ტექნოლოგიების სფერო უკვე დიდი ხანია მსოფლიო ეკონომიკური განვითარების ერთ-ერთი მამოძრავებელი ძალაა, თუმცა, ბოლო წლებში განსაკუთრებულად მნიშვნელოვანი და აქტუალური გახდა ციფრული პროდუქტები, რომლებსაც კომპანიების ციფრული ტრანსფორმაციის პროცესში გადამწყვეტი მნიშვნელობა ენიჭებათ. საქართველოში არ არის ბევრი სივრცე, რომელიც ციფრულ სფეროში პროდუქტის შექმნაზე მომუშავე პროფესიონალებს გააერთიანებდა და ინფორმაციისა თუ გამოცდილების გაცვლის საშუალებას მისცემდა. სწორედ ამისთვის 1 წლის წინ დაფუძნდა ProdAct Community.
ცოტა ხნის წინ კი ProdAct Community-ის ორგანიზებითა და საქართველოს ბანკის მხარდაჭერით, ციფრული პროდუქტების შექმნასა და მენეჯმენტზე ორიენტირებული კონფერენცია ProdAct Conference 2023 – HOW? ჩატარდა.
კონფერენციაზე სიტყვით ადგილობრივ ბაზრის ლიდერებისა და წარმატებული სტარტაპერების გარდა, არაერთი საერთაშორისო სპიკერი გამოვიდა. მათ შორის იყვნენ Google-ის, Spotify-ის, Stanford-ის, Miro-ს და სხვა მნიშვნელოვანი კომპანიების წარმომადგენლები.
მიუხედავად იმისა, რომ სპიკერთა ძირითადი ნაწილი ბიზნესის წარმომადგენლები იყვნენ, გამოსვლები არ ემსახურებოდა მხოლოდ კომპანიის იმიჯის ან თუნდაც ციფრული პროდუქტების გაპიარებას. მათ კოლეგებს თავიანთი გამოცდილება გაუზიარეს – თუ რა გამოწვევების წინაშე დგებოდნენ და რა საშუალებებით ახერხებდნენ მათ გადაწყვეტას. კონფერენციის მიზანი სწორედ გამოცდილების, ცოდნის და ინფორმაციის გაზიარება იყო.
კონფერენციაზე არაერთმა სპიკერმა ისაუბრა მონაცემებზე დაფუძნებული (DATA driven) მარკეტინგისა და პროდუქტის დიზაინის მნიშვნელობაზე. მათ შორის იყო საქართველოს ბანკის Digital Cluster Product Owner-ი ლუკა ქობალია, რომელმაც საქართველოში ყველაზე პოპულარული ციფრული პროდუქტის – საქართველოს ბანკის მობილბანკის განვითარებაზე ილაპარაკა. მან დეტალურად განიხილა, თუ რა პროცესი გაიარა გუნდმა პროდუქტის ამ ეტაპამდე მოყვანისთვის, თუ როგორ მოხდა პროდუქტის მიზნების განსაზღვრა, მომხმარებლების საჭიროებების დადგენა და გადაწყვეტების იმპლემენტაცია.
ციფრულ ტრანსფორმაცია იყო ერთ-ერთი მნიშვნელოვანი მიმართულება საქართველოს ბანკის CMO-ს, ლევან გომშიაშვილის ინტერვიუში, რომელსაც ProdAct Community-ის თანადამფუძნებელი თეო ზანგურაშვილი უძღვებოდა. მისი თქმით, საქართველოს ბანკი უკვე არამხოლოდ ბანკი, არამედ ტექნოლოგიური კომპანიაცაა. გომშიაშვილის თქმით, ამ მხრივ საქართველოს ბანკისგან კიდევ უფრო მეტ სიახლეს უნდა ველოდოთ.
ასევე, აღსანიშნავია საქართველოში e-commerce-ის ერთ-ერთი წამყვანი პლატფორმის VELI Store-ის CEO-ს არჩილ პირიაშვილის გამოსვლა. მან ისაუბრა იმ გზაზე, რომელიც პლატფორმის დაარსების იდეიდან დღევანდელ დღემდე გამოიარეს. მისივე თქმით, საწყის ეტაპზე ყველა არწმუნებდა, რომ „საქართველოში არ მუშაობს ონლაინ მაღაზიები“. მიუხედავად ამისა, VELI-ის გუნდმა აჩვენა, რომ გამართული პლატფორმის პირობებში, სადაც მომხმარებლის გამოცდილება არის კარგი, სასიამოვნო და ინტუიციური, e-commerce საქართველოში ძალიანაც ამართლებს.
ხედვაზე, სტრატეგიასა და ღირებულებებზე ესაუბრა აუდიტორიას Google-ის სენიორ პროდუქტ მენეჯერი სიმონ არსია. მისი თქმით, ამ სამ სიტყვას ხშირად იყენებენ, თუმცა, სამწუხაროდ, ხშირად ეს მხოლოდ სიტყვებია. მან განმარტა, თუ რამდენად მნიშვნელოვანია კარგი ხედვა პროდუქტის მენეჯმენტში, რათა სხვებსაც დაანახო, რის შეცვლას აპირებ. სწორი სტრატეგიით კი უნდა შემცირდეს სივრცე ხედვასა და რეალობას შორის, რათა საბოლოო მიზანს მიაღწიო. ხოლო ღირებულებები საჭიროა, რათა მიზნის მიღწევა მისაღები საშუალებებით მოხდეს.
კონფერენციის ფარგლებში გაიმართა პანელური დისკუსიებიც. პანელისტებმა განიხილეს ისეთი თემები, როგორიცაა პროდუქტის დიზაინი, მარკეტინგი, მონაცემებზე დაფუძნებული მარკეტინგი და ა.შ.
ასევე, პანელის ფორმატში გაიმართა დისკუსია თემაზე Georgian in Global Tech World, რომლის ფარგლებშიც ქართველებმა, რომლებიც მსოფლიოს წამყვან ტექნოლოგიურ კომპანიებში მუშაობენ, საკუთარი გამოცდილებები გაუზიარეს აუდიტორიას.
კონფერენციის ბოლოს გამოცხადდა გამარჯვებული სტარტაპი, რომელსაც საშუალება ექნება სილიკონის ველზე ორგანიზებულ სტარტაპერების ღონისძიებას დაესწროს. გამარჯვებული სტარტაპი კი Quickshipper-ი გახდა, რომელიც საკურიერო სერვისების უზრუნველყოფის ციფრული პლატფორმაა. სტარტაპი უკვე წარმატებით ოპერირებს ქართულ ბაზარზე და უახლოეს მომავალში ქვეყნის ფარგლებს გარეთაც გავა.
ProdAct Community-ის ორგანიზებულ ამ კონფერენციას 400-ზე მეტი ადამიანი ესწრებოდა. მის ფარგლებში ისინი არამხოლოდ სპიკერებს, პანელისტებს და სტარტაპერებს უსმენდნენ, არამედ ჰქონდათ ნეთვორქინგის უნიკალური შესაძლებლობა, რადგან ეს იყო პირველი მსგავსი ღონისძიება, რომელმაც ციფრულ პროდუქტებზე მომუშავე უამრავ პროფესიონალს მოუყარა თავი. ProdAct Community მომავალშიც აპირებს მსგავსი თემატიკის ღონისძიებების ორგანიზებას და პროფესიონალებს შორის ცოდნისა და გამოცდილების სხვადასხვა გზით გაზიარების წახალისებას.