საქართველოს ბანკის მხარდაჭერით 29 ივნისს 500 Georgia-ს მე-4 ნაკადის დემო დღე გაიმართა, სადაც ტექნოლოგიური სტარტაპების დამფუძნებლებმა დაინტერესებულ საზოგადოებას თავიანთი ინოვაციური პროდუქტები წარუდგინეს. მათ შორის ერთ-ერთი იყო Murmur.
„ჩვენ ვცვლით გარე რეკლამირებას ხელოვნური ინტელექტისა და კომპიუტერული ხედვის საფუძველზე,“ – ასე დაიწყო საკუთარი გამოსვლა Murmur-ის დამფუძნებელმა, ემინ ალიევმა.
Murmur ორიენტირებულია გარე რეკლამის ინოვაციური ვერსიების შექმნაზე, რომლებიც მომხმარებლებისთვის უფრო ეფექტური იქნება, ვიდრე ციფრული რეკლამები.
სტარტაპი სულ რაღაც 1 წლის წინ შეიქმნა და მან უკვე იმუშავა ისეთ ბრენდებთან ერთად, როგორებიც არიან: P&G, Hugo Boss, Wendy’s, Yves Saint Laurent და Nike.
ემინის თქმით, ბრენდების უმრავლესობა გარე რეკლამის გაშვების პროცესში მრავალ პრობლემას აწყდება. ერთ-ერთი ასეთი პრობლემა ამ რეკლამების ფრაგმენტულად, ანუ ცალ-ცალკე გაშვებაზე დროის და სხვა რესურსების ხარჯვაა.
Murmur არამხოლოდ აგვარებს ამ პრობლემას, არამედ კომპიუტერული ხედვის ტექნოლოგიის გამოყენებით, რეკლამის პერსონალიზებას ახდენს აუდიტორიის სქესის, ასაკის, მდებარეობისა და ქცევის მიხედვით.
შედეგად, ეს გადაწყვეტა საშუალებას აძლევს ბიზნესს, სამიზნე აუდიტორიას 35-ჯერ უფრო ეფექტიანად მიაღწიოს, ვიდრე ციფრული რეკლამა ახერხებს ამას.