26 მარტს საქართველოსა და საბერძნეთს შორის ისტორიული მატჩი გაიმართება, დიდისა და პატარას ყურადღება კი ბორის პაიჭაძის სახელობის სტადიონისკენ იქნება მიმართული. ამ დაძაბული შეხვედრის საგულშემატკივროდ ქართველი ქომაგები უკვე მომზადებულები არიან და დიდი ინტერესითაც ელიან, რადგან გამარჯვების შემთხვევაში, საქართველოს ნაკრებს ევრო 2024-ის ჩემპიონატზე თამაშის შანსი ეძლევა.
საქართველოს ბანკი საქართველოს ეროვნული საფეხბურთო ნაკრების მთავარი სპონსორი და მხარდამჭერია. 26 მარტს კი საქართველოს ნაკრების მხარდასაჭერად ქომაგები სტადიონზე შეიკრიბებიან და თითოეულ ფეხბურთელს უგულშემატკივრებენ. რამდენად დიდი მუხტის მატარებელია გულშემატკივრების მხარდაჭერა და რა დიდი მნიშვნელობა აქვს საქართველო-საბერძნეთის მატჩს ქვეყნისთვის, ამის შესახებ საქართველოს ქალთა ეროვნული ნაკრების ფეხბურთელი, ნათია დანელია გვესაუბრა.
“როცა სპორტის მიმართ ინტერესი პირველად გამიჩნდა, ძალიან პატარა ვიყავი. ვფიქრობ, რომ ყველაზე მეტად რამაც კონკრეტულად ფეხბურთი მომაწონა და შემაყვარა, მამაჩემის მიერ ყოველდღიურად თამაშების ყურება იყო. შემდეგ კი, როდესაც ვხედავდი, თუ როგორ თამაშობდა ჩემი ყველა მეგობარი, დიდი მიზნებისკენ სწრაფვა უკვე მეც ძალიან მომინდა. სპორტს ჩემს ცხოვრებაში ძალიან დიდი ადგილი უკავია, დაახლოებით, ჩემი ცხოვრების 95%, რადგან ჩემს ყოველ დღეს უმეტესად სტადიონზე ვარჯიშსა და თამაშების ყურებაში ვატარებ”, — ამბობს ფეხბურთელი ნათია დანელია.
26 მარტის მატჩი ნათიასთვის განსაკუთრებით მნიშვნელოვანია და სხვა ქომაგების მსგავსად, საქართველოს ნაკრების საგულშემატკივროდ ისიც დიდი შემართებით ემზადება. ნათიას აზრით, მატჩში საქართველოს გამარჯვება ფეხბურთის მიმართულებით ქვეყანაში დიდ ცვლილებებს გამოიწვევს, რაც ქალთა ეროვნულ ნაკრებსაც შეეხება.
“ალბათ, როგორც მთელი საქართველო, მათ შორის, მეც ძალიან დიდი და სერიოზული შემართებით ველოდები საქართველო-საბერძნეთის დაპირისპირებას, რადგან ამ მატჩს საქართველოში ფეხბურთი რადიკალურად შეუძლია შეცვალოს. ევროპაზე ჩვენი მოხვედრა ქვეყნის ამინდს აბსოლუტურად ცვლის. ევროპაზე ნაკრების მოხვედრის გარდა, ბევრ რამეში შეიცვლება სიტუაცია როგორც ადგილობრივად, ისე ქვეყნის გარეთ. მგონია, რომ დიდი კლუბები ორმაგად დაინტერესდებიან ქართველი ფეხბურთელებით. უამრავი პატარა ბავშვი დაიწყებს ფეხბურთის თამაშს და ჩვენს ნაკრებს ამაში უდიდესი წვლილი ექნება შეტანილი. ასევე, ფინანსურადაც გაიზრდება და გამყარდება ეროვნული ჩემპიონატი. ავტომატურად ჩვენ, ქალ ფეხბურთელებსაც, შეგვეხება წინსვლა და ფინანსური სიმყარე”, — აღნიშნა ნათია დანელიამ.
ასე რომ, 26 მარტის მატჩი ახალი ისტორიის დასაწყისი შეიძლება გახდეს, ეროვნული ნაკრების ფეხბურთელებსა და ქომაგებს კი დიდი მიზანი — გამარჯვება აერთიანებთ.
“ჩემი მოლოდინი, რა თქმა უნდა, დადებითი შედეგის მიღწევა ანუ გამარჯვებაა. ძალიან საინტერესო და დაძაბულ მატჩს ველოდები. გულშემატკივრობას, რა თქმა უნდა, როგორც ყოველთვის, სტადიონიდან ვაპირებ. როგორც ამბობენ, მეც ასე ვფიქრობ, რომ გულშემატკივარი ნამდვილად მე-12 მოთამაშეა. საკუთარი გამოცდილებიდან გამომდინარე ვამბობ, რომ გულშემატკივარს ძალიან დიდი მუხტის და მოტივაციის შეტანა შეუძლია სტადიონზე”, — ამბობს ნათია.