ესპანეთთან და ნორვეგიასთან შეხვედრის წინ – საქართველოს ფეხბურთის ეროვნული ნაკრების შემადგენლობა ცნობილია

3-თვიანი პაუზის შემდეგ ევროპის ჩემპიონატის შესარჩევი ეტაპი ჯგუფური მატჩებით განახლდება ­- ორი ძალიან მნიშვნელოვანი შეხვედრა ელის საქართველოს ეროვნულ ნაკრებს:

საქართველო V ესპანეთი – 8 სექტემბერი, 20:00 საათი

ნორვეგია V საქართველო – 12 სექტემბერი, 22:45 საათი

ამ დროისთვის ჩვენი A ჯგუფის ერთპიროვნული ლიდერი 12 ქულით შოტლანდიაა (20 ივნისს საკუთარ მოედანზე და მძიმე მეტეოროლოგიური პირობების ფონზე 0-2 დაგვამარცხეს); მეორე ადგილზე ვართ ჩვენ 4 ქულით; იმავე რაოდენობის ქულები აქვთ ნორვეგიელებსაც, უბრალოდ – უარესი ბურთების სხვაობით (ჩვენთან, ბათუმში გამართული შეხვედრა ფრედ – 1-1 დასრულდა); საქართველოს ნაკრების მომავალი მეტოქე ესპანეთი კი, რომელთანაც ამ ჯგუფურ ეტაპზე პირველ შეხვედრას გავმართავთ დინამო არენაზე, 3 ქულით მესამე ადგილზეა.

1. შოტლანდია – 12 ქულა (გოლები 9-1)
2. საქართველო – 4 ქულა (გოლები 3-4)
3. ნორვეგია – 4 ქულა (გოლები 5-7)
4. ესპანეთი – 3 ქულა (გოლები 3-2)
5. კვიპროსი – 0 ქულა (გოლები 2-8)

ფაქტობრივად, გადამწყვეტ ფაზაში შევდივართ და თითოეულ შეხვედრას, თითოეულ ეპიზოდსა და გოლს უდიდესი მნიშვნელობა ენიჭება.

ვილი სანიოლმა ხსენებული ორი შეხვედრისთვის უკვე დაასახელა რჩეული 23 ფეხბურთელი, რომელთა შორის ორი დებიუტანტია: თბილისის დინამოს ცენტრალური მცველი, ალექსანდრე კალანდაძე და ესპანური ლევანტეს ნახევარმცველი, გიორგი ქოჩორაშვილი. სრული 23-კაციანი შემადგენლობა კი ასეთია:

მეკარე – გიორგი ლორია, გიორგი მამარდაშვილი, ლუკა გუგეშაშვილი;

დაცვა – გურამ კაშია, გიორგი გოჩოლეიშვილი, ვლადიმერ მამუჩაშვილი, სანდრო კალანდაძე, საბა საზონოვი, ლაშა დვალი, სოლომონ კვირკველია, ირაკლი აზაროვი;

ნახევარდაცვა – ლუკა გაგნიძე, გიორგი აბურჯანი, გიორგი წიტაიშვილი, ზურიკო დავითაშვილი, ხვიჩა კვარაცხელია, ოთარ კიტეიშვილი, საბა ლობჟანიძე, გიორგი ჩაკვეტაძე, გიორგი ქოჩორაშვილი, ანზორ მექვაბიშვილი;

თავდასხმა – გიორგი მიქაუტაძე, ბუდუ ზივზივაძე.

აიღე საგულშემატკივრო ბარათი

ბარათის შეკვეთა

ძალიან საინტერესო იქნება დებიუტანტების როლი და ფუნქციები ვილი სანიოლის სათამაშო პრაქტიკაში. ჩვენ სანდრო კალანდაძეს კარგად ვიცნობთ და გვახსოვს მისი შესანიშნავი თამაშები და პერფორმანსები რამაზ სვანაძის ახალგაზრდულ გუნდში ჩვენს ქვეყანაში გამართულ U21 ევროპის ჩემპიონატზე. შედარებით ნაკლები რამაა ცნობილი გიორგი ქოჩორაშვილზე, რომელიც რამდენიმე წელია, ესპანეთში თამაშობს, კლუბების გამოცვლაც კი მოასწრო და ახლა აქვს, ალბათ, კარიერაში ყველაზე კარგი პერიოდი, როცა ესპანეთის სეგუნდა დივიზიონის მონაწილე ლევანტეს შემადგენლობაში დაიმკვიდრა ადგილი და უკვე გოლის გატანაც კი მოახერხა.

ცენტრალური ნახევარმცველი ეს ის პრობლემური პოზიციაა, რომლის ჩანაცვლება თუ ამოვსება ყველაზე მეტად გვიჭირს თაობათა ცვლის პროცესში – ნაკრების ყოფილმა კაპიტანმა, ჯაბა კანკავამ დაასრულა სანაკრებო კარიერა, ნიკა კვეკვესკირი ასაკში შედის და, მაგალითად, ახლანდელ 23 კაცში აღარ დაუძახა მას ვილი სანიოლმა. მოკლედ, პრობლემა თვალსაჩინოა. ქოჩორაშვილის თამაშის სტილიდან გამომდინარე, ე.წ. box to box მშრომელი და მუშა ნახევარმცველი ძალიან გვჭირდება და გვეიმედება კიდეც სანდროსი. დანარჩენი უკვე მის საკლუბო კარიერაზე, ჯანმრთელობასა და პროგრესის გაგრძელებაზეა დამოკიდებული.

ყველაზე წარმატებული სატრანსფერო ფანჯარა გვქონდა წლევანდელ ზაფხულში, ბევრი ქართველი ნიჭიერი და იმედისმომცემი ფეხბურთელი გადავიდა ახალ და, რაც მთავარია, უკეთეს კლუბში. წარმატებული საკლუბო კარიერა პირდაპირი მნიშვნელობით ზემოქმედებს ეროვნულ ნაკრებზე, ეროვნული ნაკრების თამაშის ხარისხზე. სრული ფსიქოლოგიური და ფიზიკური განახლებაა წარმატებული ტრანსფერი, ამიტომ ჩვენ უნდა ველოდოთ ახალ ჟორჟ მიქაუტაძეს (რომელიც მეციდან აიაქსში გადავიდა), ახალ საბა საზონოვს (მოსკოვის დინამოდან ტორინოში გადავიდა), ახალ გიორგი ჩაკვეტაძეს (გენტიდან ვოტფორდში გადავიდა) და ა.შ.

ვიცით, როგორი ძლიერია ესპანეთის ნაკრები, თუმცა დაგვიგროვდა მათთან და მსგავს გუნდებთან თამაშის კარგი გამოცდილება და ისიც აშკარაა, რომ ესპანეთს უჭირს ჩვენთან თამაში და ყოველთვის რაღაც „გაუთვალისწინებელი“ ხდება მათთვის და ახლაც იმავეს იმედი უნდა გვქონდეს.

ნორვეგიის ნაკრებს რაც შეეხება, ბათუმში გამართული შეხვედრის შემდეგ უნდა ითქვას, რომ რადიკალურად სხვა გუნდი იქნება ახლა ნორვეგია და ამ რადიკალურ სხვაობას სულ რაღაც ერთი ფეხბურთელი განაპირობებს – ერლინგ ჰოლანდი.

ვილი სანიოლს ნამდვილად აქვს არჩევანი და იმის ფუფუნება, ძირითად შემადგენლობაზე ბევრი იფიქროს, ბევრი ვარიანტი გატესტოს ვარჯიშებზე და გაითვალისწინოს მეტოქეთა ძლიერი თუ სუსტი მხარეები. ბევრი ფეხბურთელი კარგ ფორმაშია, ბევრიც ფორმის აკრეფის პროცესშია. სექტემბრის სანაკრებო პაუზები მათთვის უნდა გამოდგეს გარდამტეხი და წარმატებული შედეგებით დაბრუნდნენ თავიანთ კლუბებში – საქართველოს ეროვნულ ნაკრებს ნამდვილად აქვს საკმარისი ძალა და ტალანტი, რომ ორივე მატჩში სასურველი შედეგი დავაფიქსიროთ და საუკეთესო შემთხვევაში სატურნირო ცხრილში მეორე ადგილი შევინარჩუნოთ.

ავტორი: გიორგი ყორღანაშვილი