საქართველოს ჯუდოს ნაკრები ევროპის ჩემპიონატის წინ

3 ნოემბრიდან 5 ნოემბრის ჩათვლით, საფრანგეთის ქალაქ მონპელიეში გაიმართება ევროპის ჩემპიონატი ჯუდოში – ტურნირში კონტინენტის 46 ქვეყნის 391 სპორტსმენი მიიღებს მონაწილეობას, მათ შორის 220 მამაკაცი და 171 ქალი.

ცხადია, ჩემპიონატზე დარეგისტრირებულნი არიან ქართველი ჯუდოკები: საქართველოს ნაკრების კაცთა განაცხადში სულ 9 სპორტსმენია, ხოლო ქალთა ნაკრებში – 6. 73 კილოგრამში მოასპარეზე გიორგი ტერაშვილი გუნდს ტურნირის დაწყებამდე ცოტახნით ადრე შეუერთდადა საბოლოო განაცხადი შემდეგნაირად დაკომპლექტდა:

კაცები:
გიორგი სარდალაშვილი (60 კგ.);
ვაჟა მარგველაშვილი (66 კგ.);
ლაშა შავდათუაშვილი და გიორგი ტერაშვილი (ორივე – 73 კგ.);
ტატო გრიგალაშვილი (81 კგ.);
ლაშა ბექაური და ლუკა მაისურაძე (ორივე – 90 კგ.);
ილია სულამანიძე (100 კგ.);
გურამ თუშიშვილი (+100 კგ.).

ქალები:
ეთერ ლიპარტელიანი და ნინო ლოლაძე (57 კგ.);
ეთერ ასკილაშვილი (63 კგ.);
ნინო გულბანი და მარიამ ჭანტურია (70 კგ.);
სოფიო სომხიშვილი (+78 კგ.).

რაც შეეხება უშუალოდ ტურნირის პრინციპსა და 3 ნოემბრიდან 5 ნოემბრამდე გადანაწილებულ განრიგს, პირველ დღეს გამარჯვებულები გამოვლინდებიან კაცთა 60 და 66 კილოგრამ წონებში, ხოლო ქალთა – 48, 52 და 57 კგ-მდე წონით კატეგორიებში; მეორე დღეს, 4 ნოემბერს: კაცთა 73 და 81 ქალთა 63 და 70 კგ-ებში; ბოლო დღეს, 5 ნოემბერს კი: კაცთა 90, 100 და +100 და ქალთა 78 და +78 კგ-ებში.

მნიშვნელოვანია ითქვას, რომ ფინალური ბლოკები გაიმართება Sud de France Arena-ზე და სამივე დღეს ერთნაირად, თბილისის დროით 18:00 საათზე დაიწყება. უნდა ვიმედოვნოთ, რომ ტურნირის სამივე დღეს, საღამოს 18:00 საათზე ტატამზე ქართველ ჯუდიკებს ვიხილავთ.

ევროპის ჩემპიონატის გამორჩეულად დამაინტრიგებელ და დაძაბულ დაპირისპირებას ელიან 81 კგ-მდე წონით კატეგორიაში – ევროპის მოქმედი ჩემპიონი, უნიჭიერესი ქართველი ჯუდოკა, ტატო გრიგალაშვილი დიდი ალბათობით ბელგიელ მატიას კასესთან გაარკვევს ოქროს მედლის ამბავს. თვით ევროპის ჯუდოს კავშირიც კი გამოეხმაურა ამ უკვე ტრადიციად ქცეულ დაპირისპირებას:

 „ტატო და მატიასი ის ორი ჯუდოკაა, რომლებიც გულშემატკივრებს ყველა შეხვედრის დროს უმაღლესი დონის ჯუდოს სთავაზობენ, როგორც ტაქტიკური, ასევე – ტექნიკური მხარით.“ – ვკითხულობთ EJU-ს ტექსტში.

გასული წლის ევროპის ჩემპიონატი ჯუდოში ბულგარეთის დედაქალაქ სოფიაში გაიმართა, სადაც ქართველ ჯუდოკებს ძალიან კარგი შედეგებიც ჰქონდათ – 2 ოქრო და 2 ბრინჯაოს მედალი. როგორც უკვე აღვნიშნეთ, ტატო გრიგალაშვილი მოქმედი ევროპის ჩემპიონის სტატუსით ბრუნდება ტურნირზე, იმავე სტატუსით ჩადის მონპელიეში 90 კილოგრამ წონით კატეგორიაში მოასპარეზე, ლუკა მაისურაძეც. შარშან ბრინჯაოს მედალი გურამ თუშიშვილმა მოიპოვა და დარწმუნებულები ვართ, რომ წელს მას უფრო მაღალი მიზნებისთვის ბრძოლის უდიდესი სურვილი და რაც მთავარია, შესაძლებლობა აქვს. ასევე ბრინჯაოს მედალი მოიპოვა ქალთა ნაკრების ლიდერმა, ეთერ ლიპარტელიანმაც.

გვჯერა, რომ სოფიას შემდეგ, მონპელიეში უფრო მეტი მედლითა და წარმატებით დაბრუნდებიან ქართველი ჯუდოკები სამშობლოში.

ავტორი: გიორგი ყორღანაშვილი