საქართველოს ბანკი სხვადასხვა პროექტითა თუ სტიპენდიით აქტიურად ცდილობს ქართველი მოსწავლეებისა და სტუდენტების საგანმანათლებლო შესაძლებლობების გაუმჯობესებას და დამატებითი სტიმულის გაჩენას. სწორედ ამ მოტივაციით იმართება სპორტული ღონისძიებების ერთობლიობა – სასკოლო ლიგა.
უმნიშვნელოვანესია სასკოლო ასაკიდანვე მოზარდებში სპორტული ინტერესის გაღვივება, ჯანსაღი ცხოვრების პოპულარიზაცია და სივრცე, სადაც ახალგაზრდა ადამიანები თავიანთი სპორტული შესაძლებლობების გამოცდასა და რეალიზებას შეძლებენ. სპორტული ლიგა თავიდან ბოლომდე ამ მიზნით შექმნილი სპორტული სივრცეა – აერთიანებს სხვადასხვა სპორტს და მოიძებნება ადგილი ნებისმიერი სპორტული ინტერესის მქონე მოსწავლისთვის.
მინი ფეხბურთი, კალათბურთი, რაგბი, ფარიკაობა, მაგიდის ჩოგბურთი, მშვილდოსნობა – არასრული ჩამონათვალია იმ სპორტული სახეობებისა, რომლებშიც 12 000-ზე მეტი ქართველი მოსწავლე გამოცდის საკუთარ შესაძლებლობებს:
„სასკოლო ლიგა წელს თბილისსა და რეგიონებში 15 სპორტის სახეობაში ტარდება. ეს პროექტი წლიდან წლამდე უფრო და უფრო პოპულარული ხდება სკოლის მოსწავლეებს შორის. ახლა სასკოლო ლიგა სეზონის გადამწყვეტ ფაზაში შედის. გაზაფხულისთვის სხვადასხვა გუნდურ სახეობაში დაიწყება პლეიოფები, გაიმართება ინდივიდუალური სახეობების ფინალური ეტაპებიც, როგორც თბილისში, ასევე – რეგიონებში. ბოლოს კი ყველაფერი სუპერფინალებით დასრულდება“, – გვიყვება სასკოლო ლიგის კოორდინატორი, ოთარ აბულაძე.
სპორტული შეჯიბრებები იმართება საქართველოს არაერთ მხარეში – აჭარა, იმერეთი, კახეთი, ქვემო ქართლი და თბილისი და მასშტაბური ტურნირების ათასობით მონაწილე მოსწავლე კრავს სასკოლო ლიგის საერთო კონცეფციას.
„საორგანიზაციო ჯგუფს აქვს ბევრი სიახლე: სხვადასხვა სახის გამოკითხვები თუ გათამაშებები. სპორტული ტურნირების სისტემა ყოველწლიურად იხვეწება და უფრო დიდი მოტივატორი ხდება ჩართული ახალგაზრდებისთვის. საქართველოს ბანკთან თანამშრომლობამ სასკოლო ლიგა განავითარა აბსოლუტურად ყველა მიმართულებით, განსაკუთრებით კი – მარკეტინგის.
გამოწვევად კვლავაც რჩება ინფრასტრუქტურა. სასკოლო ლიგას სჭირდება თავისი ინფრასტრუქტურა, რათა ტურნირები უფრო მოქნილი და მოსწავლეებზე მორგებული გახადოს.“
სასკოლო ლიგის დაარსების იდეა გაჩნდა 15 წლის წინ – დროდადრო იდეამ მოიკრიბა ძალა და დღევანდელობამდე აბსოლუტურად სრულფასოვნად მოაღწია. წლევანდელი წლის ჩათვლით, მასშტაბური სასკოლო ტურნირები 4 წელზე მეტია, რაც მიმდინარეობს და როგორც სასკოლო ლიგის კოორდინატორმა, ოთარ აბულაძემ გვითხრა, საქართველოს ბანკთან პარტნიორობის შემდეგ ტურნირის პოპულარობა და ცნობადობა საქართველოს ბევრ სკოლაში გაორმაგდა.
პროექტი ჯერ კიდევ მზარდია, უფრო და უფრო ფართოვდება და ითვისებს ახალ ტერიტორიებს, სპორტებს, ახალგაზრდა ადამიანებს, აუმჯობესებს ინფრასტრუქტურას და იფუთება ისე, როგორც მაღალორგანიზებული საერთაშორისო ტურნირები.
ტურნირში მონაწილეობა ნებისმიერი სკოლის ნებისმიერ მოსწავლეს შეუძლია – მოემზადე მომავალი სეზონისთვის და გამოცადე შენი თავი ინდივიდუალურად თუ გუნდურად იმ სპორტის სახეობაში, რომელიც ყველაზე მეტად გინდა.