ევროპული ფეხბურთის ასოციაციების კავშირმა ქალთა ფეხბურთში კიდევ ერთი ახალი ტურნირი – ერთა ლიგა შექმნა. ერთა ლიგა სანაკრებო ტურნირია შესაბამისი დივიზიონებით, ჯგუფური ეტაპებითა და დივიზიონებს შორის დაწინაურება-დაქვეითების პრინციპით. ფაქტობრივად, კაცთა ერთა ლიგის ანალოგიაა მცირე განსხვავებებით.
ერთა ლიგა სექტემბრის ბოლოს დაიწყება და C ჯგუფში მყოფი საქართველოს ქალთა ნაკრებიც გამართავს შეხვედრებს. ისრაელელი სპეციალისტის, ირის ანტმანის მიერ გაწვრთნილი გუნდის მეტოქეები C ჯგუფში ლიეტუვა, თურქეთი და ლუქსემბურგი იქნებიან. ტურნირის ისტორიაში პირველ შეხვედრას საქართველოს ქალთა ნაკრები თბილისში 22 სექტემბერს თურქეთის წინააღმდეგ გამართავს.
დეკემბრის ჩათვლით გაიმართება ყველა დარჩენილი შეხვედრა და საბოლოოდ გამოვლინდება ჩვენი ჯგუფის გამარჯვებული, რომელიც B დივიზიონში დაწინაურდება. სულ C დივიზიონში 5 ჯგუფია, ამ 5 ჯგუფიდან მეორე ადგილზე გასული 3 საუკეთესო ნაკრებიც მიიღებს რანგით მაღალ დივიზიონში დაწინაურების შანსს – C დივიზიონის 3 საუკეთესო მეორეადგილოსანი B ლიგაში მესამე ადგილზე გასულ გუნდებს პლეიოფის სისტემით დაუპირისპირდებიან. სულ ტურნირზე 51 ნაკრები იღებს მონაწილეობას. ტურნირის მეორე სეზონი 2024 წელს დაიწყება და ეს უკვე იქნება დამატებითი შანსი ნაკრებებისთვის, რომ 2025 წლის ევროპის ჩემპიონატის ფინალურ ეტაპზე გავიდნენ.
აიღე საგულშემატკივრო ბარათი
ტურნირის ფორმატი მაქსიმალურად იძლევა საშუალებას, ჩვენი დონის ნაკრებმა დაამტკიცოს საკუთარი შესაძლებლობები, დამსახურებულად და სამართლიანად, ყველა სპორტული პრინციპის დაცვით მოიპოვოს უფრო ძლიერ სატურნირო სივრცეში თამაშის უფლება. კაცთა ფეხბურთის მსგავსად, ქალთა ერთა ლიგა კიდევ ერთი შანსია, საერთაშორისო ასპარეზზე წარმოვაჩინოთ საკუთარი თავი.
საქართველოს ქალთა ნაკრებმა ბოლო ამხანაგური შეხვედრები ივლისში, სომხეთის წინააღმდეგ გამართა – ერთ შემთხვევაში ჩვენმა ნაკრებმა მეზობლებს 5-0, მეორე შემთხვევაში კი 3-1 სძლიეს. ორი ძალიან დამაჯერებელი გამარჯვება ერთა ლიგისთვის მოსამზადებელ ეტაპზე აუცილებლად წაგვადგება როგორც ფიზიკურად, ისე ფსიქოლოგიურად.
გარდა სანაკრებო ამხანაგური თამაშებისა, ვიცით, რომ უდიდესი მნიშვნელობა აქვს საკლუბო ფეხბურთს: გივი კვარაცხელიას გაწვრთნილმა ქალთა საფეხბურთო კლუბმა სამეგრელომ (რომელიც საქართველოს ქალთა ეროვნული ლიგის გამარჯვებულია) ჩემპიონთა ლიგის მეორე საკვალიფიკაციო ეტაპამდე მიაღწია. პირველ ეტაპზე მათ სლოვენიური მურა დაამარცხეს ძალიან დაძაბულ ბრძოლაში 0-0 (პენალტების სერია: 4-5). მეორე საკვალიფიკაციო ეტაპზე სამეგრელოს მეტოქე კვიპროსული აპოლონი იყო, რომელმაც მართალია, ადვილად სძლია გივი კვარაცხელიას გუნდს ანგარიშით 3-0, თუმცა გოგონებმა ძალიან კარგი გამოცდილება მიიღეს და ეს გამოცდილება აუცილებლად წაადგება ეროვნულ ნაკრებსაც.
- საქართველო V თურქეთი – 22 სექტემბერი, 18:00 საათი;
- ლუქსემბურგი V საქართველო – 26 სექტემბერი, 21:30 საათი;
- ლიეტუვა V საქართველო – 27 ოქტომბერი, 19:00 საათი;
- საქართველო V ლიეტუვა – 31 ოქტომბერი, 20:00 საათი;
- საქართველო V ლუქსემბურგი – 1 დეკემბერი, 20:00 საათი;
- თურქეთი V საქართველო – 5 დეკემბერი, 20:00 საათი.
დაველოდოთ უეფას ახალ ტურნირს, ახალ ეტაპს ქალთა ფეხბურთში და ვუქომაგოთ მთლიან პროცესში ჩართულ და განვითარების გზაზე მდგარ ქართულ ქალთა ფეხბურთსაც – ერთა ლიგით ახალი ათვლა იწყება.
ავტორი: გიორგი ყორღანაშვილი