დღესდღეობით მთელს მსოფლიოში ონლაინ მაღაზიების მთავარი გამოწვევა მათ საიტზე შემოსული ვიზიტორების ლოიალურ მომხმარებლებად გადაქცევაა. მარკეტერები ხშირად იყენებენ ტერმინს „bounce rate”. ეს პარამეტრი გვიჩვენებს, საიტზე შემოსული ვიზიტორების რამდენი პროცენტი გავიდა საიტიდან ისე, რომ მხოლოდ ერთი გვერდი ნახა, ესე იგი ონლაინ მაღაზიამ პროდუქტი ვერ გაყიდა. ამიტომ ისინი ძალიან დიდ ფულსა და რესურსებს ხარჯავენ, რომ მათ საიტზე რაც შეიძლება დაბალი „bounce rate” ჰქონდეთ.
სხვადასხვა ანალიტიკური ინსტრუმენტის დახმარებით მარტივად შეგიძლიათ ნახოთ ნებისმიერი ონლაინ მაღაზიის „bounce rate”. ისეთი მსოფლიო დონის ბრენდსაც კი, როგორიც ამაზონია, ეს მაჩვენებელი საშუალოდ 30-35% აქვს. ეს კი ნიშნავს, რომ ყოველი შემოსული 3 ვიზიტორიდან, ერთი ნახულობს მხოლოდ მთავარ გვერდს და გადის საიტიდან.
ამ გამოწვევიდან გამომდინარე, ადამიანები ყოველდღიურად სხვადასხვა გაყიდვების მასტიმულირებელ აქტივობას ვხედავთ, რომელიც დამეთანხმებით, ხშირად გამაღიზიანებელია. Nextsale არის პლატფორმა, რომელიც ონლაინ მაღაზიებს სთავაზობს პროდუქტს, რომელიც მათი საბოლოო მომხმარებლისთვის ყიდვის პროცესს სასიამოვნოსა და კომფორტულს გახდის. Nextsale-ის პლატფორმის დახმარებით სასურველი პროდუქტის შერჩევისას, მომხმარებლები ვიზუალურად დახვეწილი შეტყობინებების, ბანერებისა თუ “Popup”-ების მეშვეობით, რელევანტურ ინფორმაციას იღებენ. პარალელურად ისინი ხედავენ რამდენი ვიზიტორი იმყოფება საიტზე იმ მომენტში და რამდენმა ადამიანმა შეიძინა ესა თუ ის პროდუქცია.
„ონლაინ გაყიდვების ბიზნესში ათ წლიანმა გამოცდილებამ დამანახა თუ რა გამოწვევები არსებობდა ამ ბაზარზე და მჯეროდა, რომ შევქმნიდი პროდუქტს, რომელიც მარკეტერებს დაეხმარებოდა არა მარტო გაყიდვების სტიმულირებაში არამედ ლოიალური კლიენტების რაოდენობის გაზრდაშიც. თავდაპირველად განვსაზღვრეთ თუ რა აკლდა ამ ბაზარს და რა ახდენდა მტკივნეულ ზეგავლენას გაყიდვებზე, ხოლო შემდეგ ჩემს მეგობრებთან და უკვე თანადამფუძნებლებთან ერთად, დავაარსე Nextsale და დავიწყეთ პლატფორმის შექმნაზე მუშაობა“, – ამბობს ჩვენთან საუბარში ერთ-ერთი დამფუძნებელი Vusal Orujov.
ალბათ დამეთანხმებით, რომ ნებისმიერ მომხმარებელს და ზოგადად ადამიანებს უყვართ ყურადღება. Nextsale-ის დამფუძნებლებს სჯერათ, რომ სწორედ პერსონალიზებული მიდგომაა ის მთავარი გასაღები რაც უბრალო ვიზიტორს ლოიალურ მომხმარებლად აქცევს. ასევე მნიშვნელოვანია საკომუნიკაციო ენა, თუ როგორ მივაწვდით მესიჯს მომხმარებელს ისე, რომ გამაღიზიანებელი არ იყოს.
მიუხედავად იმისა, რომ Nextsale უკვე 87 ქვეყანაში 4000-ზე მეტ ბიზნესს ემსახურება, სტარტაპს მაინც აქვს ბევრი გამოწვევა. ახალი ცოდნისა და გამოცდილების მიღება კი ბიზნესის განვითარების არცერთ ეტაპზე არ არის ზედმეტი.
„500 Startups არის მსოფლიო დონის აქსელერატორი და ყველა სტარტაპი ცდილობს ამ პროგრამაში მონაწილეობას. მთავარი მიზეზი, რის გამოც გადავწყვიტეთ, რომ მონაწილეობა მიგვეღო იყო ცოდნა და რჩევები, რომელსაც მივიღებდით გამოცდილი მენტორებისაგან. საბედნიეროდ, ამ პროგრამის ორგანიზატორებმა ჩვენში დაინახეს პოტენციალი და ახლა ინტენსიურ რეჟიმში გავდივართ ტრენინგებს.
ეჭვგარეშეა მენტორების პროფესიონალიზმი, რომელებსაც უკვე აქვთ წარმატებული ბიზნესი და ამ პროგრამაში არიან იმიტომ, რომ დამწყებ ანტრეპრენიორებს გაუზიარონ მათი ცოდნა და გამოცდილება. მათი რჩევები ძალიან დაგვეხმარა ყოველდღურ საქმიანობაში“, – გვიყვება ერთ-ერთი დამფუძნებელი Taleh Karimli.
გარდა იმისა, რომ საქართველოში მსოფლიო დონის აქსელერატორის შემოყვანა სტარტაპის ეკოსისტემის განვითარებას შეუწყობს ხელს, ამავდროულად უნდა აღვნიშნოთ, რომ პროგრამა უკვე გასცდა საქართველოს ფარგლებს და ისევე წარმატებულად ეხმარება უცხოურ სტარტაპებს, როგორც ქართულს. შეგახსენებთ, რომ 9 ქართულ სტარტაპთან ერთად პროგრამაში ჩართულია 6 უცხოური სტარტაპი მსოფლიოს სხვადასხვა რეგიონიდან.
Nextsale-ის პირველი ბეტა ვერსია სულ რაღაც 2019 წლის მარტში ჩაეშვა. დამწყები ანტრეპრენიორებისათვის ეს სტარტაპი კარგი მაგალითია იმისა თუ რამდენად სწრაფად შეიძლება განვითარდეს თქვენი ბიზნეს იდეა. ხოლო მარკეტერებს, რომლებმაც წაიკითხეთ ეს ბლოგი და დაინტერესდით Nextsale-ის პროდუქტით, შეგიძლიათ ახლავე ეწვიოთ მათ ვებ-გვერდს და დეტალურად გაეცნოთ მათ შეთავაზებებს.