საქართველოს ბანკის გუნდის წევრი და ჯუდოკა პაატა მერებაშვილი მსოფლიო ჩემპიონი გახდა ვეტერანთა შორის. ივნისში ევროპის ჩემპიონის ტიტული მოიპოვა. სპორტის ამ სახეობით 7 წლიდან დაინტერესდა და 18 წელი აქტიურად ასპარეზობდა.
პირველ რიგში გამარჯვებას გილოცავთ. აქტიური სპორტული კარიერა 2017 წელს დაასრულეთ, რატომ გადაწყვიტეთ ისევ ჩემპიონატზე გასვლა?
საქართველოს ბანკის თანამშრომელი ვარ და გუნდის წევრები ხშირად მეუბნებოდნენ, რომ მევარჯიშა და კიდევ მეცადა ჩემპიონატზე გასვლა. მათ შორის იყო ჩემი პირველი მწვრთნელი, გიორგი გამდლიშვილი, რომელიც ახლა ჩემი თანამშრომელია. შეიძლება ითქვას, რომ მათი მონდომებითა და დაუღალავი ჩიჩინით მივიღე ეს გადაწყვეტილება. თან ხელს მიწყობდნენ, რომ დარბაზში დროულად წავსულიყავი და მევარჯიშა. ჯერ საქართველოს ჩემპიონი გავხდი ვეტერანთა შორის, მერე ევროპის და ახლა მსოფლიოს.
როგორც ჩანს, ისევ გაქვთ გამარჯვებისთვის ბრძოლის სურვილი და მუხტი.
კი, შემდეგ წელსაც ვაპირებ. ახალი წლის შემდეგ დავიწყებ აქტიურ მომზადებას ჩემპიონატისთვის.
ელოდით გამარჯვებას?
ევროპის ჩემპიონატზე უფრო ვღელავდი. ამდენი ხნის მერე არ ვიცოდი, როგორ იქნებოდა. ევროპის ჩემპიონი რომ გავხდი, მსოფლიოზე უკვე მქონდა მოლოდინი, რომ გავიმარჯვებდი.
რა დროს უთმობთ ვარჯიშს?
სამსახურის მერე ვვარჯიშობ. როცა ჩემპიონატისთვის ვემზადებოდი, თანამშრომლების გვერდში დგომით, ცოტა ადრეც ვახერხებდი დარბაზში წასვლას.
როგორც ჩანს, საქართველოს ბანკის გუნდი ყოველთვის გვერდში გიდგათ.
კი და არა მხოლოდ ვარჯიშის ნაწილში. საქართველოს ბანკის თანადაფინანსებით წავედი მსოფლიო ჩემპიონატზე, ხოლო ევროპის ჩემპიონატი სრულად დააფინანსა.
სამომავლო გეგმები როგორია?
სამომავლო გეგმაა “არ გაჩერდე”. როგორც გითხარით, შემდეგ წელსაც ვაპირებ ჩემპიონატში მონაწილეობის მიღებას. “არ გაჩერდე” ისეთი სლოგანია, აუცილებლად მოგცემს მუხტსა და მოტივაციას.
