მოახლოვდა ნანატრი სანაკრებო პაუზა და განახლდება ევროპის 2024 წლის შესარჩევი თამაშები. საქართველოს ეროვნული ნაკრები ორ შეხვედრას გამართავს – ჯერ 8 სექტემბერს ესპანეთთან თბილისში, დინამო არენაზე, შემდეგ კი 12 სექტემბერს გასვლაზე ნორვეგიასთან ქალაქ ოსლოში.
ესპანეთის ეროვნული ნაკრები უახლოეს წარსულში ორჯერ გვეწვია დინამო არენაზე და ორივე შემთხვევაში ძალიან დაძაბულ და მძიმე ბრძოლაში მოახერხეს ჩვენი დამარცხება: გვახსოვს 2012 წლის 11 სექტემბერი, როცა ჩვენი გუნდის მეკარემ, გიორგი ლორიამ კარიერის მატჩი ჩაატარა, თუმცა ბოლო წუთებზე გაშვებული გოლით დავმარცხდით 0-1; 2021 წლის მარტში კი ძალიან დიდი ხნის განმავლობაში ვიგებდით ხვიჩა კვარაცხელიას გოლით, მერე საპასუხო გოლი გავუშვით, ბოლოს კი ასევე ძალიან დასანანად დანი ოლმომ დაგვამწუხრა 1-2.
აიღე საგულშემატკივრო ბარათი
ჩვენთვის სრულიად უნიკალური და განუმეორებელი გამოცდილებაა უდიდეს საფეხბურთო გრანდთან საკუთარ კედლებში თამაში – გამოცდილებას იღებენ ფეხბურთელები და გამოცდილებას იღებს გულშემატკივარიც. სრულიად სავსე დინამო არენა, რომელიც სასწაულის მოლოდინშია, ატმოსფერო და განწყობა გუნდებს შორის არსებულ სარეიტინგო სხვაობას ფორმალობად აქცევს – ასე მოხდა წინა ორ შემთხვევაში და იგივე განმეორდება 8 სექტემბერსაც, რადგან აბსოლუტურად ყველა ბილეთი გაყიდულია.
რამდენადაც სასიხარულოა ქართველი გულშემატკივრების ასეთი აქტიურობა, იმდენად დაბრკოლებებითაა სავსე ხოლმე დინამო არენამდე მისასვლელი გზა. სწორედ ამიტომ ერთგულ გულშემატკივრებს რამდენიმე რჩევას ვუზიარებთ, რომლებიც არამხოლოდ 12 სექტემბერს, არამედ სხვა თამაშებზეც გაუმარტივებს დინამო არენაზე მოხვედრას:
ადრე მიდი სტადიონზე
საერთაშორისო რეკომენდაცია არსებობს, რომ ნებისმიერ სპორტულ ღონისძიებაზე გულშემატკივარი ადრე მივიდეს არენაზე, თუმცა ეს რეკომენდაცია ორმაგდება თუ სამმაგდება ჩვენს დედაქალაქში, მოსალოდნელი სატრანსპორტო კოლაფსებისა და დინამო არენასთან მისასვლელი უახლესი წერეთლის გამზირის სარეაბილიტაციო სამუშაოებიდან გამომდინარე. თამაში 20:00 საათზე იწყება და სასურველია 1 საათით ან, როგორც მინიმუმ, 45 წუთით ადრე მისვლა. სპორტული დაპირისპირება მსაჯის სასტვენამდე იწყება, გუნდების მოედანზე გამოსვლითა და ჰიმნების მღერით. დაგვიანებული გულშემატკივარი, რომელიც არ მოუსმენს მეტოქის ჰიმნს და არ იმღერებს საკუთარს, ფაქტობრივად, გამოტოვებს დაპირისპირების ერთ-ერთ მნიშვნელოვან ნაწილს. დინამო არენაზე სათამაშო მუხტს ხომ თითოეული გულშემატკივარი სწორედ ჰიმნების ეპიზოდიდან იძლევა.
ისარგებლე მეტროთი ან გაისეირნე ფეხით
ეს წმინდა ლოჯისტიკური რჩევაა, თუმცა დანამდვილებით შეიძლება იმის თქმა, რომ ძალიან პრაქტიკულიც. მეტრო შეუფერხებლად გადაადგილდება და არ არსებობს შეყოვნების საფრთხე. გარკვეულ მანძილზე ფეხით გავლაც გაუთვალისწინებელი ხერგილებისგან თავის არიდების საუკეთესო საშუალებაა. თანაც დინამო არენას გეოგრაფიული მდებარეობა ორივე შემთხვევაში გამოსადეგია: ორი სხვადასხვა ხაზის მეტრო (სადგურის მოედანი და წერეთელი) და რამდენიმე ფეხით ადვილად გასავლელი ქუჩა უკავშირდება.
არ წაიყოლო ნივთები, რომლებსაც ისედაც არ შეგატანინებენ
ეს რჩევაც ხომ ძალიან ლოგიკურად ჟღერს, თუმცა სტადიონის ჭიშკრებთან დახვავებული პლასტმასის ბოთლები თუ სხვადასხვა საკვები პროდუქტების შესაფუთი ქაღალდები ნიშნავს, რომ ეს რჩევაც უნდა გაიცეს. არსებობს სია იმ ნივთებისა (მაგალითად, წყლის ბოთლი), რომელსაც საბილეთო კონტროლის შემდეგ სტადიონის ტერიტორიაზე არ შეგატანინებენ, აუცილებლად გაეცანი ამ სიას თამაშზე წასვლამდე და გაითვალისწინე.
შეამოწმე შენი ბილეთის შესაბამისი ჭიშკარი
დინამო არენას წრიულად რამდენიმე ჭიშკარი აქვს. თითოეულ ბილეთზე შენი დასაჯდომი ადგილის მიხედვით განსაზღვრულია ყველაზე ახლო და მოსახერხებელი ჭიშკარი. თავად ჭიშკრების ადგილმდებარეობა კი მინიშნებულია ბილეთის უკანა მხარეს. მოკლედ, ბილეთზე არსებული ყველა მინიშნება (ჭიშკარი, იარუსი, ადგილი) ძალიან დაგეხმარება, დროულად მიაგნო ყველაფერს და მალევე აღმოჩნდე შენს ადგილზე.
აიღე საგულშემატკივრო ბარათი
საგულშემატკივრო ბარათი ზედგამოჭრილია სტადიონზე ხშირად მოსიარულე იმ გულშემატკივრებისთვის, რომელთაც ვერ წარმოუდგენიათ ქომაგობა საყვარელი ნაკრების მაისურის თუ სხვადასხვა საგულშემატკივრო ინვენტარის გარეშე. ეროვნული ნაკრების ოფიციალურ მაღაზიაში fanshop.ge-ზე შესაძლებელია სპეციალური მერჩენდაიზის შეძენა გარკვეული ფასდაკლებებით. ასევე უშუალოდ 12 სექტემბერს სტადიონის ტერიტორიაზე არსებულ საკვებისა და სასმლის დახლებზე იმოქმედებს 50%-იანი ქეშბექის აქცია (მაქსიმუმ 50 ლარის პროდუქტის შეძენისას).
ისღა დაგვრჩენია, დაველოდოთ მონატრებულ საფეხბურთო დღესასწაულს, სანაკრებო თამაშებს ჩვენს საყვარელ დინამო არენაზე და ერთად ვუქომაგოთ საქართველოს ეროვნულ ნაკრებს ძალიან ძლიერ და უკვე პრინციპულ მეტოქესთან, ესპანეთის ეროვნულ ნაკრებთან.