29 ივნისს 500 Georgia-ს აქსელერაციის პროგრამის მონაწილე 12-მა სტარტაპერმა დემო დღეზე საკუთარი სტარტაპის შესახებ პრეზენტაციები წარადგინა.
სამთვიანი აქტიური გადამზადების შემდეგ, დასკვნით ეტაპზე სტარტაპერებმა დამსწრე საზოგადოებას ის შესაძლებლობები გაუზიარეს, რასაც მათივე სტარტაპები სამომავლოდ ინვესტორებს შესთავაზებენ.
500 Georgia-ს მეოთხე ნაკადი დაკომპლექტებული იყო სხვადასხვა და მრავალფეროვანი პროფილის მქონე სტარტაპებით. დემო დღეზე თითოეული მათგანი შეეცადა საკუთარი სტარტაპის უპირატესობები და ინოვაციური მიდგომები იქ მყოფი აუდიტორიისთვის წარედგინა.
ქვემოთ იმ მნიშვნელოვან დეტალებზე გიამბობთ, რაც ამ სტარტაპების საქმიანობის შესახებ უნდა იცოდეთ:
- Bilimber-ის მისიაა, 6-დან 12 კლასამდე მოსწავლეებს დაეხმაროს, დაუკავშირდნენ საუკეთესო მასწავლებლებს 60 წამზე ნაკლებ დროში და მიიღონ წვდომა ყველა რეგიონში ყველაზე ფართო მონაცემთა ბაზაზე.
- Arena Games ქართული Web3 თამაშების პლატფორმა, რომელიც თამაშის დეველოპერებსა და მოთამაშეებს აერთიანებს.
- Datamind 2021 წელს საქართველოში დაფუძნებული სტარტაპია, რომლის მთავარი მისიაა, საბანკო სექტორისთვის შექმნას ერთგვარი მონაცემთა საცავი.
- Dealpad გაყიდვების გუნდისთვის შექმნილი სტარტაპია, რომლის მეშვეობითაც კომპანიები თავიანთ მომხმარებლებს შესაძლებლობას აძლევენ, აქტიური კომუნიკაცია ჰქონდეთ პოტენციურ მყიდველებთან და დაინტერესებულ პირებთან.
- Emonomy-ს ამოცანაა, კომპანიებს/ბრენდებს ეფექტური კამპანიების შექმნასა და გაშვებაში დაეხმაროს, რომლებიც მომხმარებლებში დადებით ემოციას გამოიწვევს.
- Fortu Wealth ფინტექ აპლიკაციაა, რომელიც არც თუ ისე გამოცდილ ინვესტორებს საშუალებას აძლევს, მართონ თავიანთი ფინანსები ინტუიციური, მომხმარებლისთვის მოსახერხებელი პლატფორმით.
- Glorri არის სტარტაპი, რომელიც ადამიანური რესურსის მაძიებლებსა და სამუშაოს დაწყების მსურველებს მარტივად აკავშირებს ერთმანეთთან.
- Lala პლატფორმაა, რომელიც მუსიკის ონლაინ გაკვეთილების ჩატარების საშუალებას იძლევა – რასაკვირველია, ინოვაციური მეთოდით.
- Murmur ორიენტირებულია გარე რეკლამის ინოვაციური ვერსიების შექმნაზე, რომელიც უფრო ეფექტურ შედეგებს მისცემს მომხმარებლებს, ვიდრე ამას ციფრული რეკლამები აკეთებენ.
- Oneapplyუზბეკეთში დაფუძნებული სტარტაპია, რომელიც სამუშაოს მაძიებლებს მარტივი და ეფექტური პლატფორმის მეშვეობით სამსახურის სწრაფად მოძიებაში ეხმარება.
- Squares – ასე ეწოდება ყაზახეთში დაფუძნებულ სტარტაპს, რომლის მისია მომხმარებლებისთვის ღონისძიებებისთვის შესაფერისი სივრცეების მოძიებისა და დაჯავშნის პროცესის გამარტივებაა.
- Uteach არის პლატფორმა, რომელიც განათლების პროვაიდერებს კურსების შექმნისა და გაყიდვის პროცესს უმარტივებს.
მიუხედავად სხვადასხვაგვარი მიღწევებისა და საქმიანობისა, დემო დღეზე თორმეტივე სტარტაპს აერთიანებდა ის შემართება, რომელიც მათ სამომავლო გეგმების განხორციელებაში დაეხმარება.
საინტერესოა, როგორ განვითარდება ამ სტარტაპებისთვის მოვლენები, თუმცა, უკვე თვალსაჩინოა, რომ 500 Georgia-ს აქსელერაციის პროგრამა სამომავლო პერსპექტივაში მნიშვნელოვნად დაეხმარება თითოეულ სტარტაპს, სწორი და ჯანსაღი ურთიერთობები დაამყარონ ინვესტორებთან და მათი გამოცდილებისა და ცოდნის საფუძველზე წარმატებულად წარმართონ სტარტაპ საქმიანობა.