საქართველოს კალათბურთის ეროვნულმა ნაკრებმა მსოფლიო ჩემპიონატზე სადებიუტო თამაში ჩაატარა, რომელშიც კაბო ვერდეს ნაკრებს დაუპირისპირდა და დამაჯერებელი გამარჯვება მოიპოვა (85-60). ჩვენი ქვეყნისთვის ისტორიულ შეხვედრაში საქართველოს ნაკრებმა ძალიან კარგი შთაბეჭდილება დატოვა, თუმცა ისიც უნდა ითქვას, რომ კაბო ვერდე ზედმეტად სუსტად გამოიყურებოდა და რთული სათქმელია აღნიშნული მატჩი დასკვნების გამოსატანად რამდენად გამოდგება. მთლიანობაში, გაგვიმართლა, რომ მსოფლიო ჩემპიონატზე პირველი მეტოქე შედარებით სუსტი შეგვხვდა, რადგან ბიჭებს პირველ წუთებში ნერვიულობა ეტყობოდათ და კარგია, რომ ამ ფაქტორმა საბოლოო შედეგზე გავლენა არ იქონია. გუნდში დადებითი მუხტის არსებობისთვის კი პირველი გამარჯვება ძალიან მნიშვნელოვანია და შემდეგ მეტოქეს, მსოფლიო ჩემპიონატის ერთ-ერთ ფავორიტ სლოვენიის ნაკრებს, ჩვენი გუნდი კარგ ხასიათზე შეხვდება.
თამაშის პირველი წუთები საკმაოდ სტრესული გამოდგა. ბევრი თავისუფალი სროლა ვერ გამოვიყენეთ და გუნდში დაბნეულობა აშკარად შეინიშნებოდა. ნახევარ მეოთხედზე მეტი იყო გასული, როდესაც ჩვენს ანგარიშზე მხოლოდ ორი ქულა იყო. თუმცა, თამაშში გარდამტეხი ფაქტორი ვეტერანი გამთამაშებელი გიორგი ცინცაძე გამოდგა, რომელიც შეხვედრაში სათადარიგო სკამიდან ჩაერთო და თამაშის სურათი მთლიანად შეცვალა. გიორგი ცინცაძემ პარკეტზე შესვლისთანავე ზედიზედ ორი სამქულიანი ჩააგდო, ერთმანეთზე უფრო ეფექტური პასები დაარიგა და ჩვენს გუნდში დაბნეულობა გააქრო. ცინცაძეს შემდეგ სხვა კალათბურთელებმაც აუბეს მხარი და პირველივე ტაიმში საქართველოს ნაკრებმა გადამწყვეტი უპირატესობა მოიპოვა.
ჩვენი გუნდის მთავარი ამოცანა მადრიდის რეალის ცენტრის ედი ტავარეშის განეიტრალება იყო და ამ დავალებას ბიჭებმა თავი იდეალურად გაართვეს. ძალიან კარგად იმუშავა ილიას ზუროსის დაცვითმა ტაქტიკამ, რაც ტავარეშის წინააღმდეგ ორმაგი დაცვის ხაფანგს გულისხმობდა. ედი ტავარეში დომინანტი ცენტრია და მას ბევრი პლიუსი აქვს, თუმცა პასის კულტურა მისი ძლიერი მხარე ნამდვილად არ არის. მეტოქის ეს სისუსტე ჩვენმა სამწვრთნელო შტაბმა იდეალურად გამოიყენა. ორმაგი დაცვიდან ბურთის გამოტანას ედი ვერ ახერხებდა და ამან განაპირობა, რომ კაბო ვერდეს ლიდერს პირველი ტაიმის ბოლოს უკვე ოთხი დაკარგვა ჰქონდა. ტავარეშის განეიტრალება სამწამიანშიც კარგად შევძელით და საბოლოოდ მან თამაში მხოლოდ 6 ქულით და 5 დაკარგვით დაასრულა. მეტოქე გუნდის სხვა კალათბურთელები კი მას კლასით ნამდვილად ჩამოუვარდებოდნენ და ჩვენს გუნდს თამაშის მოგება აღარ გასჭირვებია. კაბო ვერდეს ნაკრებმა 26-დან მხოლოდ 3 სამქულიანის გამოყენება შეძლო (11.5%).
გარდა გიორგი ცინცაძისა, ასევე ძალიან კარგად გამოიყურებოდა ჩვენი ნაკრების ახალგაზრდა გამთამაშებელი რატი ანდრონიკაშვილი. რატი პირველი წუთებიდანვე ეფექტური იყო. იგი კარგად პოულობდა სივრცეებს, პიკ-ენდ-როლსაც მშვენივრად ათამაშებდა და მთლიანობაში ბურთს კარგად ანაწილებდა. ჩვენი გუნდის შეტევებს კარგი დინამიკა ჰქონდა, რამაც საბოლოოდ ბევრი თავისუფალი სროლა განაპირობა. მთლიანობაში, ბურთი შეტევაში ძალიან კარგად მოძრაობდა, რაც ნამდვილად გასახარია. საქართველოს ნაკრებმა თამაში 23 ასისტით დაასრულა, რაც ელიტური მაჩვენებელია. ძალიან სასიხარულოა, რომ ჩვენი გუნდის ორივე გამთამაშებელი კარგ ფორმაშია, რადგან საქართველოს ნაკრების ძლიერი მხარე წინა ხაზის ვარსკვლავური შემადგენლობაა და თუ უკანახაზელებიც თამაშს ასე გააგრძელებენ, დარწმუნებული ვარ, რომ ჩვენი გუნდის დამარცხება ნებისმიერ მეტოქეს გაუჭირდება.
მსოფლიო ჩემპიონატზე თავისი პირველი ორმაგი დუბლი გაიფორმა გოგა ბითაძემ (15 ქულა, 11 მოხსნა, 3 პასი, 2 ჩაჭრა, 0 დაკარგვა), რომელიც ამჯერად თამაშში სათადარიგო სკამიდან ჩაერთო. გოგა შესანიშნავ ფორმაშია და მისი დაცვითი უნარები ჩვენი გუნდისთვის უბრალოდ ფასდაუდებელია. მთლიანობაში კარგი თამაში ჰქონდა ნაკრების ყველა კალათბურთელს. ჩვენს გუნდში შეთამაშება ნამდვილად იგრძნობა და ნაკრები კარგად არის დაბალანსებული.
ხარვეზებს რაც შეეხება, მთავარი პრობლემა ამჯერადაც დაკარგვები იყო. 22 დაკარგვა ნამდვილად ბევრია და მაღალი კლასის გუნდი ამდენ შეცდომას არ გვაპატიებს. მიუხედავად იმისა, რომ როგორც სანდრო მამუკელაშვილმა, ისევე თორნიკე შენგელიამ მთლიანობაში კარგი თამაში ჩაატარეს, მათ შესაბამისად 6 და 5 დაკარგვა ჰქონდათ, რაც განსაკუთრებით წინა ხაზელისთვის ძალიან ცუდი მაჩვენებელია. თუმცა, ისიც უნდა აღინიშნოს, რომ თამაშის ბედი პირველ ტაიმშივე გადაწყვეტილი იყო, რამაც ჩვენს კალათბურთელებს თავისუფლად თამაშის უფლება მისცა და შეიძლება ბევრი დაკარგვა ამ ფაქტორმაც განაპირობა. ასე რომ, ამ შემთხვევაში სტატისტიკა თამაშის სურათს იდეალურად არ ასახავს, თუმცა დაკარგვები წინა მატჩებშიც პრობლემა იყო და შემდეგ შეხვედრებში ბურთს მეტად უნდა გავუფრთხილდეთ.
საქართველოს ნაკრების შემდეგი მეტოქე კი უძლიერესი სლოვენიის ნაკრები იქნება. სლოვენიას მსოფლიოს ერთ-ერთი საუკეთესო კალათბურთელი ლუკა დონჩიჩი ლიდერობს, რომელიც პირველ შეხვედრაში, ვენესუელის ნაკრების წინააღმდეგ, უბრალოდ შეუჩერებელი იყო (37 ქულა, 7 მოხსნა, 6 პასი). ტავარეშისგან განსხვავებით, დონჩიჩის მთლიანად განეიტრალება უბრალოდ შეუძლებელია. ორმაგი დაცვის ხაფანგი მის წინააღმდეგ ვერ იმუშავებს, რადგან ლუკას სასწაული პასის კულტურა და გენიალური საკალათბურთო აზროვნება აქვს. ორმაგი დაცვის დროს, ის თითქმის ყველა შემთხვევაში სწორ გადაწყვეტილებას იღებს და შეტევაში რიცხობრივ უპირატესობას ქმნის, რაც იოლ ქულებს განაპირობებს. ასევე დონჩიჩი არის ძალიან უხერხული მეტოქე, რადგან ის ზედმეტად სწრაფი და ტექნიკურია წინა ხაზელებისთვის, ხოლო უკანახაზელებისთვის ფიზიკურად ზედმეტად ძლიერი. ასე რომ, მისი ერთ-ერთზე დაჭერაც ძალიან გაჭირდება. უმნიშვნელოვანესი იქნება დაზღვევაზე თამაში და ამ შემთხვევაში გოგა ბითაძის ფაქტორი უნდა იყოს გადამწყვეტი. დიდი ალბათობით ლუკას წინააღმდეგ ჩვენი დაცვითი სტრატეგია ცვალებადი იქნება, რომ მას მოულოდნელობის ეფექტი მაინც შევთავაზოთ და თამაშის მუღამი არ დავაჭერინოთ. თუმცა, ვფიქრობ, ლუკა თავის გასაკეთებელს მაინც გააკეთებს და მთავარია სხვა კალათბურთელებს თავისუფლად თამაშის შესაძლებლობა არ მივცეთ. სხვა კალათბურთელები კი სლოვენიის ნაკრებს ასევე ძალიან ძლიერი ჰყავს. განსაკუთრებით სახიფათოა მსოფლიოს ერთ-ერთი საუკეთესო სნაიპერი, კლემენ პრეპელიჩი და შესანიშნავი წინახაზელი მაიკ ტობი. პიკ-ენდ-როლის და პერიმეტრის დაცვას სლოვენიის ნაკრების წინააღმდეგ ჩვენი გუნდისთვის გადამწყვეტი მნიშვნელობა ექნება.
სლოვენია არა მხოლოდ ჩვენი ჯგუფის, არამედ მთლიანად მსოფლიო ჩემპიონატის ერთ-ერთი ფავორიტია და ძალიან საინტერესოა ასეთი ძლიერი გუნდის წინააღმდეგ როგორ ვითამაშებთ. ფსიქოლოგიური უპირატესობა ჩვენს მხარეს უნდა იყოს, რადგან სლოვენიისგან ყველა გამარჯვებას ელოდება, ხოლო ჩვენ წნეხის გარეშე ვითამაშებთ. მსოფლიო ჩემპიონატზე საქართველოს ნაკრების მეორე თამაში სლოვენიის ნაკრების წინააღმდეგ 28 აგვისტოს გაიმართება და ის თბილისის დროით 15:30-ზე დაიწყება.
ავტორი: გიორგი ზურაბიშვილი