საქართველოს ბანკის მხარდაჭერით 29 ივნისს 500 Georgia-ს მე-4 ნაკადის დემო დღე გაიმართა, სადაც ტექნოლოგიური სტარტაპების დამფუძნებლებმა დაინტერესებულ საზოგადოებას თავიანთი ინოვაციური პროდუქტები წარუდგინეს. მათ შორის ერთ-ერთი იყო Dealpad.
Dealpad გაყიდვების გუნდისთვის შექმნილი სტარტაპია, რომლის მეშვეობითაც კომპანიები თავიანთ მომხმარებლებს შესაძლებლობას აძლევენ, აქტიური კომუნიკაცია ჰქონდეთ პოტენციურ მყიდველებთან და დაინტერესებულ პირებთან.
ადამმა ისაუბრა იმ მთავარ პრობლემაზე, რომელსაც გაყიდვების გუნდი ხშირად აწყდება ხოლმე – მათ არ აქვთ პირდაპირი კომუნიკაცია მომხმარებლებთან, რაც, საბოლოო ჯამში, იმაზე აისახება, რომ პოტენციური მყიდველები ყიდვის გადაწყვეტილებას ვერ იღებენ. შესაბამისად, იკარგება მილიონობით დოლარის შემოსავალი და გუნდის მიერ დახარჯული დროის რესურსი.
გაყიდვების სხვა პლატფორმებისგან განსხვავებით, როგორც ადამმა აღნიშნა, Dealpad-ის ფოკუსი სწორედ რომ ღრმა და აქტიური კომუნიკაციისკენ არის მიმართული. გაყიდვების გუნდს მისი მეშვეობით ეძლევა შესაძლებლობა, შეისწავლოს მომხმარებელი და ყიდვის პროცესის დასრულებამდე იყოს ჩართული მასთან კომუნიკაციაში. საბოლოოდ კი, მსგავსი მიდგომა შემოსავლებს 27%-მდე ზრდის.
მომხმარებლებისთვის პერსონალიზებული გამოცდილების შექმნით Dealpad-მა 8 თვის წინ შემოსავლების 20%-ით გაზრდა დაიწყო და დღესდღეობით მათ უკვე 150 000 დოლარამდე მოგება აქვთ თავიანთ ანგარიშზე.