საქართველოს ეროვნულმა ნაკრებმა თბილისში გამართულ ამხანაგურ შეხვედრაში ტაილანდის ნაკრები დაამარცხა და ერთ თამაშში ერთდროულად რამდენიმე რეკორდული ნიშნულიც დააფიქსირა.
ვილი სანიოლის გუნდს ფიზიკურად და ფსიქოლოგიურად რთული პერიოდი უდგას – ევროპის ჩემპიონატის შესარჩევ ეტაპზე დაგვრჩა რამდენიმე შეხვედრა, რომელთაც სატურნირო მნიშვნელობა ჩვენთვის, ფაქტობრივად, დაკარგული აქვს, თუმცა ერთა ლიგის გადამწყვეტი ეტაპის წინ გვჭირდება კარგი თამაშები, კარგი ხასიათი და საკუთარი თავის ხელახლა პოვნა.
ტაილანდთან შეხვედრაში ბევრი პოზიტიური რამ მოხდა და სწორედ საკუთარი თავის ხელახლა პოვნის პროცესისთვის საჭირო პირველადი ნაბიჯებიც გადაიდგა.
საქართველო V ტაილანდი 8-0
ვილი სანიოლმა ამჯერად ჩვენთვის უკვე კლასიკური ტაქტიკური ფორმაცია შეარჩია 3-4-1-2:
ლორია – კვერკველია, გელაშვილი, ლოჩოშვილი – ლობჟანიძე, ქოჩორაშვილი, შენგელია,- ჩაკვეტაძე – მიქაუტაძე, დავითაშვილი.
გოლები: 1:0 დავითაშვილი (მე-9 წთ.), 2:0 ლოჩოშვილი (მე-12 წთ. ჩაკვეტაძის ასისტი), 3:0 მიქაუტაძე (24-ე წთ.), 4:0 მიქაუტაძე (37-ე წთ. ლობჟანიძის ასისტი), 5:0 მიქაუტაძე (41-ე წთ. ჩაკვეტაძის ასისტი), 6:0 დავითაშვილი (44-ე წთ. მექვაბიშვილის ასისტი), 7:0 მიქაუტაძე (56-ე წთ. პენალტი), 8:0 კვარაცხელია (66-ე წთ. ალთუნაშვილის ასისტი)
მიქაუტაძის პოკერი, დავითაშვილის დუბლი, ჩაკვეტაძის ასისტების დუბლი – და კიდევ მრავალი მნიშვნელოვანი და ისტორიული შედეგი, რომელიც სტატისტიკურად გამოვლინდა კონკრეტულ 90 წუთში და აუცილებლად დაგვეხმარება ფსიქოლოგიურად მომავალ რთულ შეხვედრებში:
⚽ საქართველოს ეროვნული ნაკრების 33-წლიანი ისტორიის განმავლობაში, რომელიც 277 ოფიციალურ თუ ამხანაგურ მატჩს მოიცავს, 8-გოლიან სხვაობით გამარჯვება გამოდგა ყველაზე დიდი. ტაილანდამდე რეკორდული სხვაობა 26 წლის წინ სომხეთის ნაკრების წინააღმდეგ ფიქსირდებოდა, როცა მეტოქე 7-0 დავამარცხეთ.
⚽ მოვახერხეთ და ტაილანდს ერთ ტაიმში გავუტანეთ 6 უპასუხო გოლი, რაც ასევე ახალი რეკორდია. მეტოქეს სულ 32-ჯერ დავურტყით კარისკენ (21 ზუსტი დარტყმა) – რადგანაც დარტყმების სტატისტიკა ყველა თამაშიდან არ მოგვეპოვება, სავარაუდოდ, ეს კიდევ ერთი რეკორდული მაჩვენებელია.
⚽ გიორგი მიქაუტაძემ, რომელსაც საკლუბო კარიერაში გადამწყვეტი და რთული პერიოდი უდგას აიაქსში, ტაილანდთან ოთხი გოლის გატანა მოახერხა, რაც ასევე რეკორდული მაჩვენებელია. აქამდე არავის გაუტანია პოკერი საქართველოს ნაკრების მაისურით და თუკი ეს ვინმეს ახლა სჭირდებოდა, სწორედაც რომ ჟორჟია; მას აქამდე სულ 4 სანაკრებო გოლი ჰქონდა და ერთ თამაშშივე მოახერხა ნიშნულის გაორმაგება; ნაკრების ყველა დროის ბომბარდირის, შოთა არველაძის შემდეგ, მიქაუტაძე პირველია, ვინც 3 ან მეტი გოლი გაიტანა.
⚽ ეროვნული ნაკრების კაპიტანმა, გურამ კაშიამ 107-ე თამაშში მიიღო მონაწილეობა, რაც კიდევ ერთი უმაღლესი ნიშნულია, რომელიც უშუალოდ ტაილანდის ნაკრების წინააღმდეგ დაფიქსირდა.
⚽ 2023 წლის კალენდარული მონაცემებით, მთლიანად ეროვნულ ნაკრებს სულ 10 გოლი ჰქონდა გატანილი, ერთ თამაშში კი ახლა 8 გოლის გატანა შეძლო და მიქაუტაძის მსგავსად ლამის ნაკრებმაც გააორმაგა წლიური გოლების რიცხვი 90 წუთში.
⚽ ნაკრებს ისტორიაში სულ 120 ამხანაგური შეხვედრა გაუმართავს, რომელშიც ბურთების შეფარდება უარყოფითი იყო (- 9). ამ შემთხვევაშიც მხოლოდ 1 გოლი დაგვაკლდა, რომ ეს უარყოფითი შეფარდება განულებულიყო.
⚽ ვილი სანიოლმა ეროვნული ნაკრების ხელმძღვანელობით მე-13 გამარჯვება მოიპოვა (იგივე შედეგები ჰქონდათ ალექსანდრე ჩივაძესა და თემურ ქეცბაიას). მართალია, გამარჯვებების რეკორდი თემურ ქეცბაიას ეკუთვნის (16 გამარჯვება), მაგრამ ვილიმ 13 გამარჯვების მოგროვება ყველაზე ცოტა, 28 შეხვედრაში მოახერხა. ის მესამე მწვრთნელია, რომლის გაწვრთნილმა ნაკრებმაც 40 და მეტი გოლის გატანა შეძლო: (ვლადიმერ ვაისი – 47 თამაში და 61 გოლი; ალექსანდრე ჩივაძე – 35 თამაში და 43 გოლი) ვილი სანიოლი – 28 თამაში და 46 გოლი.
წინ უფრო დიდი მნიშვნელობის თამაშია ბევრად უფრო ძლიერ მეტოქესთან – თემურ ქეცბაიას კვიპროსის ნაკრები გვესტუმრება თბილისში (15 ოქტომბერი; 17 საათი; მიხეილ მესხის სტადიონი) და კიდევ უფრო უკეთ გამოჩნდება ჩვენი ახლანდელი ფორმა. ცხადია, ტაილანდთან შეხვედრა მართებულ სურათს ვერ მოგვცემს, თუმცა მოგვცემს ბიძგსა და ინერციას, თამაშის ხასიათსა და სურვილს, რომ კიდევ უფრო კარგი ფიზიკა და ფსიქოლოგია გვქონდეს ერთა ლიგის ნახევარფინალის წინ.
ავტორი: გიორგი ყორღანაშვილი