საერთაშორისო ვაჭრობას დიდი ისტორია აქვს. დღეს, რომ ნებისმიერ ჩვენგანს სახლიდან გაუსვლელად შეგვიძლია ნებისმიერი ადგილიდან გამოვიწეროთ სასურველი პროდუქტი, რამდენიმე საუკუნის წინ ეს სიკვდილ-სიცოცხლესთანაც კი იყო დაკავშირებული. მაგალითად, ჩინეთიდან მომავალმა ვაჭარმა, რომელიც აბრეშუმის გზას მიუყვებოდა, არც კი იცოდა საბოლოო დანიშნულების ადგილს მიაღწევდა თუ არა.
საბედნიეროდ მსოფლიო დღეს ბევრად უსაფრთხო ადგილია და ტექნოლოგიებისა და სატრანსპორტო საშუალებების განვითარებასთან ერთად, განვითარდა საერთაშორისო ვაჭრობაც. დღესდღეობით, ადამიანებისა და ბიზნესის მთავარი საფიქრალი არის, იპოვონ გადამზიდი კომპანია, რომელიც სწრაფად და მისაღებ ფასად ჩამოუტანს საზღვარგარეთ შეძენილ პროდუქტს.
ალბათ დამეთანხმებით, რომ საერთაშორისო გადაზიდვები ტრადიციული საქმიანობაა და ასეთ ბაზარზე ყველაზე რთული სიახლეების დანერგვაა. დღესაც კი, ამ სფეროში დამკვეთიც და მიმწოდებელიც მუშაობას მიჩვეულია ტელეფონით, მეილით, ფაქსით და სხვა უკვე ნაკლებად ეფექტური საშუალებებით. Cargon-ის დამფუძნებლებმა კი გადაწყვიტეს, რომ ამ გამოწვევას გამკლავებოდნენ და შექმნეს ციფრული ლოგისტიკური პლატფორმა, რომელიც სულ რაღაც რამდენიმე ღილაკზე თითის დაჭერით ერთმანეთს აკავშირებს ტვირთის მფლობელსა და გადამზიდს.
„იდეა მას შემდეგ გაჩნდა, რაც გავაანალიზეთ, რომ ერთი წერტილიდან მეორეში პროდუქტის გადაზიდვა კომპლექსური პროცესი იყო და დიდ დროს მოითხოვდა. ჩვენ ვიფიქრეთ, რომ არსებული ტექნოლოგიებით ამ პროცესის მართვა ბევრად სწრაფად და მარტივად იყო შესაძლებელი. ჩვენ შევქმენით ციფრული პლატფორმა, რომელმაც ერთ ვირტუალურ სივრცეში გადამზიდავები და ტვირთის მფლობელები ერთმანეთს დააკავშირა.
პლატფორმაზე მუშაობა ჩვენთვის ყველაზე დიდი სირთულე ნამდვილად არ ყოფილა და სისტემა უკვე წარმატებულად ემსახურება კლიენტებს, მაგრამ გვქონდა სხვა გამოწვევები. საწყის ეტაპზე ძალიან გაგვიჭირდა ადამიანების ქცევების შეცვლა და ჩვენს ციფრულ სისტემაზე გადმოყვანა, რადგან წლების განმავლობაში სხვა ინსტრუმენტებით იყვნენ მუშაობას მიჩვეულები. ასევე გადამზიდი კომპანიების მძღოლებისთვისაც რთული აღმოჩნდა ადაპტაცია, რადგან მოუწიათ ჩვენი აპლიკაციის გადმოწერა და სისტემაში გარკვევა“, – გვიყვება კოპანიის ერთ-ერთი დამფუძნებელი ვანო ჩალაძე.
საწყის ეტაპზე Cargon-ის ძირითადი სამიზნე აუდიტორია საშუალო ზომის ბიზნესები იყო, რომლებიც საკუთარ პროდუქტს აწარმოებდნენ, დღეს კი უკვე დაიწყეს ისეთ კომპანიებთან თანამშრომლობა, რომლებიც საექსპორტო და საიმპორტო საქმიანობით არიან დაკავებულნი. Cargon ბაზარზე უკვე ერთ წელზე მეტია რაც აქტიურად ოპერირებს და უკვე საკმაოდ ბევრი მომხმარებელი ჰყავს, მაგრამ პროდუქტი ჯერ კიდევ განვითარების და დახვეწის ფაზაშია. სწორედ ეს გახდა ერთ-ერთ განმაპირობებელი ფაქტორი, რის გამოც დამფუძნებლებმა 500 Startups-ის აქსელერაციის პროგრამაში მონაწილეობის მიღება გადაწყვიტეს.
„კომპანია ვითარდებოდა, მაგრამ გვქონდა სხვადასხვა წინაღობა, რის გამოც განვითარება ნელა მიდიოდა, მენტორებთან მუშაობით კი შევძელით ეს პროცესი დაგვეჩქარებინა. მაგალითად, სალექციო პროცესის პარალელურად ჩვენ უკვე დავიწყეთ პლატფორმის დიზაინის გადაკეთება და უფრო მეტად დახვეწა. მათი რჩევების გათვალისწინებით, ვქმნით ახალ დიზაინს, რომლის დანერგვის შემდეგაც სისტემით სარგებლობა კიდევ უფრო მარტივი უნდა გახდეს მომხმარებლებისთვის.
აქსელერაციის პროგრამიდან მიღებული ცოდნა ძალიან დაგვეხმარა ნათლად დაგვენახა თუ ვინ არიან ჩვენი პოტენციური კლიენტები და როგორ ვაქციოთ ისინი ლოიალურ მომხმარებლებად. ასევე 500 Startups-ის აქსელერაციის პროგრამა არის შესაძლებლობა გავიდეთ უცხოურ ბაზარზე, რაც ნებისმიერი სტარტაპისათვის ძალიან მნიშვნელოვანია“, – ამბობს ვანო ჩალაძე
გეტყვით, რომ ამ მომენტისათვის სალექციო კურსი დასრულდა და პროგრამაში მონაწილე 15 სტარტაპისათვის დაიწყო საექსპერიმენტო პერიოდი. მონაწილეებს რვა კვირის განმავლობაში მოუწევთ მიღებული ცოდნიდან გამომდინარე პროდუქტში ცვლილებები შეიტანონ. სიახლეების იმპლემენტაციის შემდეგ მიღებული შედეგები კი გახდება განმსაზღვრელი თუ რომელი სტარტაპი გადავა შემდეგ ეტაპზე.