როგორ მოიგო საქართველომ ფეხბურთის სამყაროს გული – ისტორიული მატჩის მიმოხილვა

საქართველოს ბანკი - საქართველოს ეროვნული საფეხბურთო ნაკრების მთავარი სპონსორი.

18 ივნისი ქართული ფეხბურთის ისტორიაში უმნიშვნელოვანეს თარიღად იქცა: დამოუკიდებელი საქართველოს ისტორიაში პირველად ჩვენმა ნაკრებმა სწორედ ამ დღეს ითამაშა ევროპის ჩემპიონატის ფინალური ეტაპის პირველი მატჩი. გერმანიის ქალაქ დორტმუნდში, ვესტფალენშტადიონზე მსოფლიო ფეხბურთის გულშემატკივარმა საოცარი სანახაობა და ჯერჯერობით ტურნირის გამორჩეულად საინტერესო შეხვედრა იხილა.

თურქეთი V საქართველო 3-1

ვილი სანიოლმა ტრადიციულ სქემას ამჯერადაც არ უღალატა და 3-4-1-2 ტაქტიკით შემდეგი ძირითადი თერთმეტეული შეარჩია:

მეკარე: მამარდაშვილი;

დაცვა: კვერკველია, კაშია, დვალი;

ნახევარდაცვა: კაკაბაძე, ქოჩორაშვილი, მექვაბიშვილი, წიტაიშვილი ჩაკვეტაძე;

თავდასხმა: მიქაუტაძე, კვარაცხელია.

აიღე საგულშემატკივრო ბარათი

ბარათის შეკვეთა

მატჩამდე რამდენიმე დღით ადრე გავიგეთ, რომ ჩვენი ნახევარდაცვის ერთ-ერთი ყველაზე მნიშვნელოვანი ფეხბურთელი, ოთარ კიტეიშვილი ტრავმის გამო გამოტოვებდა პირველ შეხვედრას, მის ნაცვლად ვილიმ ანზორ მექვაბიშვილი დააყენა და უკვე შეგვიძლია იმის თქმა, რომ უშუალოდ ნახევარდაცვის რგოლში პრობლემები ნაკლებად იყო და ანზორმა ამ ურთულეს დავალებას, რასაც კიტეს ჩანაცვლება ჰქვია, კარგად გაართვა თავი. მარტის თამაშებისგან განსხვავებით, მარჯვენა ფლანგი ლევან შენგელიას ნაცვლად, გიორგი წიტაიშვილმა ჩაიბარა. სხვა მხრივ არც ტაქტიკურად და არც შემადგენლობაში დიდი და განსაკუთრებული ცვლილება არ ყოფილა.

რაც შეეხება თამაშის მიმდინარეობას – მძიმედ დავიწყეთ, გვეტყობოდა ღელვა და პირველი თამაშის ეიფორია, თურქებმა კი ისარგებლეს ამ გარემოებით და პირველივე წუთებიდან მოიპოვეს უპირატესობა. 25-ე წუთზე მათ ეს უპირატესობა გოლად აქციეს და მიულდიურიმ გოლის გატანა მოახერხა მამარდას კარში.

გოლის შემდეგ გამოვფხიზლდით, თურქებს საგრძნობი უპირატესობა დავათმობინეთ და ჩვენც დავიწყეთ მომენტების შექმნა და გოლის გაშვებიდან 7 წუთში საპასუხო გოლიც შევაგდეთ – გიორგი ქოჩორაშვილის შესანიშნავი მოქმედება მეტოქის საჯარიმოს მარჯვენა ფლანგზე, ფინტი და უზუსტესი გადაცემა გიორგი მიქაუტაძეს, რომელმაც მაღალი საშემსრულებლო ოსტატობა ამჯერადაც გამოავლინა და ერთი შეხებით მარჯვენა დაბალ კუთხეში შეაგორა ბურთი. ისიც უნდა ითქვას, რომ გამათანაბრებელი გოლიდან მალევე გვქონდა კიდევ ერთი საგოლე მომენტი, ისევ ჟორჟი ურტყამდა და სანტიმეტრები დაგვაკლდა დაწინაურებამდე.

მეორე ტაიმის სტარტი პირველი ტაიმისას ჰგავდა და თურქებმა კვლავ იგდეს სადავეები ხელთ. 65-ე წუთზე უნიჭიერესმა არდა გიულერმა გაგვიტანა გოლი, მერე კი იდენტური სურათი და სცენარი – კვლავ ჩვენკენ გადმოვიდა უპირატესობა და როგორც მინიმუმ – სამი საგოლე მომენტი შევქმენით, თუმცა მომენტებში სიზუსტე და მომენტებში იღბალი დაგვაკლდა. განსაკუთრებით ემოციური იყო ბოლო წუთები, როცა ცენტრთან ახლოს ჯარიმის ჩაწოდების უფლება მოვიპოვეთ, ბურთთან კვარა მივიდა, მამარდაც კი მეტოქის საჯარიმოში ჩამოვიდა – ჩაწოდების მერე იყო ძელი და შეცვლაზე შემოსული ზურიკო დავითაშვილის დარტყმა, რომელიც ცარიელი კარიდან გამოიტანა თურქების მცველმა. სამწუხაროდ, 97-ე დამატებულ წუთზე აკტურკოღლუმ ისარგებლა შექმნილი სიტუაციით და ცარიელ კარში გაგვიტანა მესამე ბურთი და საბოლოო ანგარიშიც დააფიქსირა: 3-1.

ზოგადად, ჩვენს თამაშზე ბევრი უარყოფითისა და პოზიტიურის დანახვაა შესაძლებელი – იყო რიგ მომენტებში შეცდომები დაცვის ხაზში, ოდნავ ქაოსური განლაგება და შეუთანხმებელი პოზიციური თამაში, იყო მსგავსი პრობლემები ნახევარდაცვაშიც, თუმცა თამაშის მონაკვეთები ერთი-მეორეს ენაცვლებოდა, ხშირად იცვლებოდა ტემპი და ხასიათი და სულ მცირე იღბალი რომ ყოფილიყო ჩვენს მხარეს, თავისუფლად შეიძლებოდა თურქეთთან ერთი და სულაც სამი ქულის მოპოვება.

ისტორიული მატჩის ბოლოს გულისწყვეტა უკვე კარგის ნიშანია: ესე იგი, რეალური საფუძველი გვაქვს იმის, რომ ჩვენზე ძლიერ ნაკრებს ტოლი არ დავუდოთ და მოვუგოთ კიდეც. წარმოუდგენელი გამოცდილება დააგროვა თითოეულმა მოთამაშემ ამ 90-წუთიანი ტრილერით და, როგორც სოციალურ ქსელებში ნეიტრალური გულშემატკივრები წერენ, მათ უდიდესი სიამოვნება მიიღეს ამ თამაშისგან:

თურქებმა მოიგეს თამაში, ქართველებმა მოიგეს ჩვენი გული!

– ამ და მსგავს ძალიან ბევრ კომენტარს წააწყდებით ინტერნეტში, რაც საუკეთესო უკუკავშირია დებიუტანტი ნაკრებისთვის. ჩანდა ბოლომდე ბრძოლისა და თავგანწირვის უდიდესი ენთუზიაზმი, ჩვენში გამჯდარი ტექნიკური ფეხბურთი და საფეხბურთო ინტელექტი. საქართველოს ნაკრების ერთ-ერთი მისია ხომ სწორედ ესაა, რომ გამოვჩნდეთ და დავბრუნდეთ ევროპული ფეხბურთის რუკაზე, უფრო მეტმა თვალმა გვიყუროს, შეგვამჩნიოს, აღმოგვაჩინოს. ეს მისია ნამდვილად წარმატებით შესრულდა. თანაც ჯერ არაფერი დასრულებულა და წინ კიდევ ორი თამაშია:

• საქართველო VS ჩეხეთი – 22 ივნისი, 17:00 საათი, ქალაქი ჰამბურგი;
• საქართველო VS პორტუგალია – 26 ივნისი, 23:00 საათი, ქალაქი გელზენკირხენი.

F ჯგუფში 3-3 ქულით თურქეთი და პორტუგალია ლიდერობენ, მეორე ტურში კი ჩვენ ჩვენს უშუალო მეტოქეს, ჩეხეთის ნაკრებს შევხვდებით, რომლებმაც ძალიან დაძაბულ ბრძოლაში დათმეს მატჩი პორტუგალიასთან (2-1). ჩვენთვის მნიშვნელოვანია, გასული მატჩის საუკეთესო ანალიზი – ყველა აუცილებელი გარემოების გადახედვა, გათავისება და პრაქტიკაში გამოყენება. გვჯერა საკუთარი ნიჭისა და შესაძლებლობების! საქართველო ფორმაშია!

ავტორი: გიორგი ყორღანაშვილი