26 სექტემბრიდან, 2 ოქტომბრის ჩათვლით, საქართველო პირველ გასტრონომიულ ფესტივალს უმასპინძლებს. SOLO მოგიყვებათ რა გელოდებათ, ვინ გვესტუმრება, როგორი კერძები მომზადდება, და ზოგადად, რა მნიშვნელობა აქვს გასტრონომიულ კულტურას ქვეყნისთვის.
“ფესტივალის მთელი გუნდი და ყველა მონაწილე, რა თქმა უნდა, განსაკუთრებულად ველით Gastro Week-ის დაწყებას. ასეთი მასშტაბის ღონისძიების ჩატარება ჩვენთვის დიდი პასუხისმგებლობაა. მით უმეტეს, რომ მსგავსი ტიპის ივენთი საქართველოში პირველად ტარდება.”
თეკუნა გაჩეჩილაძე – შეფ-მზარეული და რესტორატორი
გასტრონომიული კვირეულის მიზანი, სფეროს მიმართ ინტერესის გაზრდაა, ქართულ გასტროინდუსტრიას, ისევე როგორც ყველაფერს, განვითარება სჭირდება, ამისთვის კი შრომა და ბევრი საინტერესო აქტივობაა საჭირო, ამას ემსახურება გასტროკვირეულის ჩატარება საქართველოში, იმისთვის, რომ ვინტეგრირდეთ უდიდეს კულინარიულ სამყაროში და საერთაშორისო გასტრორუკაზე აღვინიშნოთ.
“ქვეყნის იდენტობის ერთ-ერთი განმსაზღვრელი ფაქტორი ნამდვილადაა ავთენტური გასტრონომია, ამ ინდუსტრიის განვითარება კი ზრდის ქვეყნის მსოფლიო გასტრონომიულ რუკაზე მოხვედრის შანსებს, ავითარებს მის ტურისტულ პერსპექტივებს.”
თეკუნა გაჩეჩილაძე – შეფ-მზარეული და რესტორატორი
კვირეულში მონაწილეობას მიიღებენ ცნობილი, წამყვანი შეფ-მზარეულები სხვადასხვა ქვეყნიდან, რომლებიც ქართველ შეფ-მზარეულებთან ერთად კულინარიულ ცეცხლს დაანთებენ.
Tbilisi Gastro Week-ის ფარგლებში საქართველოში ჩამოვლენ მიშლენის ვარსკვლავის მფლობელი შეფები – ჟოაო ოლივეირა და მაურიციო ზილო.
ჟოაო ოლივეირა – პორტუგალია, 1 მიშლენის ვარსკვლავი. ის თავისი თაობის ყველაზე იმედისმომცემ შეფად მიიჩნევა. ოლივეირა Vista-ს, პორტიმაოს სასტუმრო Bela Vista Hotel & Spa-ს შეფია.
თავისუფალი, ლოკალური მეთევზეებისა და მცირე ფერმერების პროდუქციაზე დაფუძნებული მენიუები კი მაურიციო ზილოს სავიზიტო ბარათია.
მაკსუტ ასკარი – თურქეთი. მაკსუტ ასკარი სტამბულში რესტორან Neolokal-ის დამფუძნებელია. რესტორნის სტუმრებს შეფი ანატოლიურ სამზარეულოს სთავაზობს, ქმნის კერძებს, რომლებიც ადგილობრივ, ტრადიციულ სამზარეულოს თანამედროვე ვერსიებს წარმოადგენს.
ვოლოდიმირ იაროსლავსკი – უკრაინა, Chef’s Table-ს ბრენდ შეფი. კიევში მოღვაწე ბრენდ შეფი, ვოლოდიმირ იაროსლავსკი Chef’s Table-ს თანადამფუძნებელი და კულინარიული წიგნის, ბესთსელერ “100 რეცეპტის” ავტორია.
ვოლოდიმირ იაროსკლავსკი Tbilisi Gastro Week-ის ფარგლებში საქართველოს ესტუმრება და 30 სექტემბერს უკრაინის მხარდასაჭერი, საქველმოქმედო ვახშმით გიმასპინძლებთ. ღონისძიების წამყვანი კიევის საკრებულოს დეპუტატი, გარემოსდაცვითი პოლიტიკის მუდმივი კომიტეტის მდივანი, ევგენია კულება იქნება. შემოსული თანხა კი სრულად გადაირიცხება Misto-Sad-ის ფონდში.
უკრაინის მხარდასაჭერ საქველმოქმედო ვახშამს უკრაინელი შეფი, ვოლოდიმირ იაროსლავსკი სამზარეულოს ომების ჟიურისთან, მიშა ავსაჯანიშვილთან ერთად წარმოგვიდგენს.
ჯანაინა რუედა – სამხრეთ ამერიკის ყველაზე პოპულარული შეფი, ბრაზილია. ჯანინა რუედა American Express Icon Award-ის გამარჯვებულია და სამხრეთ ამერიკის 50 საუკეთესო შეფს შორის პირველ ადგილს იკავებს.
ჰროვიე კროფლინი – ხორვატია. ხორვატიელი შეფი, ჰროვიე კროფლინი გამოირჩევა პროფესიონალიზმითა და პერფექციონიზმით. “კულინარია ყოველთვის იყო ის, რისი კეთებაც მსურდა.” – ამბობს ჰროვიე.
საქართველოში ჩამოდიან საერთაშორისო მედიის წარმომადგენლები.
უმნიშვნელოვანესია მსოფლიო კულინარიული ელჩის, კრისტიან ბრასკ ტომსენის ვიზიტი – ის კულინარიული საკომუნიკაციო სააგენტოს Bon Vivan-ის დამფუძნებელია და გასტროინდუსტრიის კომუნიკაციების გურუდ მიიჩნევა.
ტომსენი მთელი მსოფლიოს მასშტაბით 50-ზე მეტი რესტორნის წარმომადგენელია და პერსპექტიულ შეფებს გზის გაკვლევაში ეხმარება.
ორგანიზატორების თქმით, Tbilisi Gastro Week იქნება ერთ-ერთი ყველაზე მაღალი კლასის, ექსტრავაგანტული ღონისძიება, რომელიც რამდენიმე დღიან თავაგადასავლებს მოიცავს – სხვადასხვა ლოკაციებზე მდებარე რესტორნებში უმაღლესი სტანდარტის ვახშმები სპეციალური მენიუებით იქნება წარმოდგენილი. ასევე, გაიმართება პროფესიონალი შეფ-მზარეულების ვორკშოპები.
ღონისძიებით ინტერესდება საერთაშორისო მედია, გასტრონომიის ექსპერტები და სხვა პროფესიონალები.
რა თქმა უნდა, ყველა ვახშამი ქართულ ღვინოსთან ერთად იქნება წარმოდგენილი და ქართული მუსიკალური ჰანგებითა და დიზაინით გაფორმდება.