საქართველოს კალათბურთის ეროვნულმა ნაკრებმა ჩვენი ქვეყნისთვის სადებიუტო მსოფლიო ჩემპიონატი დაასრულა. ისტორია დაწერილია, საქართველოს ნაკრები მსოფლიოს 16 საუკეთესო გუნდს შორის მოხვდა. ეს გუნდური სპორტის სახეობებში ჩვენი ქვეყნისთვის უპრეცედენტო წარმატებაა.
2000-იანი წლების დასაწყისში, როდესაც გიორგი ცინცაძე თავის პირველ სანაკრებო თამაშებს ატარებდა, ჩვენი გუნდი ჯერ კიდევ ევროპის B დივიზიონში ასპარეზობდა და მაშინ რთულად წარმოსადგენი იყო, რომ იგივე თაობის კალათბურთელები მსოფლიო ჩემპიონატის თექვსმეტ საუკეთესო გუნდში მოხვდებოდნენ. როდესაც 2009 წელს ბელარუსის ნაკრები დავამარცხეთ და A დივიზიონში დავწინაურდით, ეს უდიდეს წარმატებად ჩაითვალა და მაშინ მთელი ქვეყანა ხარობდა. შემდეგ იყო კიდევ უფრო დიდი წარმატება და 2011 წერს პირველად ჩვენმა ნაკრებმა ევრობასკეტის საგზური მოიპოვა.
იმ დროიდან მოყოლებული საქართველომ თავისივე დაწესებული საკმაოდ მაღალი სტანდარტი აღარ დააგდო და 2011 წლის მერე ჩვენს გუნდს ევრობასკეტი აღარ გამოუტოვებია. 2015 წელს ევროპის ჩემპიონატზე ჯგუფიდან გასვლაც შევძელით და პლეიოფში უძლიერეს ლიეტუვის ნაკრებთან დრამატულ ბრძოლაში 85-81 დავმარცხდით.
მიუხედავად ამ წარმატებებისა და ნაკრების დიდი პროგრესისა, მსოფლიო ჩემპიონატზე მოხვედრას მაინც ვერ ვახერხებდით. როდესაც FIBA-მ ტურნირზე მოასპარეზე გუნდების რაოდენობა გაზარდა, ჩვენს ნაკრებს ისტორიული შანსი გაუჩნდა და ეს შანსი კარგად გამოვიყენეთ. 2023 წლის 26 თებერვალს, ისლანდიის ნაკრების წინააღმდეგ ჩატარებულ შეხვედრაში 77-80 დავმარცხდით, თუმცა ეს ჩვენთვის ხელსაყრელი სხვაობა იყო. ყველაფერი ერთადერთმა ქულამ გადაწყვიტა და საქართველოს ნაკრებმა მსოფლიო ჩემპიონატის საგზური მოიპოვა. იმ უამრავი უიღბლობის ფონზე, რაც წლების განმავლობაში გადაგვხდა, იქნებოდა ეს დასანანი ტრავმები თუ ბოლო წამებზე წაგებული თამაშები, ასეთი გამართლება ნამდვილად გვჭირდებოდა. ჩვენთვის გადამწყვეტი კი ესპანეთის ნაკრებთან მოგებული თამაში გამოდგა. ეს იყო ისტორიული მატჩი, რომელიც არასდროს დამავიწყდება და რომელიც ჩვენი კალათბურთის ისტორიაში ოქროს ასოებით ჩაიწერება. მოქმედი მსოფლიო ჩემპიონი დამატებით დროში დავამარცხეთ და მსოფლიო ჩემპიონატის საგზური დამსახურებულად გვერგო.
ფინალურ ეტაპზე მოხვედრა საქართველოსთვის უკვე უდიდესი წარმატება იყო, მაგრამ კენჭისყრის შედეგად გაირკვა, რომ ჩვენი მეტოქეები ჯგუფში სლოვენიის, ვენესუელის და კაბო ვერდეს ნაკრებები იქნებოდნენ, რაც იმას ნიშნავდა, რომ ჯგუფიდან გასვლაზე უნდა გვეფიქრა და ეს აბსოლუტურად რეალური ჩანდა. შესაბამისი ამოცანაც დაისახა, რისი შესრულებაც შევძელით კიდეც. მოსაგები თამაშები მოვიგეთ და ისტორია დავწერეთ.
მიუხედავად იმისა, რომ კაბო ვერდეს და ვენესუელის ნაკრებების წინააღმდეგ ფავორიტები ვიყავით, ამ გუნდების დამარცხება იოლი არ ყოფილა. კაბო ვერდეს ევროპის ერთ-ერთი საუკეთესო ცენტრი ედი ტავარეში ლიდერობს, რომლის განეიტრალებაც იდეალურად მოვახერხეთ. ვენესუელამ კი ძალიან ძლიერი არგენტინის ნაკრები მსოფლიო ჩემპიონატის გარეშე დატოვა და პერიმეტრიდან ეს გუნდი დიდ საფრთხეს წარმოადგენდა. თუმცა, გადამწყვეტ შეხვედრაში ძალიან კარგი დაცვა ვითამაშეთ, ვენესუელის ნაკრებს პერიმეტრი გადავუკეტეთ და ჩვენი ქვეყნისთვის ისტორიული გამარჯვება მოვიპოვეთ. პროგრამა მინიმუმი შევასრულეთ და ძალიან მაგარი შედეგი დავდეთ.
თამაშის ხარისხს რაც შეეხება, არასტაბილური ჩემპიონატი გვქონდა. ჩვენი თამაშის ობიექტურად შეფასებას ისიც ართულებს, რომ მოსაგები მატჩები კომფორტულად მოვიგეთ, თუმცა იმ შეხვედრებში, სადაც აუტსაიდერები ვიყავით, მსოფლიო კალათბურთის გრანდებს წინააღმდეგობა ვერ გავუწიეთ. გვქონდა კარგი მონაკვეთები, მაგრამ 40 წუთის განმავლობაში სტაბილურობად კარგად ვერ ვითამაშეთ. გამოჩნდა, რომ პირველი ეშელონის ნაკრები მაინც არ ვართ და ამ დონეზე რომ ავიდეთ, ჯერ კიდევ ბევრი კომპონენტი უნდა დავხვეწოთ. შემდეგი ნაბიჯის გადადგმა გვჭირდება. თუ შედარებით სუსტმა გუნდებმა შეცდომები გვაპატიეს და ეს თამაშები კლასის ხარჯზე მოვიგეთ, ფავორიტების წინააღმდეგ დეტალების მიმართ ყურადღება დაგვაკლდა და ასეთ შეხვედრებში დეტალები ძალიან ბევრს წყვეტს.
ჩემპიონატზე თამაში არ წაუვიდა ჩვენს ლეგიონერს, თედ მაკფადენს, ვისი შედეგიანი მოქმედებაც ძალიან დაგვაკლდა. მომავალში ახალ ლეგიონერზე უნდა ვიფიქროთ, ვისაც როგორც მსროლელის, ასევე ფლეიმეიქერის უნარები ექნება. ნაკრებში თაობათა ცვლა გაგრძელდება და შემდეგ ციკლებში უკვე დიდი ალბათობით ახალი ბირთვი გვეყოლება. ვფიქრობ, საჭიროა ახალი მთავარი მწვრთნელიც, რომელიც გუნდს უფრო სწრაფი და თავისუფალი კალათბურთის თამაშის შესაძლებლობას მისცემს. იმედია ახალი შემადგენლობის ჩამოყალიბების პროცესი უმტკივნეულოდ ჩაივლის და გუნდი გადაეწყობა, მაგრამ ეს მარტივი არ იქნება, რადგან დიდი არჩევანი არ გვაქვს და თანაც ევრობასკეტის საკვალიფიკაციო ეტაპზე NBA-ს კალათბურთელები ნაკრებს ვერ დაეხმარებიან, რაც საქმეს ძალიან გაგვირთულებს.
ფაქტია, რომ თამასა ძალიან მაღლა ავწიეთ და მისი შენარჩუნება მარტივი არ იქნება, ილიას ზუროსის გუნდის მიერ დადებული ისტორიული შედეგი კი აუცილებლად უნდა დავაფასოთ. საქართველოს ნაკრები შემდეგ ოფიციალურ შეხვედრას 26 თებერვალს გამართავს. ევრობასკეტის შესარჩევ ეტაპზე თბილისს მსოფლიო კალათბურთის გრანდი სერბეთის ეროვნული ნაკრები ესტუმრება.
ავტორი: გიორგი ზურაბიშვილი