თუ ახლა ამ ბლოგს კითხულობ, დიდი ალბათობით უკვე ჩართული ხარ მობილბანკის თამაშში. უკვე მეექვსე კვირაა, რაც საქართველოს ბანკის მასშტაბური პროექტი მიმდინარეობს და ამ ხნის განმავლობაში მან მოიცვა სხვადასხვა თაობისა და ინტერესის მქონე უამრავი ადამიანი — როგორც საქართველოში, ასევე მის ფარგლებს გარეთ. თამაშის შეკითხვებს განიხილავენ პირად საუბრებში, Facebook ჯგუფებში და TikTok-ზეც კი…
დამოუკიდებლად და გუნდურად მოთამაშეები ამჟამად ცდილობენ, მეექვსე კვირის მისიებს გაართვან თავი და, ამასთან, მარკეტში საინტერესო საჩუქრებსაც გამოჰკრან ხელი. ჩვენ კი, უკვე ტრადიციულად, გასული კვირის შეკითხვების მოკლე მიმოხილვას გთავაზობთ — ვნახოთ, მე-5 კვირის რომელი დავალებები ერთულათ და ემარტივათ მოთამაშეებს ყველაზე მეტად.
დამოუკიდებლად მოთამაშეებში ბევრს შერლოკ ჰოლმსის მისამართი არ სცოდნია
დედუქციონისტია, უყვარს ჩიბუხი და ვიოლინო, ასევე — ამოცანების ამოხსნა; რაც მთავარია, ცხოვრობს ლონდონში, ბეიკერ-სტრიტის 221ბ-ში. სხვა ვინ უნდა იყოს, თუ არა ყველა დროის ყველაზე ცნობილი დეტექტივი შერლოკ ჰოლმსი. თუმცა, ზემოხსენებული მინიშნებების მიუხედავად, ბევრ დამოუკიდებელ მოთამაშეს ამ ცნობილი ლიტერატურული პერსონაჟის გამოცნობა მაინც გაუჭირდა.
სამაგიეროდ, სულ ადვილად ამოიცნეს „ემოჯიებით“ დაშიფრული დისნეის „მეფე ლომი“ და ისიც გაიხსენეს, რომ სიმბას ჭკუამხიარულ მეგობრებს ტიმონი და პუმბა ჰქვიათ.
დამოუკიდებლად მოთამაშეების დიდმა ნაწილმა ასევე წარმატებით ამოხსნა თბილისის ფოტოთი და მთიულეთის რუკით დაშიფრული ქართული კერძი, რომლის ორი სახეობაცაა ცნობილი — ქალაქური და მთიულური. როგორც ჩანს, მარტოხელა მოთამაშეებში ხინკალს ბევრი მოყვარული ჰყავს…
გურმანები ყოფილან ორმოთამაშიან გუნდებშიც
დამოუკიდებელ მოთამაშეებს ხინკლის შიფრის ამოხსნა ეადვილათ, ორმოთამაშიან გუნდებს კი — ფრანგული კერძის გამოცნობა ერთადერთი ფოტოთი. შესაბამისად, ადვილად გაიხსენეს მისი მოსახელე 2007 წლის ანიმაციური ფილმი „რატატუიც“.
გარდა ამისა, ორმოთამაშიანი გუნდები ევროპული ქალაქების ეტიმოლოგიაშიც ერკვევიან. სწორედ ამიტომ, მარტივად მიხვდნენ, რომ იტალიის ქალაქი, რომელიც „აყვავილებულს“ ნიშნავს, არც მეტი, არც ნაკლები, ლეონარდო და ვინჩის სამშობლო — ფლორენციაა.
თუმცა, კვლავაც დამოუკიდებელი მოთამაშეებისა არ იყოს, ანკეტებით ცნობილი პირების გამოცნობა არც ორმოთამაშიანი გუნდების ძლიერი მხარე ყოფილა. ბევრი მათგანი ვერაფრით მიხვდა, ვინ იყო ცნობილი ფიზიკოსი, რომლის საყვარელი ხილი ვაშლია, ჰობი — საგნების ძირს დაყრა, მისამართი კი — კემბრიჯის უნივერსიტეტი. ისააკ ნიუტონის არ ვიცით, მაგრამ მის ადგილას ჩვენ ნამდვილად გვეწყინებოდა…
ამას გარდა, ორმოთამაშიან გუნდებს გაუჭირდათ „ფერუმითა“ და „ვენერას სარკით“ დაშიფრული ცნობილი პოლიტიკოსის გამოცნობა. რა გასაკვირია და ეს რკინის ლედი, მარგარეტ თეტჩერი გახლდათ.
კიდევ ერთი შეკითხვა, რომელიც ამ გუნდებს ეძნელათ, საზომ ერთეულებს უკავშირდებოდა. რა შეიძლება მოჰყვებოდეს 5 კვირას და 80 000 კილომეტრს? 80… დღე, რა თქმა უნდა!
სამ-მოთამაშიან გუნდებში GOT-ს ბევრი ფანი ჰყოლია
სამ-მოთამაშიანი გუნდების ძლიერება ერთიანობაზე დგას, ამდენად, სულაც არაა გასაკვირი, რომ პოპულარული ფენტეზი საგა Game of Thrones ჰყვარებიათ. შედეგად, წინა კვირის ერთ-ერთ დავალებაში დაშიფრული სტარკების საგვარეულო სულ ადვილად გამოიცნეს.
კიდევ ერთი შიფრი, რომლის ამოხსნაც ამ გუნდებს ეადვილათ, ირემს და წყალს უკავშირდებოდა. ჰოდა, ისინიც უმალ მიხვდნენ, რომ საქართველოს ეს კურორტი საირმე იყო.
სამ-მოთამაშიან გუნდებში ბევრი მელომანიც უნდა იყოს. „ერთადერთი, რაც შენ გაგიკეთებია, არის გუშინ“ — ამ ფრაზის შემცველი პოპულარული სიმღერა რომ The Beatles-ის წევრს ეძღვნებოდა, ეს ფაქტიც ცნობილი ყოფილა მათთვის.
თუმცა, სტარკების დარ სამ-მოთამაშიან გუნდებსაც ჰქონიათ სუსტი მხარეები და ერთ-ერთი მათგანი საბავშვო ლიტერატურაა. ერთ-ერთ შეკითხვაში მოთამაშეებს 39-ის მეოთხედი უნდა გაეხსენებინათ და 1965 წელს დაბადებული მწერალი გამოეცნოთ. 39-ის მეოთხედი 9,75 არის, რაც ალბათ საკმარისი მინიშნებაა იმის მისახვედრად, რომ ყველაფერი ჰოგვორტსის ექსპრესს, პლატფორმა 9 ¾-ს და „ჰარი პოტერის“ შემქმნელ ჯოან როულინგს უკავშირდებოდა.
სამ-მოთამაშიან გუნდებს ასევე ერთულათ „ამსტერდამ არენის“ მასპინძელი გმირის გახსენება ბერძნული მითოლოგიიდან. სწორი პასუხი ამ შეკითხვაზე აიაქსი იყო — ძველბერნძული მითოსის გმირი, რომლის სახელსაც დღეს ცნობილი ნიდერლანდური საფეხბურთო კლუბი ატარებს.
ამ გუნდებს გაუჭირდათ სიტყვა „უკანასკნელის“ გახსენებაც. მართალია, ეს კვირის უკანასკნელი დავალება არ ყოფილა, მაგრამ მინიშნებებად „უკანასკნელი მოჰიკანისა“ და „უკანასკნელი სამურაის“ მთავარი გმირების ჩვენება ალბათ მაინც საკმარისი იყო.
დათვის, ვირზაზუნის, ლომის და პანდის ფოტო აუცილებლად მოგაგონებს ცნობილ ფილმს და კიდევ ერთ ცხოველს — ზაზუნას. თუმცა, სამ-მოთამაშიანი გუნდებისთვის ეს შეკითხვაც არ აღმოჩნდა ადვილი.
სამაგიეროდ, იცი, ადვილი რა არის? მობილბანკის თამაშში ჩართვა. ამისთვის მხოლოდ ისაა საჭირო, მობილბანკის აპლიკაცია გადმოწერო და მარტივი რეგისტრაცია გაიარო. თამაშში ჩართვა მე-10 კვირამდე ნებისმიერ დროს შეგიძლია — ფინალში მოსახვედრად ორი კვირის სრულყოფილად შესრულებული დავალებებიც გეყოფა. თუმცა, ვერ დაგპირდებით, რომ შეჯიბრში მხოლოდ ადვილი შეკითხვები დაგხვდება…
თუ თამაშის წესებსა და პრიზებზე მეტის გაგება გინდა, ამ ბმულს ეწვიე, ხოლო თუ ყველაზე ხშირად დასმულ შეკითხვებზე პასუხი გაინტერესებს, ეს ბლოგი წაიკითხე აუცილებლად.