დაუდპოტა
ტიმურ დაუდპოტა თავადაც სტარტაპის დამფუძნებელი და 500 Global-ის აქსელერაციის პროგრამის ყოფილი მონაწილეა. კარიერის განმავლობაში ტიმური ისეთ ცნობილ ბრენდებთან მუშაობდა, როგორებიცაა Coca-Cola, Burger King, Disney და Invisalign. ჩამოთვლილ ბრენდებს ტიმური მარკეტინგის კამპანიების წარმოებაში ეხმარებოდა. ტიმური ასევე თანამშრომლობდა უმსხვილეს გამომცემლებთან, რომელთა შორისაა Time Inc, GQ, TechCrunch, Vogue და სხვა. B2B გაყიდვების მოდელის გამოყენებით, ტიმური ცნობილ გამომცემლებს კომერციული წარმატების მიღწევაში დაეხმარა.
მრავალწლიანი გამოცდილების ფარგლებში ტიმურს უკვე 2000-ზე მეტ სტარტაპთან უმუშავია. 500 Global-ის სტარტაპერობიდან მენტორობამდე ტიმურმა გრძელი და საინტერესო გზა განვლო, ახლა კი დამწყებ ბიზნესებს თავის გამოცდილებასა და ცოდნას უზიარებს.
ბრიანა სალინასი
ბრიანა სალინასი სტარტაპ მრჩეველი და მენტორია, რომელიც წარმატების მიღწევაში უკვე 500-ზე მეტ კომპანიას დაეხმარა. ბრიანას საქმიანობა მოიცავს მომხმარებლის მოზიდვის, შენარჩუნებისა და ზრდის სტრატეგიების შემუშავებას, რამაც ბევრი სტარტაპი მსხვილ ბიზნესად უკვე აქცია. ბრიანა თავდაპირველად დამწყები სტარტაპებისთვის შემოსავლებზე ორიენტირებულ გუნდებს ხელმძღვანელობდა. ეტაპობრივად კი ბრიანამ მომხმარებელთა წარმატების, გაყიდვების განვითარების, მარკეტინგის, HR-ის, პროექტის მენეჯმენტისა და ინჟინერიის მიმართულებით 800-ზე მეტი ადამიანისგან შემდგარი გუნდი ჩამოაყალიბა, რომელიც გაყიდვების ზრდაში უამრავ დამწყებ და მსხვილს ბიზნესს დაეხმარა.
ბრიანა YCombinator-ის მიერ მხარდაჭერილ ორ კომპანიაშიც მუშაობდა, რომელთა მოგებამ $50 მილიონზე მეტი შეადგინა. კარიერის განმავლობაში ბრიანა ხელმძღვანელობდა ასობით სტარტაპს, რომლებიც მსოფლიო ბაზარზე გაფართოვდნენ და ჯამში $700 მილიონზე მეტი გამოიმუშავეს.