ალბათ ბევრი ადამიანი ვერ გეტყვით თუ რა არის ქლაუდ სერვისი, მაგრამ დარწმუნებული იყავით, რომ მსგავსი პროდუქტით მრავალჯერ უსარგებლიათ. დღეში რამდენჯერ ვიყენებთ მხოლოდ Google-ის ქლაუდის ტიპის სერვისებს (Gmail, YouTube და სხვ., რომ აღარაფერი ვთქვათ იმ უამრავ აპლიკაციასა თუ ვებ-პლატფორმაზე, რომელიც ჩვენი ცხოვრების განუყოფელი ნაწილი გახდა.
ამავდროულად შემიძლია გითხრათ, რომ დღესდღეობით მსოფლიოში კომპანიების თითქმის 90% იყენებს სხვადასხვა ტიპის ქლაუდ სერვისს. თუ ამ სტატისტიკის არ გჯერათ, დაფიქრდით ისეთ კომპანიაზე, რომელსაც საკუთარი იმეილი არ აქვს და მიხვდებით თუ რა სიდიდის ბაზარზეა საუბარი. ეს სექტორი ბოლო წლებში ძალიან გაიზარდა და ჯამურმა ღირებულებამ უკვე ასეულობით მილიარდ დოლარს გადააჭარბა.
რაც უფრო მსხვილია კორპორაცია, მით მეტ ქლაუდის ტიპის ანგარიშს იყენებს. ვისაც დიდ კომპანიაში გიმუშავიათ დამეთანხმებით, რომ ყველა ამ ანგარიშის მართვა საკმაოდ დიდ დროსა და რესურსებს მოითხოვს. Mandarin Solution-ის დამფუძნებლები თავდაპირველად მუშაობდნენ იდეაზე, რომელიც მსხვილ კომპანიებს სთავაზობდა სხვადასხვა ქლაუდ სერვისის ანალიტიკასა და მომხმარებლების ტრაფიკის მართვის ინსტრუმენტს. სტარტაპზე მუშაობისას მათ აღმოაჩინეს, რომ ამ პროდუქტებთან ერთად მომხმარებელს სჭირდებოდა საერთო ვირტუალური სივრცე, რომელშიც ყველა ქლაუდ სერვის პროვაიდერის პროდუქტი ერთად იქნებოდა თავმოყრილი.
„ბოლო წლებში ყველაზე მზარდი ქლაუდ სერვისის ტიპი არის “IaaS”, რომელიც იშიფრება, როგორც „Infrastructure as a Service“. ამ ბაზარზე ოპერირებენ მსოფლიოს უდიდესი კომპანიები ისეთი პროდუქტებით, როგორიც არის „Google Cloud”, “Amazon AWS” და „Microsoft Azure”. ხშირად ხდება, რომ დიდი კორპორაციები ერთდროულად სარგებლობენ სხვადასხვა ქლაუდ სერვისით, რომელიც ვირტუალურ ინფრასტრუქტურას სთავაზობს მათ. Mandarin solution კი არის ინსტრუმენტი, რომელიც ჩვენს მომხმარებლებს აძლევს შესაძლებლობას ერთ სივრცეში მართონ ყველა ასეთი პროდუქტი და ამავდროულად ყველა საჭირო სტატისტიკური მონაცემი მიიღონ“, – ამბობს სტარტაპის ერთ-ერთი დამფუძნებელი დიმიტრი პანენკოვი.
ამ მომენტისათვის Mandarin Solution, სხვადასხვა ინდუსტრიიდან, 100-ზე მეტ მსხვილ კომპანიასთან თანამშრომლობს. სტარტაპი წარმოდგენილია ევროპის ბაზარზე, აზერბაიჯანში, ყაზახეთში და დამფუძნებლებს, სამომავლოდ, ქართულ კომპანიებთან თანამშრომლობის სურვილიც აქვთ. იმედია დამეთანხმებით, რომ საქართველოში მსოფლიო დონის ბრენდები ჯერ არ გვაქვს, მაგრამ ნამდივლად მოიძებნება კომპანიები, რომლებისთვისაც Mandarin Solution-ის პროდუქტი შეიძლება საინტერესო იყოს.
დღევანდელი მოცემულობით Mandarin Solution, სხვა სტარტაპებთან ერთად, ჩართულია აქსელერაციის პროგრამის მუშა პროცესში. მონაწილეები ესწრებიან სხვადასხვა მენტორის ლექციებს და აგროვებენ ახალ ცოდნასა და გამოცდილებას, რომელიც ბიზნესის განვითარებაში აუცილებლად დაეხმარებათ.
„სხვა მონაწილეებისგან განსხვავებით ჩვენს სტარტაპს დიდი გამოცდილება აქვს, რადგან 5 წელზე მეტია ბაზარზე ვართ. გამომდინარე აქედან ყველაზე მნიშვნელოვანი ფაქტორი, რის გამოც პროგრამაში მონაწილეობა გადავწყვიტეთ იყო ის ქსელი, რომელიც 500 Startups აქვს მთელს მსოფლიოში. ამ აქსელერაციის პროგრამაში მონაწილეობა შესაძლებლობაა გავიცნოთ გამოცდილი მენტორები, რომლებსაც ბიზნესში მოღვაწეობის მრავალწლიანი გამოცდილება აქვთ და მათგან რაღაც ახალი ვისწავლოთ. ასევე მინდა აღვნიშნო, რომ მენტორებთან კომუნიკაციის გარდა, ძალიან ნაყოფიერი გამოდგა საქართველოს ბანკის წარმომადგენლებთან ღია დისკუსიის რეჟიმში მუშაობა“, – ამბობს სტარტაპის ერთ-ერთი დამფუძნებელი დიმიტრი პანენკოვი.
ქართული ბაზარი პატარაა და სტარტაპების განვითარებისთვის სასიცოცხლოდ მნიშვნელოვანია უფრო დიდ მასშტაბზე გადასვლა. ალბათ დამეთანხმებით, რომ 500 Startups-ის ბაზარზე შემოყვანამ ამის შანსი ერთიორად გაზარდა და სრულიად ახალი შესაძლებლობები გააჩინა მონაწილეებისთვის, განსაკუთრებით კი, ქართული სტარტაპებისთვის.
ამ ეტაპზე, ჩვენ ისღა დაგვრჩენია დაველოდოთ და იმედი ვიქონიოთ, რომ სულ ცოტა ხანში ქართულ სტარტაპებს ვიხილავთ იმ დონეზე, რომელზეც დღეს Mandarin Solution-ია და მჯერა, რომ ქართველი ანტრეპრენიორები მხოლოდ ამაზე არ გაჩერდებიან და ერთ დღეს მათ პროდუქტსა თუ სერვისს მსოფლიო დონის ბრენდების გვერდით ვიხილავთ.