საუცხოო ბუნება, სუფთა ჰაერი, სიმშვიდე და შეუდარებელი სამზარეულო – რაჭა საქართველოს ერთ-ერთი გამორჩეული კუთხეა, რომელიც ნებისმიერ ადამიანს თავს ერთი სტუმრობით აყვარებს. სწორედ რაჭაში გაემგზავრა შეფი დიმიტრი რჩეულიშვილი და ამ კუთხის ტრადიციული კერძები “ჭრებალოს მარანში” დააგემოვნა.
“ჭრებალოს მარანი” სოფელ ჭრებალოს ერთ-ერთი პირველი მოსახლის შთამომავლებმა გახსნეს და უკვე მესამე წელია, სტუმრებს რაჭულ გემოებს შინაურულ გარემოში უზიარებენ. აქაურობა შესანიშნავად გადმოსცემს რაჭულ ტრადიციებსა და სულს, რომლითაც ეს კუთხე ქვეყნის საზღვრებს შიგნითაც და გარეთაც ძალიან პოპულარულია.
“ჩვენი დიდი ბაბუა ამ სოფლის ერთ-ერთი პირველი მოსახლეა, შესაბამისად აქაურობასთან ძალიან დიდი სიყვარული გვაკავშირებს და ეს იდეაც ბუნებრივად გაჩნდა”, — ამბობს “ჭრებალოს მარნის” დამფუძნებელი, სალომე ლეკიშვილი. სალომეს თქმით, მარნის შენობა უძველესია და მაქსიმალურად ეცადნენ, მისი პირვანდელი სახე შეენარჩუნებინათ.
“ჭრებალოს მარანში” მოსულ სტუმრებს საუცხოო ღვინოსთან ერთად შქმერული, რაჭული ლორი, რაჭული ლობიანი და სალომეს ბებიის რეცეპტით მომზადებული სხვა უგემრიელესი კერძები დახვდებათ.
მარნის დათვალიერებისა და ლობიანის გამოცხობის შემდეგ, დიმიტრიმ პაშტეთი შქმერულად, პომიდვრის სალათი ჯონჯოლით, რაჭული ლორი, მოლესილა და შქმერული დააგემოვნა. რაჭული სამზარეულოს საუცხოო გემოებს, რა თქმა უნდა, შეუდარებელი ხვანჭკარაც დააყოლა და აღფრთოვანებულიც დარჩა.
თუმცა რაჭული გასტრონომიული სიურპრიზები ამით არ დასრულებულა. სპეციალურად დიმიტრისთვის კიდევ ერთი განსაკუთრებული რაჭული კერძი მოამზადეს, რომელიც თვალებახვეულს უნდა გამოეცნო. რომელი კერძი დააგემოვნა შეფმა და შეძლო თუ არა მისი გამოცნობა – გასტროლების ახალ ეპიზოდში ნახავ.
თუ რაჭაში მოგზაურობას გადაწყვეტ და “ჭრებალოს მარანსაც” ესტუმრები, გაითვალისწინე, რომ PLUS ბარათით გადახდისას 30-ჯერ მეტი PLUS ქულა დაგერიცხება.