ადამიანები, რომლებიც არ ჩერდებიან – ლაშა ბექაური

 „მთის ხალხი მებრძოლი ხალხი ვართ. სპორტს არხილოსკალოში ვეზიარე. ამ ადგილმა და ამ ადამიანებმა მიზნისკენ ბრძოლა მასწავლეს.“

მართალია, ლაშა ბექაურის პირადი სტატისტიკა და ახალგაზრდა ასაკში მიღწეული შთამბეჭდავი შედეგები დაუჯერებელია, მაგრამ მთავარი, რაც ამ ქართველ სპორტსმენს გამოარჩევს, არა მედლების რაოდენობა, არამედ ამბავია, რომელიც ღრმა ბავშვობიდან იწყება, როცა ის დედოფლისწყაროს რაიონის სოფელ არხილოსკალოში პირველად ეზიარა სპორტს.

ასეა ნებისმიერი წარმატებული სპორტსმენის კარიერაში – მიღწევებამდე არის დიდი და რთული გზა, რომელიც უამრავ დაბრკოლებას, სირთულესა და გულშემატკივრისთვის უცნობ წვრილმან ამბავს გულისხმობს. ამ სირთულეებისა და წვრილმანი ამბების ერთობლიობა ქმნის სპორტსმენისთვის უმთავრესს – მენტალობას; ფიზიკური მზაობა კი შემდეგი ეტაპია, რაც ასევე უდიდეს ფსიქოლოგიურ მდგრადობასა და შრომას გულისხმობს.

როცა სპორტმენი ხარ, მთელს შენ ცხოვრებას ამ საქმეს უძღვნი. დაუღალავი შრომისა და ვარჯიშის გარეშე წარმატება არ მოდის. სპორტი ხშირად დაუნდობელიცაა.

ლაშას კარიერაში გადამწყვეტი მომენტი ტოკიოს ოლიმპიადის დაწყებამდე ცოტახნით ადრე მოხდა, როცა ერთ-ერთ ტურნირზე შეხვედრისას ის მძიმე ფიზიკურ დაზიანებას გადაურჩა:

შეიძლება ერთი პატარა შეცდომა ან არასწორი ვარდნა. ტოკიოს ოლიმპიადის წინაც ასე მოხდა. ყველაფრით მზად ვიყავი გამარჯვებისთვის. სულიერად, ფიზიკურად, თუმცა შეიძლება ჩემი ოცნება ვერ ამეხდინა. აქ გამომადგა ის ჯიუტი ხასიათი, რომელიც ბავშვობიდან, გუდამაყრიდან გამომყვა.

საკლუბო დონეზე იყო ბოლო მნიშვნელოვანი კარიერული სიახლე ლაშა ბექაურისთვის, როდესაც გასული წლის დეკემბერში ოლიმპიური ჩემპიონი ჩემპიონთა ლიგის გათამაშებაში ფრანგული გრანდის, პარი სენ ჟერმენის სახელით გავიდა. ლაშა 2022 წლის ძიუდოს ჩემპიონთა ლიგის გამარჯვებული ქართული კლუბის („მებრძოლი“) სახელით გახდა, 2023 წელს კი პსჟ-სთან ერთან მესამე ადგილი დაიკავა.

 „არ გავჩერდი, ბოლომდე ვიბრძოლე და როგორც კი მოწინააღმდეგეს დავეჭიდე, ყველაფერი დამავიწყდა. მხოლოდ იმაზე ვფიქრობდი, ჩემს ხალხს როგორ გავახარებდი.

ასე იხსენებს ლაშა ბექაური ტოკიოს ფინალის ემოციებს. რთულია იმ დროის წარმოდგენა, როცა ამ სახელოვანი ქართველი ძიუდოისტის სახელი ქართული ძიუდოს სივრცეში არ ისმოდა, თითქოს ათეული წლებია, რაც ლაშა ჩვენი ნაკრების ერთ-ერთი ლიდერი და უმაღლესი დონის სპორტსმენია, არადა ის სულ რაღაც 23 წლისაა.

ამ მცირე ასაკშიც მოახერხა და ღირსეული სახელი დაიმკვიდრა ქართულ სპორტში. მთავარი წარმატება, რა თქმა უნდა, 2020-ის ტოკიოს ზაფხულის ოლიმპიურ თამაშებს უკავშირდება (რომელიც პანდემიის გამო 2021 წლის ზაფხულში გაიმართა) – ჯერ კიდევ 21 წლის იყო, როდესაც მსოფლიო ძიუდოსთვის შედარებით უცნობმა სპორტსმენმა ოლიმპიური ოქრო მოიპოვა.

ლაშა ბექაურის კარიერაში ოლიმპიურ ოქრომდეც და მას შემდეგაც ბევრი სპორტული წარმატება და უმაღლესი სინჯის მედალია – ახალგაზრდული ევროპისა და მსოფლიოს ჩემპიონატების ოქროს მედლები, კადეტთა ევროპისა და მსოფლიოს ჩემპიონატების ოქროს მედლები, ოლიმპიური ოქროს შემდეგ ლისაბონში გამართული ევროპის ჩემპიონატის ოქროს მედალი და ა.შ. თქმა არ უნდა, კიდევ ბევრი წარმატება იქნება მის სახელთან დაკავშირებული, თუმცა მთავარი, რაც მას გამოარჩევს, არა სტატისტიკური მაჩვენებელი, არამედ ის თავდადებაა, რომელსაც ლაშა ბექაური სპორტში თავისი კუთხის და სამშობლოს სიყვარულით ავლენს.

საქართველოს ბანკი საქართველოს ოლიმპიური ნაკრების მთავარი სპონსორია და არა მარტო – ყოველთვის და ყველგან მხარს უჭერს ადამიანებს, რომლებიც არ ჩერდებიან და საკუთარი წარმატებით უკეთეს საქართველოს ქმნიან.

არ გაჩერდე, გააგრძელე კითხვა