საქართველოს ბანკის მხარდაჭერით 29 ივნისს 500 Georgia-ს მე-4 ნაკადის დემო დღე გაიმართა, სადაც ტექნოლოგიური სტარტაპების დამფუძნებლებმა დაინტერესებულ საზოგადოებას თავიანთი ინოვაციური პროდუქტები წარუდგინეს. მათ შორის ერთ-ერთი იყო Bilimber.
„ჩვენი საქმიანობა ერთი წლის წინ დავიწყეთ და უკვე 60 000-მდე მოსწავლე გვყავს, რომლებიც ყოველთვიურად სწავლობენ ჩვენს პლატფორმაზე,“ – ასე დაიწყო თავისი გამოსვლა Bilimber-ის თანადამფუძნებელმა, აკბოტა მუსსამ.
Bilimber-ის მისიაა, 6-დან 12 კლასამდე მოსწავლეებს დაეხმაროს, საუკეთესო მასწავლებლებს 60 წამზე ნაკლებ დროში დაუკავშირდნენ.
და მიუხედავად იმისა, რომ დღესდღეობით მრავალი საგანმანათლებლო პლატფორმა არსებობს, მაინც რაში მდგომარეობს ამ სტარტაპის ინოვაციური ხედვა? აკბოტას თქმით, სტარტაპი სტუდენტებს რეგიონში ყველაზე ფართო მონაცემთა ბაზაზე აძლევს წვდომას, ეხმარება მათ თავიანთ პროგრესს თვალი ადევნონ და შექმნან პერსონალიზებული სასწავლო სტრატეგია. ხოლო როცა სტუდენტებს დამატებითი დახმარება სჭირდებათ, Bilimber მათ საუკეთესო რეპეტიტორებთან უმოკლეს ვადაში აკავშირებს.
„ჩვენი მომხმარებლების 40% Bilimber-ს ყოველდღიურად იყენებს, რაც გვაძლევს შესაძლებლობას, თვიდან თვემდე 25%-ით გავიზარდოთ,“ – აღნიშნა აკბოტამ.
სტარტაპის თანადამფუძნებელმა Bilimber-ის ბიზნესმოდელზეც ისაუბრა და აღნიშნა, რომ პლატფორმა მოგებას ტრადიციული, გამოწერის გზით – რეპეტიტორებთან დაკავშირებითა და ონლაინკურსებზე წვდომით – იღებს.
„დღემდე ჩვენ შევქმენით წარმატებული B2C და საგანმანათლებლო პროდუქტები და ამჟამადაც ვცდილობთ, დავეხმაროთ მოსწავლეებს საუკეთესო სასწავლო უნარების განვითარებაში.“