ირაკლი ვეკუამ და ირაკლი ჯინჯიხაძემ პანდემიის პერიოდში გადაწყვიტეს, მასწავლებლებისთვის შეექმნათ პლატფორმა (Kings, რომელიც მათ ონლაინ ოლიმპიადების ჩატარებაში დაეხმარებოდათ. სწორედ ამ იდეით ისინი ცოტა ხნის წინ 500 Georgia-ს აქსელერაციის პროგრამაში მოხვდნენ.
როგორ ეხმარება რეალურად ეს პლატფორმა მასწავლებლებს და რა გზა გაიარა Kings-მა დაფუძნებიდან დღემდე? ამ თემებზე ირაკლი ჯინჯიხაძე გვესაუბრა:
– ვინ Kings-ის დამფუძნებლები და რა ბექგრაუნდი აქვთ მათ ამ სფეროში?
დამფუძნებლები ვართ მე, ირაკლი ჯინჯიხაძე და ირაკლი ვეკუა. 2014 წლიდან 2016 წლამდე ვიყავი კინგსი საქართველოს დირექტორი და შესაბამისად, პირდაპირი შეხება მქონდა მასწავლებლებთან, მოსწავლეებთან და მათ მშობლებთან. 2016 წლიდან ვხელმძღვანელობდი კინგსის ექსპანსიას ევროკავშირის ქვეყნებში. ამ გამოცდილებიდან გამომდინარე, კარგად ვიცნობ იმ გამოწვევებს, რაც მასწავლებლებსა და მოსწავლეებს აქვთ სხვადასხვა ქვეყანაში.
– მოკლედ გვიამბეთ, საიდან გაჩნდა თქვენი სტარტაპის შექმნის იდეა?
როცა COVID-19-ს დაიწყო, ბუნებრივია, მაქსიმალურად შეიზღუდა მასწავლებლებისა და მოსწავლეების ფიზიკური კონტაქტი, თვეების განმავლობაში სკოლები დაიხურა და გადავიდა ონლაინ სწავლებაზე. მასწავლებლები ლიეტუვაში და არა მარტო ამ ქვეყანაში, იძულებულები იყვნენ, გამოეყენებინათ სხვადასხვა ონლაინ ხელსაწყოები, რათა სწავლების პროცესი არ შეჩერებულიყო. შესაბამისად, მათი დამოკიდებულება სხვადასხვა ონლაინ პლატფორმასთან დაკავშირებით, რადიკალურად შეიცვალა. სწორედ ამ დროს გადავწყვიტეთ მასწავლებლებისთვის შეგვეთავაზებინა პლატფორმა, რომელიც დაეხმარებოდა მათ ონლაინ ოლიმპიადების ჩატარებაში.
– დეტალურად გვიამბეთ, რას სთავაზობს კინგსი მომხმარებლებს და რა პრობლემას წყვეტს ის?
მასწავლებლებს, ხშირ შემთხვევაში, გაანალიზებული აქვთ, თუ რა ბენეფიტები მოაქვს მოსწავლეებისთვის ოლიმპიადებში მონაწილეობას. ისინი ყოველწლიურად აორგანიზებენ მსგავს შეჯიბრებებს თავიანთ სკოლებში, რაც საკმაოდ შრომატევადია და მათი მხრიდან დიდ დროს მოითხოვს. ჩვენი პლატფორმის საშუალებით კი, პედაგოგებს საშუალება აქვთ, ოლიმპიადა დააორგანიზონ პროცესებში უშუალო მონაწილეობის გარეშე, ერთადერთი რაც მათი მხრიდანაა საჭირო, პლატფორმაზე თავიანთი პროფილის შექმნა და ჩვენ მიერ წინასწარ გამოცხადებულ ოლიმპიადებზე მოსწავლეთა რეგისტრაციაა. სხვა დანარჩენი პროცესი: ტესტირება, ნაშრომების გასწორება, შედეგების გამოქვეყნება და მოსწავლეებისთვის ინდივიდუალირი უკუკავშირის დაბრუნება ავტომატიზირებულია.
– როდის დაიწყეთ სტარტაპზე მუშაობა?
პროდუქტზე მუშაობა 2020 წელს, პანდემიის დადგომისთანავე დავიწყეთ და მოვახერხეთ, რომ ამავე წელს, შემოდგომაზე ჩაგვეშვა ლიეტუვაში.
– რა სირთულეები გხვდებოდათ სტარტაპის განვითარებასთან ერთად?
ზოგადად, ყველაზე მნიშვნელოვანი, ალბათ, გუნდის სწორი წევრების შერჩევის პროცესია. თუმცა, ლიეტუვაში ოპერირება სწორედ ამ სირთულის თავიდან არიდების მიზნით დავიწყეთ: წარსული გამოცდილებიდან გამომდინარე, გამოვიყენეთ ის კონტაქტები, რომელიც ამ ქვეყანაში გვქონდა.
– რა ეტაპზეა სტარტაპი ამჟამად?
ამჟამად ჩვენი სტარტაპი ორ ბაზარზე ოპერირებს (ლიეტუვა, ბულგარეთი. ჩვენ მიერ ორგანიზებულ ოლიმპიადებში ყოველწლიურად 100 000-ზე მეტი მოსწავლე მონაწილეობს.
– რატომ გაგიჩნდათ სურვილი, შეგევსოთ 500 Georgia-ს აპლიკაცია?
უკვე 2 წელია, ვოპერირებთ ლიეტუვის ბაზარზე, 2022 წლიდან კი – ბულგარეთის ბაზარზე. ვფიქრობთ, რომ Product Market Fit ნაპოვნი გვაქვს. შემდგომი სწრაფი განვითარებისთვის 500 Georgia სწორედ ის ადგილია, სადაც უნდა ვიყოთ.
– როგორი მოლოდინები გაქვთ პროგრამასთან დაკავშირებით?
რა თქმა უნდა, პოზიტიური მოლოდინები გვაქვს, განსაკუთრებით კი fundraising – თან დაკავშირებით.
– როგორ ფიქრობთ, რა შესაძლებლობას აძლევს 500 Georgia სტარტაპებს და რატომაა მნიშვნელოვანი მათთვის ამ პროგრამაში მონაწილეობის მიღება?
ჩემი აზრით, ხშირად სტარტაპები, ინტენსიური სამუშაო გრაფიკიდან გამომდინარე საკმარის ყურადღებას არ უთმობენ ისეთი მნიშვნელოვანი საკითხების სიღმისეულ გააზრებას, როგორებიცაა: Value proposition, ვინ არის პროდუქტის რეალური მომხმარებელი, ბიზნესმოდელი და ა.შ აქსელერატორები, კი ხშირ შემთხვევაში ასეთ საკითხებზე ფოკუსირებულად მუშაობენ სტარტაპებთან ერთად.
– და ბოლოს, ზოგადად, როგორია თქვენი სამომავლო გეგმები?
მომდევნო წლების განმავლობაში ვგეგმავთ სხვა, უფრო დიდი ქვეყნების ბაზრებზე შესვლას.