არ ვიცი აქამდე იცოდით თუ არა, რომ ყოველწლიურად მსოფლიოში 275 მილიონ ადამიანს სჭირდება ფიზიკური თერაპია, მაგრამ ამ სერვისის მოთხოვნა-მიწოდების რაოდენობა ნამდვილად არ არის ოქროს შუალედში. ამ მონაცემიდან გამომდინარე, 1 თერაპევტზე საშუალოდ 700 პაციენტი მოდის, მაგრამ ერთ ექიმს მაქსიმუმ 300 ადამიანისათვის შეუძლია მომსახურების გაწევა.
ზოგადად რეაბილიტაცია ძალიან დამღლელი, მოსაწყენი და ხანგრძლივი პროცესია. ამ დროს როგორც პაციენტი ისე ფიზიოთერაპევტი მოტივაციას კარგავს და ხშირად რეაბილიტაციას ადამიანები დროზე ადრე ასრულებენ.
Raccoon Recovery არის პროდუქტი, რომელიც თერაპევტს ეხმარება შექმნას ბევრად ეფექტური კურსი, რომელიც პაციენტის მოტივაციას ზრდის. ამ პროცესში პაციენტი იყენებს Raccoon Recovery-ის ხელით მართვად კონტროლერსა და 3D სენსორებს, რომელიც ფუნქციონირებისათვის კამერებს არ საჭიროებს. კონტროლერის დახმარებით პაციენტი თამაშობს ვიდეო თამაშს, ხოლო სენსორები რომელიც დამონტაჟებულია სხეულის დაზიანებულ ნაწილზე, აკვირდება მოძრაობებს და ინფორმაციას აგროვებს. სტარტაპის უნიკალური ალგორითმი საშუალებას იძლევა დაუკავშირდეთ თქვენთვის სასურველ ნებისმიერ ვიდეო თამაშს, რომელიც არსებობს კომპიუტერზე. ეს მოწყობილობები შეგროვებულ ინფორმაციას გზავნიან ჩვენს სისტემაში და ფიზიოთერაპევტს შეუძლია დეტალურად დააკვირდეს პაციენტის მიმდინარე პროგრესს.
„პროდუქტის განვითარებაზე აქტიურად ვაგრძელებდით მუშაობას და მოულოდნელად COVID-19-მა ჩვენი ბიზნესი და მთლიანად ეს სექტორი გააჩერა. მახსოვს 12 მარტს ერთ-ერთი სარეაბილიტაციო ცენტრი, რომელთანაც ვთანამშრომლობთ დაგვიკავშირდა და გვამცნო, რომ ფუნქციონირებას წყვეტდა, რადგან კარანტინის პირობებში პაციენტებთან მუშაობა შეუძლებელი იყო.
მე და ჩემი გუნდი სასწრაფოდ შევიკრიბეთ და დავიწყეთ იმაზე ფიქრი თუ როგორ შეიძლებოდა დავხმარებოდით ჩვენს კლიენტებს და სულ რაღაც ორ საათში დავიწყეთ ახალ Raccoon Recovery light-ზე მუშაობა. ჩვენ ავიღეთ ჩვენი ძირითადი პროდუქტი, რომელიც უკვე სერტიფიცირებული იყო და ამ პროგრამულ უზრუნველყოფას დავამატეთ ვიდეო ქოლი, ჩათი და ვიდეო გაკვეთილები, რომლითაც პაციენტს დამოუკიდებლად შეეძლებოდა სახლში გაეგრძელებინა ფიზიო თერაპია,“ – გვიყვება კომპანიის CEO სვეტლანა მალოვანა.
ახალ პროდუქტზე გადაწყობა სტარტაპისთვის ყველაზე რთული პროცესი არ ყოფილა. კომპანიის მთავარი გამოწვევა იყო მათი მოწყობილობები, რომლებიც ვერ მიჰქონდათ მომხმარებლამდე. შესაბამისად ფიზიოთერაპევტები აღდგენითი პროცესის მონიტორინგს ვერ აკვირდებოდნენ. ამ პრობლემის მოსაგვარებლად მათ საკმაოდ ამბიციური გეგმა მოიფიქრეს. სენსორების მაგივრად გადაწყვიტეს გამოეყენებინათ სმარტფონები და სხვადასხვა კვლევისა და ტესტირებების შემდეგ საბოლოოდ იდეამ იმუშავა.
სწორედ ასეთ რთულ პერიოდში სტარტაპი ჩაერთო 500 Startup-ის აქსელერაციის პროგრამაში და მენტორებთან ერთად მუშაობს პროდუქტის კიდევ უფრო დახვეწაზე, რათა ორივე მხარისათვის ოპტიმალური და კომფორტული იყოს თერაპიის პროცესი.
„500 Startups-ის აქსელერაციის პროგრამაში გადავწყვიტეთ მონაწილეობა, რადგან აქამდეც ვიცოდით მათი პროფესიონალიზმის შესახებ. ჩვენი გუნდი მოელის, რომ მენტორებისგან მივიღებთ ცოდნას, გამოცდილებასა და ხელშეწყობას, იმისათვის, რომ დეტალურად დავგეგმოთ ჩვენი “roadmap”, განვსაზღვროთ გაყიდვების ახალი არხები და შევძლოთ გავაფართოვოთ ჩვენი ზოგადი ხედვა.
ჩვენი მთავარი მიზანი ამ მომენტში გერმანიისა და პოლონეთის ბაზრის სრულად ათვისებაა, შემდეგში კი ვფიქრობთ, რომ გავფართოვდეთ და შევიდეთ საქართველოს, იტალიისა და ინდოეთის ბაზრებზე. სწორედ ამიტომ, გვჭირდება ისეთი გამოცდილების გაზიარება, როგორიც 500 Startups-ს მენტორებს აქვთ. მათ საერთაშორისო დონეზე მუშაობის დიდი გამოცდილება აქვთ და კარგად იციან თუ როგორ დავგეგმოთ B2B ბაზარზე გაყიდვები,“ – ამბობს სვეტლანა მალოვანა.
ალბათ დამეთანხმებით, რომ ძალიან კარგი და მისასალმებელია, როდესაც ზოგადად ბიზნესები ამ პანდემიის პერიოდში ეხმარებიან ადმიანებს სხვადასხვა პრობლემის გადაჭრაში. Raccoon ნამდვილად კარგი მაგალითია იმისა თუ როგორ უნდა ადაპტირდე და უპასუხო ახალ გამოწვევებს. ჩვენ კი ისღა დაგვრჩენია სტარტაპს მომავალში წარმატება ვუსურვოთ ბიზნეს საქმიანობასა და აქსელერაციის პროგრამაში.