500 Georgia-ს მეოთხე ნაკადის მონაწილე სტარტაპი Murmur აქსელერაციის პროგრამის გავლის შემდეგ განვითარებას აგრძელებს. დემო დღის შთამბეჭდავი პრეზენტაციიდან მხოლოდ რამდენიმე თვე გავიდა, თუმცა კომპანიამ უკვე ახალი პროდუქტის, InsightIQ-ს ჩაშვება შეძლო და სამომავლოდ დიდი გეგმების განხორციელებისთვისაც ემზადება.
თუ გავითვალისწინებთ იმას, რომ Murmur-მა ინოვაციური იდეებით ისეთი კომპანიები მოიზიდა, როგორებიცაა NIKE, SONY და Louis Vuitton, ხოლო აზერბაიჯანიდან პირდაპირ ამერიკის შეერთებული შტატების ბაზარზე გაფართოვდა, სავარაუდოა, რომ არც სამომავლოდ დასახული გეგმების შესრულება გაუჭირდება. სტარტაპის დაარსებიდან სულ რაღაც ერთ წელში, Murmur-მა 200 000 დოლარი გამოიმუშავა და თვიურად 24%-იანი ზრდის მაჩვენებელი ჰქონდა. გასაკვირი არაა, რომ 500 Georgia-ს რეგიონის რჩეულ სტარტაპებშიც მოხვდა და საერთაშორისო მენტორების დახმარებით, აქსელერაციის პროგრამა გაიარა.
რა არის Murmur?
ბოლო ათწლეულებია, რაც რეკლამის მნიშვნელოვანმა ნაწილმა ციფრულ სამყაროში გადაინაცვლა. ბილბორდებისა და სხვა გარერეკლამებისგან განსხვავებით, ციფრულ რეკლამას მონაცემების შეგროვება და მათი დამუშავება შეუძლია. სხვადასხვა სახის მონაცემები ბიზნესებს აწვდის ე.წ “ინსაითს”, რაც წარმატებული კამპანიის დაგეგმვის უმნიშვნელოვანესი ნაწილია. თუმცა, როგორც Murmur-ის დამფუძნებელი, ემინ ალიევი აღნიშნავს, ედბლოკერების გამო, ციფრული რეკლამა ვერ სწვდება 4 მილიარდამდე მომხმარებელს, რაც პოტენციურად 22 მილიარდი დოლარის დაკარგვას იწვევს. სწორედ ამიტომ, Murmur-მა ამ ორი პროდუქტის – ციფრული და გარე რეკლამის საუკეთესო სინთეზი შექმნა.
სტარტაპი გარე რეკლამებად გვთავაზობს მანქანებზე, ზურგჩანთებსა და სხვა ისეთ ზედაპირებზე განთავსებულ LCD ეკრანებს, სადაც გარეთ გამოსულ მომხმარებელს მიწვდება. ხელოვნური ინტელექტის, კომპიუტერული ხედვისა და ხედვის აღწერის ტექნოლოგიების მეშვეობით, Murmur-ს შეუძლია ბიზნესისთვის რეალურ დროში გაზომოს სამიზნე აუდიტორიის სენტიმენტები და ქცევა, გააანალიზოს და დააჯგუფოს ისინი დემოგრაფიის, ადგილმდებარეობისა და მობილური მოწყობილობის მიხედვით. კომპანიებს ასევე შეუძლიათ გაიგონ თავიანთი გარე რეკლამის რომელი ნაწილი მუშაობს ყველაზე კარგად. Murmur-ის მარკეტერები კი ამ ძვირფას ინფორმაციაზე დაყრდნობით, შესაბამის, ეფექტურ სარეკლამო კამპანიებს ქმნიან. Murmur-ის 3500 ეკრანი ყოველთვე 150 მილიონი ნახვას აგროვებს. სტარტაპის დამფუძნებელი აღნიშნავს, რომ Murmur როგორც დიდ, ისე საშუალო და მცირე ზომის ბიზნესებს ემსახურება და მათ სამიზნე აუდიტორიას 35-ჯერ უფრო ეფექტიანად უკავშირდება.
Murmur-ის დამფუძნებელს, ემინ ალიევს, ბიზნესიდეა მაშინ გაუჩნდა, როცა სხვა სტარტაპს ხელმძღვანელობდა და ციფრულ მარკეტინგში სირთულეებს წააწყდა. უნდოდა გარერეკლამა ისეთივე ეფექტური გაეხადა, როგორც ციფრული ალტერნატივა და ხელოვნური ინტელექტის შესაბამის პროგრამულ უზრუნველყოფაზე დაიწყო მუშაობა. ემინი MIT-ის კურსდამთავრებულია და ისეთ კომპანიებში უმუშავია, როგორებიცაა Cisco და IBM. მისი შექმნილი კიდევ ერთი სტარტაპი, ცოტა ხნის წინ Amazon-მა იყიდა, ახლა კი ამ გამოცდილებას Murmur-ს ახმარს. ემინს კომპანიის ახალ პროდუქტსა და 500 Georgia-ში მიღებულ გამოცდილებაზე ვესაუბრეთ:
– რა არის Murmur-ის ახალი პროდუქტი და რას სთავაზობს ის მომხმარებლებს?
ჩვენს ახალ პროდუქტს InsightIQ ჰქვია და ის ხელოვნურ ინტელექტზე დაფუძნებული, მომხმარებელთა “ინსაითის” პლატფორმაა. პროდუქტი ბრენდებს ეხმარება, უფრო სწრაფად და მოხერხებულად მიიღონ თავიანთი კლიენტებისგან უკუკავშირი (ფიდბექი), შეაგროვონ და გააანალიზონ მიღებული პასუხები და პროდუქტის განვითარება და მისი მარკეტინგი შესაბამისად დაგეგმონ. ჩვენი ახალი პლატფორმის მეშვეობით, ბიზნესს ყველა შეკითხვაზე 1-2 საათში აქვს პასუხი, შესაბამისად, სტრატეგიის ცვლილება სწრაფად შეიძლება მოხდეს.
– რა მისცა 500 Georgia-ს აქსელერაციის პროგრამამ სტარტაპს?
500 Georgia დამეხმარა საკუთარი ბიზნესის უკეთ შესწავლასა და გაცნობაში, მაპოვნინა და გამომასწორებინა დაშვებული შეცდომები. პროგრამის წყალობით, მსოფლიოს მასშტაბით გაგვიცნეს, მივიღეთ დიდი მხარდაჭერა საერთაშორისო მენტორებისგან და უკვე მსხვილი ინვესტორებიც გვყავს.
– გაგვიზიარეთ Murmur-ის სამომავლო გეგმები.
ვგეგმავთ კიდევ უფრო მეტად გავავითაროთ ინოვაციური პროდუქტები, შევქმნათ ისეთი პლატფორმები სადაც არაპროფესიონალებსაც შეუძლიათ, ავტო-პილოტის რეჟიმზე აწარმოონ წარმატებული მარკეტინგული კამპანიები – ეს მათ დროსა და რესურსს დაზოგავს. ასევე, ვაპირებთ საქართველოსა და ყაზახეთის ბაზრებზე შესვლასაც.
Murmur არ ჩერდება – სტარტაპის სწრაფი განვითარება ერთ-ერთი მაგალითია იმისა, თუ როგორ შეიძლება შეიცვალოს ბიზნესი 500 Georgia-ს აქსელერაციის პროგრამის გავლის შემდეგ.
თუ გინდა, რომ მსგავსი ან უფრო დიდ წარმატებას მიაღწიო შენც, მაშინ გეტყვით, რომ 500 Georgia_ს აქსელერაციის პროგრამის მეექვსე ნაკადში განაცხადების მიღება დაწყებულია და ამის რეალური შანსი შენც გეძლევა!