2024 წლის მარტის თვის ბოლო შესაძლოა ქართული ფეხბურთის ისტორიაში ყველაზე დიდი მნიშვნელობის მქონე და წარმატებული კვირა გახდეს, რადგანაც 21 მარტს საქართველო-ლუქსემბურგის თამაშით იწყება ერთა ლიგის საპლეიოფო ბრძოლა 2024 წლის ევროპის ჩემპიონატის საგზურისთვის.
შეხვედრა თბილისში, ბორის პაიჭაძის სახელობის სტადიონზე გაიმართება (დასაწყისი 21:00 საათი), სადაც გამოვლინდება ფინალისტი, რომელიც თავის მხრივ დაელოდება მეტოქეს – საბერძნეთსა და ყაზახეთს შორის გამარჯვებულს. ფინალური მატჩიც თბილისში გაიმართება.
ერთა ლიგის ნახევარფინალური მატჩის ყველა ბილეთი სულ რამდენიმე საათში გაიყიდა – სავსე არენა მთელს კონტინენტს გააგონებს, თუ როგორ უნდა ქართველ გულშემატკივარს საკუთარი ქვეყნის ნაკრების ხილვა დიდ საფეხბურთო ფორუმზე, რასაც ევროპის ჩემპიონატის ფინალური ეტაპი ჰქვია.
როგორც ყოველთვის, განსაკუთრებული მნიშვნელობა და გავლენა ექნება დინამო არენაზე შეკრებილი გულშემატკივრის საერთო განწყობას, შემართებასა და თამაშში ჩართულობას. ბოლო რამდენიმე წელია, ეროვნული ნაკრების აბსოლუტურად ყველა თამაშს თბილისში თუ გასვლით ქალაქებში დაჰყვებიან ქართული სპორტის ქომაგები – სწორედ ისინი ქმნიან და შექმნიან კიდეც ამინდს 21 მარტს სტადიონზე.
ქომაგების ერთ-ერთი წარმომადგენელი, ბექა ნოზაძე გვიზიარებს საკუთარ საგულშემატკივრო ემოციებსა და განცდებს ამ უმნიშვნელოვანესი მატჩის წინ:
„ნაკრების ყოველი თამაში განსაკუთრებულ დატვირთვას ატარებს. სამწუხაროდ, ფეხბურთის თამაშის ნიჭი არ მქონია, თუმცა მას შემდეგ, რაც მამაჩემთან ერთად სტადიონზე პირველად წავედი, ამ ყველაფრით მოვიწამლე. საოცარი გრძნობაა, როდესაც მატჩის წინ ჰიმნი იკვრება, ფეხზე დგახარ, მწვანე მინდორს გასცქერი და შენი ქვეყნის დროშა ფრიალებს. ამ დროს მიფიქრია, რომ თუნდაც 5 წუთით რომ შევსულიყავი მინდორზე, ალბათ, ყველაფერს ვიზამდი.
იქიდან გამომდინარე, რომ ფეხბურთი ჩემი ცხოვრების ნაწილი გახდა, მინდოდა, რამე ისეთი მეკეთებინა, რაც საქართველოს და ქართულ სპორტს გამოადგებოდა. სწორედ ამიტომ, 2010 წელს სრულიად უცხო ადამიანებთან ერთად გადავწყვიტეთ, შეგვექმნა „ქართული სპორტის ქომაგები“. მიზნად დავისახეთ ევროპის ან მსოფლიო ჩემპიონატზე გასვლა. ერთმანეთს უპირობო სიტყვა მივეცით და ამ სიტყვას დღემდე ვასრულებთ. ოცნების ახდენამდე ძალიან ცოტა გვაკლია და ყველაფერს ვიზამთ იმისთვის, რომ ჯერ 21 და შემდეგ 26 მარტი ჩვენი გამარჯვების დღედ იქცეს.
სიმართლე გითხრათ, ეს დრო ჩემთვის ძალიან სწრაფად გადის, ვინაიდან ყოველდღიურ მზადებაში ვარ და როგორც ნაკრებს, ასევე მთლიანად საქართველოს ვპირდებით, რომ ქომაგების ტრიბუნა ისე იგუგუნებს, როგორც არასდროს.
მარტივი თამაშების მოლოდინი ნამდვილად არ მაქვს, მიზანი პლეი-ოფში მყოფ ოთხივე გუნდს ერთი გვაქვს, შესაბამისად, მოტივაცია მათაც არ აკლიათ. თუმცა ვფიქრობ, რომ თუნდაც საკუთარ კედლებში თამაშის ფაქტორი გადამწყვეტი შეიძლება აღმოჩნდეს ამ თამაშებში.
დანებების და უკან დახევის უფლება არ გვაქვს. არ აქვს მნიშვნელობა, ვინ ითამაშებს სასტარტო შემადგენლობაში, თითოეულმა ფეხბურთელმა შესაძლებლობების მაქსიმუმის ზღვარზე უნდა ითამაშოს და ყველაფერი უნდა გავაკეთოთ იმისთვის, რათა მოედნიდან თავაწეულები გავიდეთ. წლებია, ამ მიზნისკენ მივდივართ, ახლა კი დროა, ჩვენც ვიზეიმოთ ჩემპიონობა და ამაყად ვაფრიალოთ საქართველოს დროშა.”
როგორც გამოცდილი ქომაგი, ბექა გვეუბნება, 21 მარტის შეხვედრაში გადამწყვეტი როლი ექნება გულშემატკივარს – გადავსებული სტადიონი იქნება მთავარი ფაქტორი და აუცილებლად მოახდენს თამაშის მსვლელობასა და შედეგზე გავლენას. სწორედ ამიტომაცაა საქართველოს ბანკი არა მხოლოდ ეროვნული ნაკრების გენერალური სპონსორი, არამედ ქართული ფეხბურთის მხარდამჭერი ყოველთვის და ყველგან.
ისღა დაგვრჩენია, დაველოდოთ 21 მარტის საღამოს 21:00 საათს და ვუქომაგოთ საქართველოს ეროვნულ ნაკრებს ერთა ლიგის საპლეიოფო ნახევარფინალურ მატჩში ლუქსემბურგის წინააღმდეგ.